ແນະນຳ ສນຊ (LFND)

ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະ ທານສູນກາງແນວລາວສ້າງຊາດ ພ້ອມຄະນະລົງເຄື່ອນໄຫວວຽກງານ ຢູ່ແຂວງສະຫວັນນະເຂດ.

ໃນລະຫວ່າງ​ວັນ​ທີ 23-24 ເມສາ 2019 ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ລົງເຄື່ອນ​ໄຫວ​ຢ້ຽມຢາມ ​ແລະ ຊຸກຍູ້​ການ​ຜະລິດ ຢູ່​ແຂວງ​ສະຫວັນ​ນະ​ເຂດ ​ໂດຍ​ໄດ້​ຮັບ​ການ​ຕ້ອນຮັບ​ ຈາກ​ການນຳຂັ້ນ​ແຂວງໆ​ສະຫວັນ​ນະ​ເຂດ,

, ຄະນະໄດ້ໄປພົບປະໂອ້ລົມ​ປະຊາຊົນ ພ້ອມຮັບ​ຟັງ​ການ​ລາຍ​ງານ​ຫຍໍ້ ກ່ຽວ​ກັບ​ສະພາບ​ການ​ພັດທະນາ​ເສດຖະກິດ-ສັງຄົມ ຢູ່ກຸ່ມບ້ານເວີນ, ເມືອງໄຊບູລີ, ສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມປອດໄພໂດຍພື້ນຖານ, ​​ປະກົດ​ການ​ຫຍໍ້​ທໍ້ຕ່າງໆ​ ໄດ້ຮັບການແກ້ໄຂ ຖ້າທຽບໃສ່ໄລຍະດຽວກັນຂອງປີຜ່ານມາ ເຫັນວ່າດີຂື້ນກວ່າເກົ່າ; ທົ່ວ​ເມືອງ ມີເນື້ອທີ່ 1.109.9 ກິໂລຕາແມັດ, ແບ່ງອອກເປັນ 10 ກຸ່ມບ້ານ,ມີ 54 ບ້ານ, ມີ10.102 ຄອບຄົວ, ມີພົນລະເມືອງທັງໝົດ 65.852 ຄົນ, ຍິງ32.602 ຄົນ, ທົ່ວເມືອງມີ ສາມຊົນເຜົ່າ, ຊົນເຜົ່າລາວລຸ່ມກວມ 95,54 %, ເຜົ່າພູໄທກວມ 3,95​% ແລະ ເຜົ່າກະຕ່າງກວມ 0,51 %, ເມືອງໄຊບູລີ ເປັນເມືອງອູ່ເຂົ້າອູ່ປາຂອງແຂວງເພາະມີທົ່ງຮາບເຊບັ້ງໄຟທີ່ກ້ວາງໃຫຍ່ທີ່ເອື້ອອຳນວຍໃຫ້ແກ່ການຜະລິດກະສິກຳປະຊາຊົນສາມາດປູກເຂົ້າຂາຍສົ່ງເປັນສິນຄ້າໄດ້ເພາະມີໂຄງການຊົນລະປະທານ ແລະ ໂຄງການຈັກສູບນ້ຳເລາະແຄມເຊ 29 ແຫ່ງ, ເຊີ່ງເນື້ອທີ່ທຳການຜະລິດໄດ້  8.850 ແຮັກຕາ . ດ້ານການພັດທະນະ ແລະ ແກ້ໄຂຄວາມທຸກຍາກຂອງປະຊາຊົນໂດຍອີງໃສ່ທ່າແຮງບົ່ມຊ້ອນຂອງເມືອງໃນການຜະລິດເປັນສິນຄ້າຂອງປະຊາຊົນໄດ້ຮັບການພັດທະນາຢ່າງກ້ວາງຂວາງ ເສດຖະກິດຂອງເມືອງໄດ້ຮັບການຂະຫຍາຍຕົວສະເລ່ຍໃນລະດັບ 7,30 % ຕໍ່ປີລວມຍອດຜລິດຕະພັນ ຫຼື ຈີດີພີສະເລ່ຍ ໄດ້ 718,69 ຕື້ກີບສະເລ່ຍໃສ່ຫົວຄົນ 1.310 ໂດລາຕໍ່ຄົນຕໍ່ປີ, ການຜະລິດກະສິກຳປະຊາຊົນສາມາດປູກເຂົ້າກິນໄດ້ສອງລະດູ ແລະ ສາມາດຂາຍເປັນສິນຄ້າໄດ້ ພ້ອມດຽວກັນຍັງສາມາດຂະຫຍາຍເນື້ອທີ່ນາປີ ແລະ ນາແຊງ ຕິດພັນກັບການຍົກສູງສະມັດຕະພາບການຜະລິດໃຫ້ສູງຂຶ້ນ. ຂົງເຂດວຽກງານການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແມ່ນໄດ້ສ້າງບ້ານໃຫຍ່ຄ້າຍຄືໂຕເມືອງນ້ອຍໄດ້ສາມບ້ານ , ບ້ານພັດທະນາໄດ້ 33 ບ້ານເທົ່າກັບ 61,11 % ຂອງບ້ານທັງໝົດ ແລະ ສາມາດແກ້ໄຂຄອບຄົວທຸກຍາກໄດ້ 100 % ໃນທົ່ວເມືອງ. ໃນໂອກາດດັ່ງກ່າວທາງຄະນະໄດ້ລົງໄປຕິດຕາມເບີ່ງການຜະລິດໂດຍສະເພາະສະຖານີຈັກສູບນ້ຳທີ່ສະໜອງນ້ຳໃຫ້ກັບເນື້ອທີ່ການຜະລິດຢູ່ບ້ານຕົ້ນແຫນ ສະຖານີດັ່ງກ່າວສາມາດສະໜອງນ້ຳໃຫ້ເນື້ອທີ່ການຜະລິດທັງນາປີ ແລະ ນາແຊງ ໄດ້ 450 ແຮັກຕາ ໂດຍມີປະຊາຊົນບ້ານທີ່ໄດ້ຮັບຜົນປະໂຫຍດຄືບ້ານຕົ້ນແຫນ ແລະ ບ້ານເວີນ ແລະ ໄປຕິດຕາມເບີ່ງສະຖານີຈັກສູບນ້ຳຢູ່ບຶງເຊປ່ຽນໃໝ່ຈັກສູບນ້ຳດັ່ງກ່າວສາມາດຫົດເນື້ອທີ່ການຜະລິດທັງນາປີ ແລະ ນາແຊງໄດ້ 450 ແຮັກຕາ ມີປະຊາຊົນບ້ານບຶງເຊທີ່ໄດ້ຮັບຜົນປະໂຫຍດ. ຫຼັງຈາກນັ້ນໃນວັນທີ່ 24 ເມສາ 2019 ຄະນະໄດ້ລົງໄປຢ້ຽມອຳນາດການປົກຄອງ, ພໍ່ແມ່ປະຊາຊົນ ຢູ່ວິລະບູລີ ເມືອງດັ່ງກ່າວນີ້ຈັດຢູ່ໃນປະເພດເມືອງພູດອຍ, ເຊີ່ງເນື້ອທີ່ 178.503,5 ແຮັກຕາ ຢູ່ຫ່າງຈາກເທດສະບານແຂວງປະມານ 245 ກິໂລແມັັດ. ແບ່ງເປັນສອງເຂດຄືເຂດທົ່ງພຽງ ແລະ ເຂດພູດອຍ ດ້ານການປົກຄອງເມືອງວິລະບູລີປະກອບມີ 13 ກຸ່ມບ້ານ, ມີ 3 ຈຸດສຸມ, ທົ່ວເມືອງມີທັງໝົດ 72 ບ້ານ, ມີ 7.702 ຫຼັງຄາ, ມີ 7.658​ ຄອບຄົວ ແລະ ມີພົນລະເມືອງທັງໝົດ 41.578 ຄົນ ຍິງ 20.722 ຄົນ, ມີ 3 ຊົນເຜົ່າ ລາວລຸ່ມ, ເຜົ່າຜູ້ໄທ ແລະ ເຜົ່າບຣູ ວຽກງານເສດຖະກິດ ແລະ ແກ້ໄຂຄວາມທຸກຍາກຂອງເມືອງເສດຖະກິດຂະຫຍາຍຕົວໃນສະເລ່ຍ 7,15 % ຕໍ່ປີ, ລວມຍອດຜະລິດຕະພັນພາຍໃນ ຈີດີພີ ໄດ້ 283,86 ຕື້ກີບ ທຽບໃສ່ປີ 2014 ເພີ່ມຂຶ້ນ 81,79 ຕື້ກີບ ການແກ້ໄຂຄວາມທຸກຍາກຜ່ານການປະຕິບັດຕົວຈິງມາຮອດປະຈຸບັນສາມາດສ້າງບ້ານພັດທະນາໄດ້ 23 ບ້ານ, ເທົ່າກັບ 31,94 % ຂອງຈຳນວນບ້ານທັງໝົດໃນທົ່ວເມືອງ, ສາມາດລຶບລ້າງບ້ານທຸກຍາກໄດ້ແລ້ວ 71 ບ້ານ ເທົາກັບ 98,61 % ຍັງເຫຼືອບ້ານທຸກຍາກ 1 ບ້ານກວມ 1,38 % ແລະ ຄອບຄົວທຸກຍາກຍັງເຫຼືອ 536 ຄອບຄົວ ຫຼື ເທ່ົາກັບ 7,13 ບ້ານຂອງຄອບຄົວທັງໝົດ. ໃນໂອກາດທີ່ຢ້ຽມຢາມເມືອງວິລະບູລີ ທາງຄະນະໄດ້ລົງໄປເບີ່ງພື້ນຖານການຜະລິດຂອງເມືອງຈຳນວນນຶ່ງ ແລະ ໃນຕອນແລງຂອງວັນດຽວກັນທາງຄະນະໄດ້ໄປຢ້ຽມຢາມອຳນາດການປົກຄອງ ແລະ ພໍ່ແມ່ປະຊາຊົນເມືອງນອງຕື່ມອີກ. ພາຍຫຼັງທີ່ໄດ້ຮັບຟັງການລາຍງານຫຍໍ້ຂອງເມືອງແຕ່ລະເມືອງທ່ານໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດໄດ້ໃຫ້ກຽດໂອ້ລົມ ແລະ ມີຄຳເຫັນເນັ້ນໜັກບາງບັນຫາທີ່ຄະນະພັກແຂວງຕ້ອງໄດ້ເອົາໃຈໃສ່ພ້ອມກັນແກ້ໄຂ ກ່ອນ​ອື່ນ ທ່ານໄດ້​ກ່າວ​ຍ້ອງຍໍ​ຊົມ​ເຊີຍ ​ແລະ ຕີ​ລາຄາ​ສູງ ຕໍ່​ຜົນ​ສໍາ​ເລັດ ທີ່​ອຳນາດ​ການ​ປົກຄອງ ​ແລະ ປະຊາຊົນ ຊາວ​ເມືອງໄຊບູລີ ສາມາດ​ຍາດ​ມາ​ໄດ້​ໃນ​ໄລຍະ​ທີ່​ຜ່ານ​ມາ. ພ້ອມ​ທັງ ຍົກໃຫ້ເຫັນ ສະພາບການພັດທະນາທີ່ພົ້ນເດັ່ນ ແລະ ສິ່ງທ້າທາຍຕ່າງໆ ທີ່ປະເທດເຮົາກຳລັງປະເຊີນ ລວມທັງ ມູນເຊື້ອອັນດີງາມ ແລະ ທ່າແຮງໃນການພັດທະນາ ຂອງເມືອງ. ອັນສຳຄັນ ທ່ານໄດ້ເນັ້ນ​ໜັກ​ໃຫ້ການ​ນຳ​ຫຼັກ​ແຫຼ່ງ ​ແລະ ພາກສ່ວນ​ທີ່ກ່ຽວຂ້ອງ ​ເອົາ​ໃຈ​ໃສ່​ຕື່ມ​ບາງ​ດ້ານ ​ເປັນ​ຕົ້ນ ເອົາໃຈໃສ່ ລົງເລິກຄຸ້ມຄອງລາຄາສິນຄ້າ ດ້ວຍຄວາມເປັນເຈົ້າການ, ແທດເຖິງຕົວຈິງ ແລະ ກາຍເປັນແບບຢ່າງໃຫ້ແກ່ທ້ອງຖິ່ນອື່ນ ໂດຍຈຳກັດການນຳເຂົ້າສິນຄ້າທີ່ສາມາດຜະລິດໄດ້ຈາກພາຍໃນ, ສົ່ງເສີມການສ້າງມູນຄ່າໃຫ້ແກ່ຜະລິດຕະພັນພາຍໃນ ໂດຍສະເພາະແມ່ນຜົນຜະລິດຂອງປະຊາຊົນ.

2019-04-26

ປະຕິທິນ

May-2019
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ