ແນະນຳ ສນຊ (LFND)

ກອງປະຊຸມໃຫຍ່ ຄັ້ງທີ VII ຂອງສະຫະພັນກຳມະບານ ສນຊ

    ສະຫະພັນກຳມະບານ ສູນກາງແນວລາວສ້າງຊາດ ໄດ້ຈັດກອງປະຊຸມໃຫຍ່ ຄັ້ງທີ VII ຂຶ້ນໃນວັນທີ 28 ມິຖຸນາ 2019 ທີ່ສູນກາງແນວລາວສ້າງຊາດ, ໂດຍການເປັນປະທານຂອງ ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ, ປະທານສະຫະພັນກຳມະບານສູນກາງແນວລາວສ້າງຊາດ, ເປັນກຽດເຂົ້າຮ່ວມໂດຍ ທ່ານ ສີມູນ ອຸ່ນລາສີ ຮອງເລຂາຄະນະພັກ, ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ມີ ທ່ານ ນາງ ຄຳຈັນ ພົມແສງສະຫວັນ ຄະນະປະຈຳພັກ, ຮອງປະທານສູນກາງແນວລາວສ້າງຊາດ, ມີບັນດາທ່ານຄະນະພັກ ສນຊ, ຄະນະບໍລິຫານງານສະຫະພັນກຳມະບານ ສນຊ, ຫົວໜ້າ-ຮອງຫົວໜ້າໜ່ວຍກຳມະບານ ແລະ ສະມາຊິກກຳມະບານ ສນຊ ເຂົ້າຮ່ວມ.

    ໂອກາດນີ້, ໄດ້ຮັບຟັງການຜ່ານບົດລາຍຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ແຕ່ປີ 2014-2018 ແລະ ທິດທາງ 5 ປີຕໍ່ໜ້າ 2019-2023 ຂອງສະຫະພັນກຳມະບານ ສູນກາງແນວລາວສ້າງຊາດ ໂດຍຫຍໍ້ ເຊິ່ງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນ ຄື: ໄດ້ສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກກຳມະບານ ເປັນຕົ້ນເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປາຖະກະຖາມູນເຊື້ອຂອງຊາດ, ຂອງພັກ, ຂອງລັດ, ຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ເຮັດໃຫ້ສະມາຊິກກຳມະບານ ຂອງ ສນຊ ມີຄວາມອຸ່ນອ່ຽງທຸ່ນທ່ຽງ ແລະ ໄດ້ຍົກໃຫ້ເຫັນວຽກງານກົງຈັກການຈັດຕັ້ງ ແລະ ແບບແຜນວິທີເຮັດວຽກ, ວຽກງານປົກປ້ອງສິດ ແລະ ຜົນປະໂຫຍດຂອງພະນັກງານລັດຖະກອນທີ່ເປັນສະມາຊິກກຳມະບານ, ວຽກງານວິຊາສະເພາະ ແລະ ຂະບວນການຕ່າງໆ. ພ້ອມກັນນີ້, ກໍໄດ້ມີການປະກອບຄຳຄິດຄຳເຫັນຂອງຕາງໜ້າຮາກຖານກຳມະບານ ແລະ ການປະກອບຄຳຄິດຄຳເຫັນຂອງອົງການຈັດຕັ້ງມະຫາຊົນ ສນຊ; ຮັບຟັງການຜ່ານບົດສຳຫຼວດການນຳພາຂອງສະຫະພັນກຳມະບານ ສນຊ ໃນໄລຍະຜ່ານມາ, ຜ່ານເງື່ອນໄຂມາດຕະຖານຜູ້ສະໝັກເປັນຄະນະບໍລິຫານງານສະພັນກຳມະບານ ຊຸດໃໝ່ ແລະ ໄດ້ປ່ອນບັດເລືອກຕັ້ງຄະນະບໍລິຫານງານສະຫະພັນກຳມະບານ ຊຸດໃໝ່ ຈຳນວນ 7 ທ່ານ, ເຊິ່ງກອງປະຊຸມປະຖົມມະລຶກຂອງຄະນະບໍລິຫານງານສະຫະພັນກໍາມະບານ ໄດ້ຕົກລົງເລືອກຕັ້ງ ທ່ານ ຄຳຢາດ ລາດສະດາວົງ ຫົວໜ້າກົມຈັດຕັ້ງ-ພະນັກງານ ເປັນປະທານສະຫະພັນກຳມະບານ ສູນກາງແນວລາວສ້າງຊາດ, ຮອງປະທານ 2 ທ່ານ ແລະ ຄະນະກຳມະການສະຫະພັນກຳມະບານ 4 ທ່ານ. 
ທ່ານ ສີມູນ ອຸ່ນລາສີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວ ຂອງສະຫະພັນກຳມະບານ ສນຊ ໃນໄລຍະຜ່ານມາ ແລະ ທ່ານໄດ້ເນັ້ນຕື່ມວ່າ: ໃຫ້ເອົາໃຈໃສ່ເພີ່ມທະວີສຶກສາອົບຮົມການເມືອງ-ແນວຄິດ ແລະເຕົ້າໂຮມຄວາມສາມັກຄີໃຫ້ແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານຕະຫຼອດຮອດປະຊາຊົນລາວບັນດາເຜົ່າ, ສືບຕໍ່ຂະຫຍາຍການຈັດຕັ້ງ ແລະສະມາຊິກກຳມະບານໃຫ້ກວ້າງຂວາງ, ຕັ້ງໜ້າເຄື່ອນໄຫວປົກປ້ອງສິດ ແລະຜົນປະໂຫຍດຂອງສະມາຊິກກຳມະບານ, ກຳມະກອນ, ຊາວຜູ້ອອກແຮງງານ ແລະ ປະຊາຊົນລາວບັນດາເຜົ່າ ໃຫ້ທົ່ວເຖີງ ແລະ ປຸກລະດົມຊຸກຍູ້ສະມາຊິກກຳມະບານ ໃນການປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ. ໃນນີ້, ຄະນະບໍລິຫານງານສູນກາງສະຫະພັນກຳມະບານລາວ ກໍໄດ້ມອບຫຼຽນກາກຳມະບານ ໃຫ້ຄະນະສະຫະພັນກຳມະບານ ສນຊ ແລະ ມອບໃບຊົມເຊີຍຂອງ ທ່ານ ປະທານ ສູນກາງສະຫະພັນກຳມະບານລາວໃຫ້ຮາກຖານສະຫະພັນກຳມະບານ ສນຊ. ນອກຈາກນັ້ນ, ກໍໄດ້ມອບໃບຍ້ອງຍໍໃຫ້ຜູ້ທີ່ມີຜົນງານດີເດັ່ນປະເພດໜຶ່ງ 66 ທ່ານ ແລະ ປະເພດສອງ 56 ທ່ານ ຕື່ມອີກ.

2019-06-29

ປະຕິທິນ

Jul-2019
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ