ແນະນຳ ສນຊ (LFND)

ທ່ານ ປະທານ ສນຊ ໂອ້ລົມຕໍ່ສະມາຄົມນັກທຸລະກິດໜຸ່ມແຫ່ງຊາດລາວ

      ພິທີພົບປະໂອລົມຂອງ ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ຕໍ່ສະມາຄົມນັກທຸລະກິດໜຸ່ມແຫ່ງຊາດລາວ ໄດ້ຈັດຂຶ້ນໃນວັນທີ 3 ກໍລະກົດ 2019 ນີ້, ທີ່ສູນກາງແນວລາວສ້າງຊາດ(ສນຊ), ເປັນກຽດເຂົ້າຮ່ວມມີ ທ່ານ ຄໍາໃບ ດໍາລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ມີທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີບັນດາທ່ານຮອງປະທານ ສນຊ, ຫົວໜ້າ-ຮອງຫົວໜ້າຫ້ອງການ, ບັນດາກົມ ແລະ ສູນຝຶກອົບຮົມ ສນຊ, ສູນກາງຊາວໜຸ່ມ ແລະ ບັນດາທ່ານສະມາຊິກສະມາຄົມນັກທຸລະກິດໜຸ່ມແຫ່ງຊາດລາວເຂົ້າຮ່ວມ.

      ທ່ານ ປອ ຄຳແສນ ສີສະວົງ ກຳມະການບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ປະທານສະມາຄົມນັກທຸລະກິດໜຸ່ມແຫ່ງຊາດລາວ ໄດ້ລາຍງານການເຄື່ອນໄຫວອັນພົ້ນເດັ່ນໃນໄລຍະຜ່ານມາ ແລະ ແຜນການໃນຕໍ່ໜ້າ ຂອງສະມາຄົມນັກທຸລະກິດໜຸ່ມແຫ່ງຊາດລາວ ໂດຍຫຍໍ້ ເຊິ່ງທ່ານໄດ້ໃຫ້ຮູ້ວ່າ ສະມາຄົມນັກທຸລະກິດໜຸ່ມແຫ່ງຊາດລາວ ສ້າງຕັ້ງຂຶ້ນໃນປີ 2002, ເບື້ອງຕົ້ນມີສະມາຊິກ 25 ບໍລິສັດເທົ່ານັ້ນ, ແຕ່ປະຈຸນບັນມີສະມາຊິກທີ່ເຄື່ອນໄຫວຕົວຈິງ 625 ບໍລິສັດ, ມູນຄ່າການລົງທຶນເປັນຊັບສິນ ສະເລ່ຍ 625,000,000 ໂດລາ ແລະ ໄດ້ແບ່ງການຄຸ້ມຄອງອອກເປັນ 12 ພະແນກທຸລະກິິດ; ຜົນສຳເລັດທີ່ພົ້ນເດັ່ນໃນໄລຍະຜ່ານມາ ແມ່ນໄດ້ສ້າງວຽກເຮັດງານທຳໃຫ້ແກ່ຊາວໜຸ່ມ ຈຳນວນ 21,875 ຄົນ, ການກໍ່ສ້າງພື້ນຖານໂຄງລ່າງ, ການຜະລິດກະສິກຳ, ການດຶງດູດການທ່ອງທ່ຽວ, ການໃຫ້ບໍລິການດ້ານການສຶກສາ ແລະ ສາທາລະນະສຸກ; ໄດ້ສ້າງຫຼາຍກິດຈະກຳເພື່ອຊ່ວຍເຫຼືອສັງຄົມ ເປັນຕົ້ນ: ການລະດົມທຶນຊ່ວຍເຫຼືອອຸທົກກະໄພຕ່າງໆ, ຊ່ວຍຜູ້ດ້ອຍໂອກາດ, ຊ່ວຍສ້າງໂຮງຮຽນ, ໂຮງໝໍ ແລະ ວັດວາອາຮາມ.
     ທ່ານ ປອ ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະຜ່ານມາ ຂອງສະມາຄົມນັກທຸລະກິດໜຸ່ມແຫ່ງຊາດລາວ ແລະ ທ່ານໄດ້ມີບາງຄຳເຫັນເນັ້ນຕືມວ່າ: ໃຫ້ສຶກສາອົບຮົມການເມືອງ-ແນວຄິດ ໃຫ້ເລິກເຊິ່ງ, ທົ່ວເຖິງ; ໃຫ້ສຶກສາຄົ້ນຄວ້າແນວທາງນະໂຍບາຍຂອງພັກ, ລະບຽບກົດໝາຍຂອງລັດ; ໃຫ້ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ປະກອບສ່ວນເຂົ້າໃນການພັດທະນາສັງຄົມ, ກຳນົດພາລະບົດບາດ, ລະບຽບການ, ວິໄສທັດຂອງຕົນ ໃນແຕ່ລະໄລຍະໃຫ້ຊັດເຈນ ໃນການຈັດຕັ້ງຂອງສະມາຄົມ ເພື່ອສ້າງຄວາມເຊື່ອຖືໃຫ້ພາຍໃນ ແລະ ຕ່າງປະເທດ, ຄົ້ນຄວ້າຮ່ຳຮຽນດ້ານເຕັກໂນໂລຢີ ໃຫ້ມີຄວາມສາມາດນຳມາຍົກລະດັບຄຸນນະພາບຂອງວຽກງານ, ຂອງການດຳເນີນທຸລະກິດ ແລະ ສ້າງຜະລິດຕະພັນທີ່ມີຄຸນນະພາບສາມາດເຂົ້າຮ່ວມການແຂ່ງຂັນຢູ່ພາກພື້ນ ແລະ ສາກົນໄດ້ ແລະ ສູ້ຊົນບຸກບືນສ້າງສະມາຊິກໃຫ້ກາຍເປັນນັກທຸລະກິດທີ່ມີຄວາມສາມາດ, ມີຄຸນສົມບັດ ແລະ ເປັນແບບຢ່າງທີ່ດີໃນການເຮັດທຸລະກິດ.

2019-07-05

ປະຕິທິນ

Oct-2019
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ