ແນະນຳ ສນຊ (LFND)

ສໍານັກງານພະພຸດທະສາສະໜາແຫ່ງຮາຊະອານາຈັກໄທ ສໍາເລັດການຢ້ຽມຢາມ ແລະ ເຮັດວຽກຢູ່ ສປປ ລາວ

ຄະນະຜູ້ແທນ ສໍານັກງານພະພຸດທະສາສະໜາ ແຫ່ງຮາຊະອານາຈັກໄທ ນໍາໂດຍທ່ານ ສິບບົວວອນ ແກ້ວງາມ ຜູ້ກວດລາຊະການສໍານັກງານພະພຸດທະສາສະໜາ ແຫ່ງຊາດ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນອາທິດຜ່ານມານີ້.

ການມາຢ້ຽມຢາມຂອງຄະນະຜູ້ແທນ ສໍານັກງານພະພຸດທະສາສະໜາ ແຫ່ງຮາຊະອານາຈັກໄທ ໃນຄັ້ງນີ້ ໄດ້ມີການພົບປະແລກປ່ຽນບົດຮຽນສອງຝ່າຍ ລະຫວ່າງ ສູນກາງແນວລາວສ້າງຊາດ ແລະ ສໍານັກງານພະພຸດທະສາສະໜາ ແຫ່ງ ຮາສະອານາຈັກໄທ ເຊິ່ງຝ່າຍລາວນໍາໂດຍ ທ່ານ ບຸນທະວີ ພອນທະສິນ ຮອງຫົວໜ້າກົມສາສະໜາ ສູນກາງແນວລາວສ້າງຊາດ; ຝ່າຍ ຮາຊະອານາຈັກໄທ ນໍາໂດຍ ທ່ານ ສິບບົວວອນ ແກ້ວງາມ ຜູ້ກວດລາຊະການສໍານັກງານພະພຸດທະສາສະໜາ ແຫ່ງຊາດ ທີ່ສູນກາງແນວລາວສ້າງຊາດ. ເຊິ່ງກ່ອນອື່ນ ທັງສອງຝ່າຍໄດ້ລາຍງານສະພາບລວມຂອງວຽກງານສາສະໜາ ແລະ ສະພາບລວມຂອງ 2 ປະເທດ ໃຫ້ກັນ ແລະ ກັນຊາບ. ການພົບປະໃນຄັ້ງນີ້ ແມ່ນເພື່ອເປັນການທົບທວນຄືນການຈັດຕັ້ງປະຕິບັດວຽກງານທີ່ຜ່ານມາທີ່ໄດ້ເຊັນບົດບັນທຶກຮ່ວມມືນຳກັນແຕ່ປີ 2010 ຂອງການພົວພັນລະ ຫວ່າງ ອົງການພຸດທະສາສະໜາລາວ ແລະ ມະຫາເຖລະສະມາຄົມແຫ່ງລາຊະອານາຈັກໄທ. ພ້ອມກັນນີ້, ທັງສອງຝ່າຍໄດ້ປຶກສາຫາລືກັນ ສືບຕໍ່ຮ່ວມມືໃນການພົວພັນເຖິງວຽກງານສາສະໜາດ້ວຍຫລາຍຮູບການ, ​ເພີ່ມ​ທະວີ​ການ​ຮ່ວມ​ມື ​ແລະ ການ​ຊ່ວຍ​ເຫລືອ​ເຊິ່ງກັນ ​ແລະ ກັນ, ນອກຈາກນັ້ນ ຍັງໄດ້ປຶກສາຫາລື, ຊຸກຍູ້ການແລກປ່ຽນ ແລະ ການຈັດຝຶກອົບຮົມດ້ານວິຊາການທາງພຸດທະສາສະໜາ, ການໄປທັດສະນະສຶກສາເບິ່ງກິດຈະກໍາພົ້ນເດັ່ນ ໃຫ້ແກ່ພະສົງ, ຄາລະວາດ ແລະ ການຊ່ວຍເຫຼືອກໍ່ສ້າງບໍາລຸງບຸກຄະລາກອນສົງ ຫຼື ຄາລະວາດ ຜູ້ທີ່ເຮັດວຽກສາສະໜາໃຫ້ມີຄວາມຮູ້, ຄວາມສາມາດສູງຂຶ້ນ. ພ້ອມດຽວກັນນັ້ນ ຄະນະຜູ້ແທນ ສໍານັກງານພະພຸດທະສາສະໜາ ແຫ່ງຮາຊະອານາຈັກໄທ ໄດ້ເຂົ້າຢ້ຽມຂໍ່ານັບທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດຕື່ມອີກ.

          ໃນໂອກາດມາ ສປປ ລາວ ໃນຄັ້ງນີ້ ຄະນະຜູ້ແທນ ສໍານັກງານພະພຸດທະສາສະໜາ ແຫ່ງຮາຊະອານາຈັກໄທ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ ແຂວງ ວຽງຈັນ ໄດ້ເຮັດວຽກກັບແນວລາວສ້າງຊາດແຂວງ, ຢ້ຽມຢາມໂຮງຮຽນມັດທະຍົມສົງ ແລະ ທ່ຽວຊົມສະຖານທີ່ທ່ອງທ່ຽວຈໍານວນໜຶ່ງຂອງເມືອງວັງວຽງຕື່ມອີກ.

2019-06-10

ປະຕິທິນ

Jun-2019
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ