ແນະນຳ ສນຊ (LFND)

ກອງປະຊຸມຖອດຖອນບົດຮຽນວຽກງານສື່ມວນຊົນ

ກົມໂຄສະນາ-ອົບຮົມ ສູນກາງແນວລາວສ້າງຊາດ(ສນຊ) ຈັດກອງປະຊຸມຖອດຖອນບົດຮຽນວຽກງານສື່ມວນຊົນ ຂອງແນວລາວສ້າງຊາດ ຂຶ້ນໃນວັນທີ 14 ພຶດສະພາ 2019 ນີ້, ທີ່ ສນຊ, ໂດຍການເປັນປະທານຂອງທ່ານ ນາງ ຄຳຈັນ ພົມແສງສະຫວັນ ຮອງປະທານ ສູນກາງແນວລາວສ້າງຊາດ, ມີບັນດາທ່ານ ຫົວໜ້າ-ຮອງຫົວໜ້າຫ້ອງການ, ບັນດາກົມ, ສູນຝຶກອົບຮົມ ສນຊ, ບັນດາທ່ານ ຕາງໜ້າສື່ມວນຊົນຈາກພາກສ່ວນຕ່າງໆ ແລະ ພະນັກງານລັດຖະກອນ ຂອງ ສນຊ ເຂົ້າຮ່ວມ.

ທ່ານ ນາງ ແພງພັນ ບຸບຜາພອນ ຮອງຫົວໜ້າກົມໂຄສະນາ-ອົບຮົມ ສນຊ ໄດ້ຜ່ານບົດສະຫຼຸບການເຄື່ອນໄຫວວຽກງານສື່ມວນຊົນ ຂອງ ສນຊ ປະຈຳປີ 2018 ທີ່ຜ່ານມາ ແລະ ທິດທາງແຜນການເຄືື່ອນໄຫວໃນປີ 2019 ໂດຍສັງເຂບ ເຊິ່ງທ່ານໄດ້ຍົກໃຫ້ເຫັນປະຫວັດຄວາມເປັນມາ ແລະ ຜະລິດຕະພັນສື່ມວນຊົນ ຂອງ ສນຊ ມີ: ວາລະສານລາວສ້າງຊາດ, ລາຍການວິທະຍຸ ເມືອງລາວຄົນລາວ, ລາຍການໂທລະພາບ ລາວສ້າງຊາດ, ໜັງສືພິມສາມັກຄີພັດທະນາ, ເວັບໄຊ, ເຟັກບຸກ ແລະ ຊ່ອງຢູທູບ;  ເຊິ່ງມີດ້ານດີ-ດ້ານອ່ອນ, ມີການປະສານສົມທົບ ແລະ ການຮ່ວມມືກັບພາກສ່ວນຕ່າງໆ ກ່ຽວກັບວຽກງານສື່ມວນຊົນ. ພ້ອມກັນນີ້, ບັນດາສື່ຈາກພາກສ່ວນຕ່າງໆ ກໍໄດ້ມີການປະກອບຄຳຄິດຄຳເຫັນແລກປ່ຽນບົດຮຽນກ່ຽວກັບວຽກງານສື່ມວນຊົນເຊິ່ງກັນ ແລະ ກັນ ຢ່າງກົງໄປກົງມາ.

ທ່ານ ຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວ ໃນໄລຍະຜ່ານມາ ຂອງກົມໂຄສະນາ-ອົບຮົມ ສູນກາງແນວລາວສ້າງຊາດ ແລະ ສະແດງຄວາມຂອບໃຈຕໍ່ບັນດາທ່ານຕາງໜ້າສື່ຕ່າງໆ ທີ່ໄດ້ປະກອບຄຳຄິດຄຳເຫັນຕໍ່ກອງປະຊຸມຄັ້ງນີ້ ເຊິ່ງຈະເປັນບົດຮຽນທີ່ສຳຄັນ ໃນການນຳໄປຄົ້ນຄວ້າປັບປຸງວຽກງານສື່ມວນຊົນ ຂອງແນວລາວສ້າງຊາດ ໃຫ້ດີຂຶ້ນ ແລະ ທ່ານ ຍັງໄດ້ເນັ້ນຕື່ມວ່າ ໃຫ້ພະນັກງານທີ່ເຮັດວຽກງານຂ່າວ ຕ້ອງເພີ່ມຄວາມເປັນເຈົ້າການ ແລະ ມີຈັນຍາບັນຂອງນັກຂ່າວ  ໂດຍສະເພາະ ພະນັກງານສັງກັດຢູ່ກົມໂຄສະນາ-ອົບຮົມ ຈົ່ງເອົາໃຈໃສ່ຄົ້ນຄວ້າ, ສຶກສາຮ່ຳຮຽນ, ຍົກລະດົບຄວາມສາມາດໃນການຜະລິດສື່ ໃຫ້ເປັນກະບອກສຽງອັນແຫຼມຄົມ ເພື່ອເຜີຍແຜ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ສູ່ສັງຄົມໃຫ້ທົ່ວເຖິງ ແລະ ກວ້າງຂວາງ.

2019-05-15

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ