ແນະນຳ ສນຊ (LFND)

ປະທານສູນກາງແນວລາວສ້າງຊາດເຂົ້າຮ່ວມຂະບວນຍ່າງເພື່ອສຸຂະພາບເນື່ອງໃນໂອກາດວັນກຳມະກອນສາກົນ ຄົບຮອບ 133 ປີ.

ຄະນະບໍລິຫານງານສູນກາງສະຫະພັນກໍາມະບານລາວ ຈັດກິດຈະກໍາຍ່າງເພື່ອສຸຂະພາບສະເຫຼີມສະຫຼອງວັນກໍາມະກອນສາກົນ (1 ພຶດສະພາ) ຄົບຮອບ 133 ປີ ຂຶ້ນໃນວັນທີ 1 ພຶດສະພາຜ່ານມາ ຢູ່ສວນປະຕູໄຊ ໂດຍມີທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ.

    ມີບັນດາທ່ານຜູ້ນໍາພັກ-ລັດ ຄະນະບໍລິຫານງານສູນກາງສະຫະພັນ ກໍາມະບານລາວ ພ້ອມດ້ວຍສະມາຊິກກໍາມະບານ, ກໍາມະກອນ, ຊາວຜູ້ອອກແຮງງານ ແລະ ຊາວນະຄອນຫຼວງເຂົ້າຮ່ວມຢ່າງຫຼວງຫຼາຍ. ໂອກາດນີ້ ທ່ານ ສີມູນ ອຸ່ນລາສີ ຮອງປະທານຄະນະບໍລິຫານງານສູນກາງສະຫະພັນກໍາມະບານລາວ ໄດ້ໃຫ້ກຽດເລົ່າຄືນເຖິງປະຫວັດແຫ່ງການກໍາເນີດ ການເຕີບໃຫຍ່ຂະຫຍາຍຕົວ ທາດແທ້ ແລະ ມູນເຊື້ອອັນສະຫງ່າງາມຂອງຂະບວນການກໍາມະກອນສາກົນ ກໍຄື ກໍາມະກອນລາວໃນແຕ່ລະໄລຍະ ຊຶ່ງວັນທີ 1 ພຶດສະພາ ແມ່ນວັນທີ່ມີຄວາມໝາຍທາງປະຫວັດສາດອັນໃຫຍ່ຫຼວງ ຂອງກໍາມະກອນທົ່ວໂລກ ຊຶ່ງໃນເມື່ອກ່ອນ ຊົນຊັ້ນກໍາມະກອນຕົກຢູ່ພາຍໃຕ້ການປົກຄອງຂອງນາຍທຶນ ຖືກກົດຂີ່ຂູດຮີດຢ່າງໜັກໜ່ວງ ບັງຄັບໃຫ້ເຮັດວຽກມື້ໜຶ່ງ 14-15 ຊົ່ວໂມງ ການອອກແຮງງານສຸດທີ່ລໍາບາກ ມີຄວາມສ່ຽງສູງຕໍ່ຊີວິດ ເນື່ອງຈາກລະບົບປ້ອງກັນໄພຂອງເຄື່ອງຈັກເວລານັ້ນບໍ່ທັນມີ ບວກກັບນາຍທຶນເພີ່ມທະວີການບັງຄັບຂົ່ມເຫັງ ໃຫ້ອອກແຮງງານໂດຍບໍ່ມີການພັກຜ່ອນ ອອກແຮງງານໜັກ ແຕ່ຄ່າແຮງງານຖືກ ສະຫວັດດີການ-ສັງຄົມບໍ່ມີ. ສະນັ້ນ ຈຶ່ງພາໃຫ້ເກີດມີຂໍ້ຂັດແຍ່ງຂຶ້ນ ແລະ ເປັນເງື່ອນໄຂໃຫ້ກໍາມະກອນ ແລະ ຊາວຜູ້ອອກແຮງງານຈັດຕັ້ງເປັນກຸ່ມ ເປັນຂະບວນ ລຸກຮື້ຂຶ້ນຕໍ່ສູ້ກັບຊົນຊັ້ນນາຍທຶນ ແນໃສ່ທວງໃຫ້ພວກນາຍທຶນເພີ່ມເງິນເດືອນ ຫຼຸດຜ່ອນຊົ່ວໂມງເຮັດວຽກລົງ ແລະ ຂະບວນການຕໍ່ສູ້ດັ່ງກ່າວເກີດຂຶ້ນກ່ອນໝູ່ໃນປະເທດອັງກິດ ລະຫວ່າງປີ 1764 ຈາກນັ້ນ ຂະບວນການຕໍ່ສູ້ຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານຈຶ່ງນັບມື້ມີການຂະຫຍາຍຕົວຢ່າງກວ້າງຂວາງໄປໃນທຸກໆປະເທດທົ່ວໂລກ. ຕໍ່ສະພາບການຄືແນວນັ້ນ ວັນທີ 1 ພຶດສະພາ 1889 ກອງປະຊຸມພັກກອມມູນິດສາ ກົນ ຄັ້ງທີ 2 ໄດ້ເປີດຂຶ້ນຢູ່ທີ່ນະຄອນຫຼວງປາຣີ ປະເທດຝຣັ່ງ ໂດຍຖືເອົາຄໍາຂວັນ ມື້ໜຶ່ງເຮັດວຽກ 8 ຊົ່ວໂມງ ກໍານົດເອົາວັນທີ 1 ພຶດສະພາ ປີ1886 ເປັນວັນກໍາມະກອນສາກົນ ນັບແຕ່ນັ້ນມາ ວັນທີ 1 ພຶສະພາ ຂອງທຸກໆປີ ຈຶ່ງໄດ້ກາຍເປັນວັນບຸນໃຫຍ່ຂອງຊົນຊັ້ນກໍາມະກອນໃນທົ່ວໂລກ. ສະເພາະໃນ ສປປ ລາວ ໃນທຸກໆປີ ຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ ກໍໄດ້ຈັດຕັ້ງງານໂຮມຊຸມນຸມໃຫຍ່ເພື່ອລະນຶກເຖິງມູນເຊື້ອສາມັກຄີຕໍ່ສູ້ ຂອງຊາວກໍາມະກອນ ເພື່ອເປັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ອອກແຮງງານ ທັງເປັນການປົກປັກຮັກສາສັນຕິພາບຂອງໂລກ, ເປັນຂີດໝາຍອັນສໍາຄັນຂອງຊົນຊັ້ນກໍາມະກອນ.

(ຂໍຂອບໃຈແຫຼ່ງຂໍ້ມູນຈາກ ໜັງສືພິມ ປະຊາຊົນ)

2019-05-03

ປະຕິທິນ

May-2019
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ