ແນະນຳ ສນຊ (LFND)

ປາຖະກະຖາ 3 ວັນປະຫວັດສາດ

ວັນທີ 18 ມິຖຸນາ 2019 ນີ້, ສູນກາງແນວລາວສ້າງຊາດ(ສນຊ) ໄດ້ຈັດພິທີປຖຖະກະຖາວັນຜ່າວົງປິດລ້ອມກອງພັນທີ 2 ວິລະຊົນ ຄົບຮອບ 60 ປີ, ວັນແຫກຄຸກໂພນເຄັງຢ່າງມະຫັດສະຈັນຂອງຜູ້ນຳພັກ-ແນວລາວຮັກຊາດ ຄົບຮອບ 59 ປີ ແລະ ວັນໄຊຊະນະບັ້ນຮົບດຽນບຽນຟູ ຄົບຮອບ 65 ປີ, ເປັນກຽດປາຖະກະຖາໂດຍ ທ່ານ ສຈ.ປອ. ພັນດວງຈິດ ວົງສາ ອາດີດກຳມະການສູນກາງພັກ, ອາດີດປະທານສູນກາງແນວລາວສ້າງຊາດ,

      ເປັນກຽດເຂົ້າຮ່ວມມີ ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ມີບັນດາທ່ານຮອງປະທານ ສນຊ, ກຳມະການ ສນຊ ອ້ອມຂ້າງສູນກາງ, ຄະນະທີ່ປຶກສາວຽກງານແນວລາວສ້າງຊາດ, ຫົວໜ້າ-ຮອງຫົວໜ້າຫ້ອງການ, ບັນດາກົມ, ສູນຝຶກອົບຮົມ ສນຊ, ພະນັກງານ-ລັດຖະກອນ ສນຊ ແລະ ສະມາຊິດຊາວໜຸ່ມຂອງອົງການຈັດຕັ້ງມະຫາຊົນເຂົ້າຮ່ວມ.
ທ່ານ ໄດ້ຫວນຄືນການຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ໃນຄ່ຳຄືນຂອງວັນທີ 18 ພຶດສະພາ 1959 ເຊິ່ງທ່ານໄດ້ຍົກໃຫ້ເຫັນຄວາມໝາຍຄວາມສຳຄັນ ແລະ ປັດໄພື້ນຖານການຜ່າວົງປິດລ້ອມຂອງກອງພັນທີ່ 2, ເຊິ່ງແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດເຮົາ ທີ່ຢູ່ໃຕ້ການນຳພາຂອງພັກ, ເປັນເຫດການປະຫວັດສາດອັນສຳຄັນຂອງຊາດ, ຂອງພັກ, ຂອງກອງທັບເຮົາ ແລະ ບົດຮຽນອັນລ້ຳຄ່າທີ່ສຸດໃຫ້ແກ່ຂະບວນການຕໍ່ສູ້ຂອງກອງທັບ ແລະ ປະຊາຊົນເຮົາ ຍາດເອົາໄຊຊະໃນແຕ່ລະໄລຍະ; ການຜ່າວົງປິດລ້ອມໄດ້ຢ່າງມີໄຊນັ້ນ ຍ້ອນມີການນຳພາອັນຖຶກຕ້ອງສະຫຼາດສ່ອງໃສ ຂອງພັກປະຊາຊົນປະຕິວັດລາວ, ຍ້ອນພະນັກງານ, ສະມາຊິກພັກ ແລະນັກຮົບກອງພັນທີ 2 ໄດ້ຮັບສຶກສາອົບຮົມການເມືອງ-ແນວຄິດ ເປັນຢ່າງດີ; ຍ້ອນມີການຈັດຕັ້ງນຳພາບັນຊາທີ່ໜັກແໜ້ນ, ເດັດດ່ຽວ, ເດັດຂາດ, ເສີມຂະຫຍາຍຫົວຄິດປະດີດສ້າງຂອງໝົດທຸກຄົນ, ກຳແໜ້ນກາລະໂອກາດອັນເໝາະສົມ ແລະ ມີວິທີຫຼອກລວງສັດຕູຢ່າງມີໄຫວພິບ ແລະ ຍ້ອນໄດ້ຮັບການສະໜັບສະໜູນຊ່ວຍເຫຼືອໝົດຈິດໝົດໃຈຈາກກອງທັບ ແລະ ປະຊາຊົນຫວຽດນາມ. ທ່ານ ໄດ້ຫວນຄືນວິລະກໍາໂຕນຄຸກຢ່າງມະຫັດສະຈັນ ຂອງບັນດາທ່ານຜູ້ນໍາພັກ-ແນວລາວຮັກຊາດ ໃນວັນທີ 24 ພຶດສະພາ 1960, ທ່ານໄດ້ຍົກໃຫ້ເຫັນສະພາບ ແລະ ການເຄື່ອນໄຫວປະຕິວັດຂອງບັນດາທ່ານຜູ້ນຳພັກ ແລະ ແນວລາວຮັກຊາດ ໃນໄລຍະປີ 1957-1959, ແຜນການໂຕນອອກຈາກຄຸກ, ການກະກຽມໂຕນອອກຈາກຄຸກ ແລະ ສາເຫດການໂຕນຄຸກຢ່າງມະຫັດຈັນ ຂອງບັນດາຜູ້ນຳໄປສູ່ເຂດທີ່ໝັ້ນປະຕິວັດຢ່າງປອດໄພ ຍ້ອນການນຳພາອັນສະຫຼາດສ່ອງໃສ ແລະ ປີຊາສາມາດພັກ ແລະ ຜູ້ນຳອື່ນໆ ທີ່ມີນໍ້າໃຈຮັກຊາດອັນແຮງກ້າ, ທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫຼະ, ຍ້ອນຫຼາຍປັດໃຈທີ່ສ້າງເງື່ອນໄຂ ແລະ ອຳນວຍຄວາມສະດວກໃຫ້ບັນດາຜູ້ນຳເຮົາໄດ້ໂຕນອອກຈາກຄຸກຂອງສັດຕູ ດ້ວຍຄວາມປອດໄພ. 
ພ້ອມກັນນີ້, ທ່ານ ກໍໄດ້ຫວນຄືນວັນໄຊຊະນະບັ້ນຮົບດຽນບຽນຟູ ໃນວັນທີ 7 ພຶດສະພາ 1954 ຂອງກອງທັບ ແລະ ປະຊາຊົນຫວຽດນາມ ແລະ ທ່ານໄດ້ຍົກໃຫ້ເຫັນການຕໍ່ສູ້ຕ້ານການຮຸກຮານຂອງຈັກກະພັດພາຍນອກ ຂອງປະຊາຊົນຫວຽດນາມ ທີ່ມີກຽດສະຫງ່າ, ໄດ້ຖືກບັນທຶກເຂົ້າໃນປະຫວັດສາດ ຂອງຊາດ ກໍຄືຂອງໂລກ, ມັນໄດ້ເຮັດໃຫ້ສັດຈະທຳມີຄວາມສະຫວ່າງສະໄຫວຂຶ້ນ ຢູ່ໃນຊາດໜຶ່ງທີ່ເຄີຍເປັນຫົວເມືອງຂຶ້ນ. ໄຊຊະນະດຽນບຽນຟູ ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມສຳພັນສູ້ຮົບ ຮ່ວມຂຸມຄອງຕ້ານສັດຕູໂຕດຽວກັນ ເພື່ອປົດປ່ອຍຕົວເອງ, ໄຊຊະນະດັ່ງກ່າວໄດ້ດັບມອດເຈດຈໍານົງ ແລະ ການຮຸກຮານຂອງລັດທິລ່າເມືອງຂຶ້ນ. ໄຊຊະນະດຽນບຽນຟູເປັນຄວາມເອກອ້າງທະນົງໃຈ ຂອງປະຊາຊົນຫວຽດນາມ ທັງເປັນແວ່ນແຍງອັນໃສແຈ້ງໃຫ້ແກ່ບັນດາປະຊາຊາດ ທີ່ຕົກເປັນຫົວເມືອງຂຶ້ນ ເພື່ອລຸກຂຶ້ນຕໍ່ສູ້ໃນໄລຍະນັ້ນ.
ພິທີປາຖະກະຖາຄັ້ງນີ້, ເພື່ອເປັນການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ສູນກາງແນວລາວສ້າງຊາດ ໄດ້ຮັບຮູ້, ເຊື່ອມຊຶມ ແລະ ກໍາແໜ້ນກ່ຽວກັບບັນດາຜົນງານຂອງຜູ້ນຳພັກ-ລັດ, ບັນດາວິລະບຸລຸດ ໃນການຕໍ່ສູ້ຕ້ານຈັກກະພັດພວກລ່າເມືອງຂຶ້ນແບບເກົ່າ ແລະ ແບບໃໝ່; ທັງເປັນການສຶກສາອົບຮົມ, ຮໍ່າຮຽນເອົາມູນເຊື້ອຮັກຊາດ, ຄວາມສາມັກຄີ, ນ້ຳໃຈຕໍ່ສູ້ກູ້ຊາດບໍ່ຍອມຈຳນົນອັນພິລະອາດຫານ, ນຳໃຈເສຍສະຫຼະອັນສູງສົ່ງຂອງຜູ້ນຳພັກ-ລັດ ທີ່ມີຕໍ່ປະເທດຊາດ.

2019-06-20

ປະຕິທິນ

Oct-2019
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ