ແນະນຳ ສນຊ (LFND)

ພິທີ ມອບ-ຮັບ ໜ້າທີ່ຊີ້ນໍາຂອງບັນດາທ່ານຮອງປະທານ ສນຊ

ໃນວັນທີ 3 ກໍລະກົດ 2019 ນີ້, ທີ່ສູນກາງແນວລາວສ້າງຊາດ ໄດ້ຈັດພິທີ ມອບ-ຮັບ ໜ້າທີ່ຊີ້ນໍາ ລະຫວ່າງບັນດາທ່ານຮອງປະທານ ສູນກາງແນວລາວສ້າງຊາດ (ສນຊ) ໂດຍເປັນກຽດເຂົ້າຮ່ວມຂອງທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານ ສນຊ, ມີບັນດາທ່ານຮອງປະທານ ສນຊ, ບັນດາຫົວໜ້າ-ຮອງຫົວໜ້າກົມ, ຫ້ອງການ, ສູນ ແລະ ຕະຫຼອດຮອດພະນັກງານ-ລັດຖະກອນ ສນຊ ເຂົ້າຮ່ວມ.

ໂດຍປະຕິບັດຕາມມະຕິຕົກລົງ ສະບັບເລກທີ 33 /ຄພ.ສນຊ. ລົງວັນທີ 11/6/2019 ວ່າດ້ວຍການແບ່ງຄວາມຮັບຜິດຊອບຊີ້ນໍາຂອງຄະນະພັກສູນກາງແນວລາວສ້າງຊາດ ໄດ້ຕົກລົງສັບຊ້ອນການຊີ້ນໍາຂອງບັນດາທ່ານຮອງປະທານ ສນຊ ຄື: ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານ ສນຊ ຊີ້ນໍາກົມຊົນເຜົ່າ; ທ່ານ ນ. ຄໍາຈັນ ພົມແສງສະຫວັນ ຄະນະປະຈໍາພັກ, ຮອງປະທານ ສນຊ ຊີ້ນໍານໍາກົມກວດກາ, ສູນຝຶກອົບຮົມ, ໂຄງການພັດທະນາຢູ່ເມືອງລ້ອງຊານ ແຂວງໄຊສົມບູນ ແລະ ຫົວໜ້າຄະນະປະສານງານລະຫວ່າງຄະນະປະຈໍາ ສູນກາງແນວລາວສ້າງຊາດ ກັບຄະນະປະຈໍາ ສະພາແຫ່ງຊາດ ຕາມຂໍ້ຕົກລົງ ສະບັບເລກທີ 01/ຄປຈ, ລົງວັນທີ 22/5/2019; ທ່ານ ຄໍາຫຼ້າ ລິ້ງນະສອນ, ຄະນະພັກ, ຮອງປະທານ ສນຊ ຊີ້ນໍາກົມຈັດຕັ້ງ ແລະ ພະນັກງານ; ທ່ານ ຈັນທະວົງ ແສນອາມາດມົນຕີ, ຄະນະພັກ, ຮອງປະທານ ສນຊ ຊີ້ນໍາກົມໂຄສະນາ-ອົບຮົມ, ວຽກງານປະຫວັດສາດ-ຫໍມູນເຊື້ອ ແລະ ໜັງສືພິມສາມັກຄີພັດທະນາ; ທ່ານ ຮສ.ດຣ ສົມອົກ ກິ່ງສະດາ ຄະນະພັກ, ຮອງປະທານ ສນຊ ຊີ້ນໍາກົມສາສະໜາ, ເປັນຄະນະລະດັບຊາດພົວພັນຄົນເຊື້ອຊາດລາວຢູ່ຕ່າງປະເທດ, ສືບຕໍ່ຊີ້ນໍາບັນດາໂຄງການຮ່ວມມືກັບຢູນີເຊັບ, ອາຫານໂລກ ແລະ UPF; ທ່ານ ເຍ່ຍເກີຢາ ໜໍຈໍຈົງຕົວ, ຄະນະພັກ, ຮອງປະທານ ສນຊ ຊີ້ນໍາກົມຊັ້ນຄົນ ແລະ ອົງການຈັດຕັ້ງສັງຄົມ, ສືບຕໍ່ເປັນຄະນະຮັບຜິດຊອບຄົ້ນຄວ້າຮີດຄອງປະເພນີຊົນເຜົ່າມົ້ງ ແລະ ໂຄງການຮ່ວມມືກັບກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ.
ໃນພິທີບັນດາທ່ານຮອງປະທານ ທີ່ຖືກສັບຊ້ອນໄປຮັບໜ້າທີ່ຊີ້ນໍາວຽກໃໝ່ໄດ້ຂຶ້ນຜ່ານບົດລາຍງານຫຍໍ້ຜົນສໍາເລັດໃນການນໍາພາໄລຍະເຄີ່ງສະໄໝຜ່ານມາ ແລະ ວຽກຍັງຄ້າງຄາທີ່ເປັນຈຸດສຸມ ແລະ ປົກກະຕິເພື່ອມອບໃຫ້ຮອງປະທານຜູ້ໃໝ່ສືບຕໍ່ນໍາພາຕໍ່ໄປ. 
ໃນພິທີອັນມີຄວາມສໍາຄັນນີ້, ທ່ານ ປອ ໄຊສົມພອນ ພົມວິຫານ ໄດ້ໃຫ້ກຽດໂອ້ລົມຕໍ່ພິທີ ເຊິ່ງກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຕົກລົງເອກະພາບກັນໃນການປັບປູງສັບຊ້ອນຄັ້ງນີ້ ເພື່ອແນໃສ່ໃຫ້ກົງຈັກມີຄວາມເຂັ້ມແຂງຂຶ້ນ. ພ້ອມກັນນັ້ນ, ທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານຜົນສໍາເລັດຂອງບັນດາທ່ານຮອງປະທານ ທີ່ໄດ້ເອົາໃຈໃສ່ຊີ້ນໍາໆພາວຽກງານຂອງຕົນຕາມພາລະບົດບາດ ໄດ້ມີຜົນງານພົ້ນເດັ່ນຫຼາຍດ້ານຕະຫຼອດເຄີ່ງສະໄໝຜ່ານມາ ແລະ ທ່ານຍັງເໜັ້ນອີກວ່າ ແຕ່ນີ້ຫາປີ 2021 ເຊິ່ງແມ່ນໄລຍະກະກຽມໃສ່ກອງປະຊຸມໃຫຍ່ຄັ້ງທີ XI ຜູ້ແທນແນວລາວສ້າງຊາດທົ່ວປະເທດ ແລະ ກະກຽມສະເຫຼີມສະຫຼອງ 69 ປີ, 70 ປີ ວັນສ້າງຕັ້ງແນວລາວສ້າງຊາດ ສະນັ້ນ, ຂໍໃຫ້ທຸກທ່ານຈົ່ງສືບຕໍ່ສຸມໃສ່ໜ້າທີ່ວຽກງານໃນຕໍ່ໜ້າໃຫ້ມີຜົນສໍາເລັດເປັນກ້າວໆ.

2019-07-04

ປະຕິທິນ

Jul-2019
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ