ແນະນຳ ສນຊ (LFND)

ພິທີເຊັນສັນຍາໂຄງການເຊື່ອມຕໍ່ ຮ່ວມການຜະລິດ ແລະ ບໍລິໂພກຜະລິດຕະພັນໝາກໄມ້

       ເພື່ອເປັນການປະກອບສ່ວນສົ່ງເສີມ ແລະ ຊຸກຍູ້ໃຫ້ປະຊາຊົນບັນດາຊົນເຜົ່າ ຢູ່ແຂວງຫົວພັນ ເວົ້າລວມ ເວົ້າສະເພາະ ແມ່ນປະຊາຊົນບັນດາເຜົ່າຢູ່ເມືອງຊຽງຄໍ້, ເມືອງສົບເບົາ ແລະ ເມືອງວຽງໄຊ ເຂົ້າຮ່ວມຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ ເຮັດໃຫ້ຊີວິດການເປັນຢູ່ຂອງປະຊາຊົນລຸດພົ້ນອອກຈາກຄວາມດ້ອຍພັດທະນາເປັນກ້າວໆ. ໃນວັນທີ 26 ພຶດສະພາ 2019 ນີ້, ທີ່ໂຮງແຮມ ຄາວພຣາຊາ, ນະຄອນຫຼວງວຽງຈັນ, ໄດ້ມີພິທີເຊັນສັນຍາຮ່ວມມື ລະຫວ່າງ ບໍລິສັດ ໄພບຸນການຄ້າຂາອອກ-ຂາເຂົ້າຈໍາກັດ ສປປ ລາວ ແລະ ສະຫະກອນຫງອັກລານ ສສ ຫວຽດນາມ ກ່ຽວກັບການເຊື່ອມຕໍ່ຮ່ວມການຜະລິດ ແລະ ບໍລິໂພກຜະລິດຕະພັນໝາກໄມ້.

        ຕາງໜ້າ ຝ່າຍບໍລິສັດໄພບຸນການຄ້າຂາເຂົ້າ-ຂາອອກຈໍາກັດ ມີທ່ານ ນ. ແສງດາວ ບຸພະກອນຄໍາປະທານສະພາບໍລິຫານບໍລິສັດໄພບຸນການຄ້າຂາອອກ-ຂາເຂົ້າ, ທ່ານສີວິໄລ ພົມມະຈັກ ຮັກສາການຜູ້ອໍານວຍການບໍລິສັດພົງສະຫວັນຈໍາກັດ.
ຕາງໜ້າຈາກສະຫະກອນຫງອັກລານ ສສ ຫວຽດນາມ ມີ ທ່ານ ຫງວຽນຫງອັກຢູ້ງ ປະທານສະພາບໍລິຫານຜູ້ອໍານວຍການສະຫະກອນ ພ້ອມດ້ວຍພະນັກງານ ຂອງສະຫະກອນເຂົ້າຮ່ວມ; ໂດຍຊ່ອງໜ້າຈາກ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີທ່ານ ເອກອັກຄະລັດຖະທູດ ສສ ຫວຽດນາມ ປະຈໍາ ສປປລາວ, ມີບັນດາທ່ານຮອງປະທານສູນກາງແນວລາວສ້າງຊາດ ແລະ ແລະ ທ່ານ ຄໍາຜິວ ວົງສະຫວັນ ຮອງເລຂາພັກແຂວງ, ປະທານແນວລາວສ້າງຊາດ ແຂວງຫົວພັນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ຈຸດປະສົງຕົ້ນຕໍໃນພິທີເຊັນສັນຍາຄັ້ງນີ້, ເພື່ອເປັນການຊື້-ຂາຍ ແລະນໍາເຂົ້າປະເພດພຶດກະສິກໍາຕົ້ນໄມ້ກິນໝາກຈາກ ແຂວງເຊິນລາ, ສສ ຫວຽດນາມ ມາໃຫ້ປະຊາຊົນປູກຢູ່ເມືອງຊຽງຄໍ້, ເມືອງສົບເບົາ ແລະ ເມືອງວຽງໄຊແຂວງຫົວພັນ, ຊີ່ງສະຫະກອນຫງອັກລານເປັນຜູ້ຕອບສະໜອງແນວພັນຕົ້ນໄມ້ກິນໝາກໃຫ້ແກ່ບໍລິສັດ ໄພບຸນການຄ້າຂາເຂົ້າ-ຂາອອກຈໍາກັດ ພ້ອມທັງຂົນສົ່ງແນວພັນຕົ້ນໄມ້ກິນໝາກໃຫ້ຮອດບັນດາບ້ານ ຂອງແຕ່ລະເມືອງທີ່ເປັນສະຖານທີ່ປູກຕົ້ນໄມ້ໃຫ້ໝາກ ແລະ ສະຫະກອນຫງອັກລານເປັນຜູ້ຮັບຊື້ຜົນຜະລິດທີ່ເກີດຈາກຕົ້ນໄມ້ກິນໝາກຄືນ.
ແນວພັນຕົ້ນໄມ້ທັງໝົດມີ: ຈໍານວນ 100.000ຕົ້ນ; ໃນນີ້, ຕົ້ນໝາກມ່ວງມີ 30.000ຕົ້ນ, ໝາກລໍາໄຍມີ 30.000ຕົນ ແລະ ໝາກພຸກມີ 40.000ຕົ້ນ; ສ່ວນດ້ານເຕັກນິກ ແລະ ການຝຶກອົບຮົມ ແມ່ນສະຫະກອນເປັນຜູ້ຖ່າຍທອດຄວາມຮູ້ດ້ານເຕັກນິກ, ວິຊາການ ແລະ ຝຶກອົບຮົມໃຫ້ປະຊາຊົນ ເລີ່ມແຕ່ຂັ້ນຕອນປູກ, ການປົກປັກຮັກສາ, ຈົນເຖີງເວລາເກັບໝາກ ສະຫະກອນເປັນຜູ້ຮັບຊື້ຈາກປະຊາຊົນ.
ຊີ່ງໂຄງການດັ່ງກ່າວນີ້ ມີຜົນປະໂຫຍດໃນການແກ້ໄຂຊີວິດການເປັນຢູ່ຂອງປະຊາຊົນບັນດາຊົນເຜົ່າ ທີ່ດໍາລົງຊີວິດຢູ່ເມືອງຊຽງຄໍ້, ເມືອງສົບເບົາ ແລະ ເມືອງວຽງໄຊ ແຂວງຫົວພັນ ເພື່ອພັດທະນາຊີວິດການເປັນຢູ່ຂອງປະຊາຊົນລຸດພົ້ນອອກຈາກຄວາມທຸກຍາກເປັນກ້າວໆ ແລະ ເປັນການເສີມຂະຫຍາຍສາຍພົວພັນຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວໃຫ້ມີບາດກ້າວໃໝ່ເລື້ອຍໆ.

2019-05-27

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ