ແນະນຳ ສນຊ (LFND)

ສນຊ ຮ່ວມກັບສູນເລືອດແຫ່ງຊາດ ແລະ ວີເລີບຢູ ຈັດກິດຈະກຳບໍລິຈາກເລືອດ ລະນຶກເຖິງວັນຄ້າຍ ວັນເກີດທ່ານ ປະທານສຸພານຸວົງ ຄົບຮອບ 110 ປີ.

ວັນທີ 10 ມີຖຸນາ 2019 ນີ້, ສູນກາງແນວລາວສ້າງຊາດຮ່ວມກັບສູນເລືອດແຫ່ງຊາດ ແລະ ມູນນິທິວີເລີບຢູ ໄດ້ຈັດກິດຈະກຳບໍລິຈາກເລືອດແບບເປີດກ້ວາງ ພາຍໃຕ້ຄຳຂວັນ ‘’ ການບໍລິຈາກເລືອດແມ່ນຮັກຊາດ ແລະ ພັດທະນາ ‘’ ໂດຍການເປັນປະທານ ຂອງທ່ານ ຮສ ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ, ທ່ານ ຈັນທະລາ ສຸກສາຄອນ ຫົວໜ້າອຳນວຍການສູນເລືອດແຫ່ງຊາດ, ທ່ານ ນາງ ຄິມ ອົກ ຄີ ຫົວໜ້າອົງການວີເລີບຢູຄອບຄົວທ່ານກົງສູນກິດຕິມະສັກ ແຫ່ງສີລັງກາ ປະຈໍາ ສປປລາວ, ມີບັນດາທ່ານຫົວໜ້າກົມ, ຮອງກົມ,ພະນັກງານ - ລັດຖະກອນ ແລະ ມ່ວນຊົນເຂົ້າຮ່ວມ ຢູ່ຫ້ອງປະຊຸມໃຫຍ່ຊັ້ນ 2 ຂອງສຳນັກງານສູນກາງແນວລາວສ້າງຊາດ.

ການບໍລິຈາກເລືອດເປັນກິດຈະກຳໜຶ່ງ ຈັດຂຶ້ນເພື່ອແນ່ໃສ່ສ້າງຈິດສຳນຶກໃຫ້ແກ້ຊັ້ນຄົນຕ່າງໆໃນສັງຄົມ ແລະ ເປີດໂອກາດໃຫ້ຫຼາຍພາກສ່ວນໄດ້ມີໂອກາດເຂົ້າຮ່ວມ, ທັງເປັນການຊ່ວຍກອບກູ້ເອົາຊີວິດຜູ້ເຈັບເປັນທີ່ນອນຮັກສາຕົວຢູ່ຕາມໂຮງໝໍແຫ່ງຕ່າງໆ ໃນຂອບເຂດທົ່ວປະເທດ. ໃນໂອກາດດັ່ງ ກ່າວ, ເຫັນໄດ້ເຖິງຄວາມສໍາຄັນ ແລະ ຈໍາເປັນຂອງການບໍລິຈາກເລືອດຊ່ວຍເຫຼືອສັງຄົມ ເຊິ່ງລັດຖະບານແຫ່ງ ສປປ ລາວ ໄດ້ຮັບຮອງການບໍລິຈາກເລືອດ-ສົ່ງເລືອດ ເປັນນະໂຍບາຍຂອງລັດຖະບານ ນັບແຕ່ປີ 1995 ເປັນຕົ້ນມາ. ຫລັງຈາກນັ້ນ, ການບໍລິຈາກເລືອດແບບສະໝັກໃຈໂດຍບໍ່ຮຽກຮ້ອງຄ່າຕອບແທນໄດ້ຖືກຍອມຮັບຈາກສັງຄົມລາວ ແລະ ຈຳນວນຜູ້ເຂົ້າຮ່ວມບໍລິຈາກເລືອດໃນແຕ່ລະປີແມ່ນມີຈຳນວນເພີ່ມຂຶ້ນ ແຕ່ເຖິງຢ່າງໃດກໍ່ຕາມໃນເງື່ອນໄຂສັງຄົມໃນປັດຈຸບັນຍັງມີ ຄວາມຮຽກຮ້ອງຕ້ອງການເລືອດນັບມື້ນັບເພີ່ມຂຶ້ນ ຊຶ່ງບາງໄລຍະຢູ່ສູນເລືອດກໍມີເລືອດຈຳກັດ, ບໍ່ສາມາດຕອບສະໜອງໃຫ້ຄົນເຈັບ, ເປັນຕົ້ນແມ່ນໄລຍະມີໄພພິບັດ, ເກີດອຸບັດຕິເຫດໃຫຍ່ ແລະ ອື່ນໆ... ຍ້ອນເຫັນໄດ້ຄວາມສຳຄັນດັ່ງກ່າວ, ສູນກາງແນວລາວສ້າງຊາດ ຮ່ວມກັບສູນເລືອດແຫ່ງຊາດ ແລະ ມູນນິທິວີເລີບຢູ ໄດ້ຈັດກິດຈະກໍາບໍລິຈາກເລືອດຊ່ວຍເຫຼືອສັງຄົມ ພາຍໃຕ້ຄຳຂວັນ: “ການບໍລິຈາກເລືອດ ແມ່ນຮັກຊາດ ແລະ ພັດທະນາ” ຂຶ້ນເພື່ອສະແດງເຖິງກ້ອນກຳລັງມະຫາສາມັກຄີທົ່ວປວງຊົນທັງຊາດ ເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມກັນນຳພາປະເທດ ຊາດຫຼຸດພົ້ນອອກຈາກສະຖານະພາບດ້ອຍພັດທະນາ, ຄວາມສາມັກຄີປອງດອງທົ່ວປວງຊົນແມ່ນປັດໃຈໜຶ່ງ ຕັດສິນການຄົງຕົວ, ຂະຫຍາຍຕົວຂອງຊາດໜຶ່ງ ແລະ ມະຫາຊົນແມ່ນຜູ້ຕັດສິນ ປະຫວັດສາດ. ດັ່ງນັ້ນ, ໜຶ່ງຍົດເລືອດ ແມ່ນໜຶ່ງນ້ຳໃຈຂອງທ່ານ ເພື່ອຊ່ວຍກັນພັດທະນາຊາດ ກ້າວຂຶ້ນສູ່ຄວາມຮຸ່ງເຮືອງສີວິໄລ.
ໃນໂອກາດນີ້, ບັນດາຜູ້ທີ່ເຂົ້າຮ່ວມງານກໍ່ໄດ້ຮ່ວມກັນບໍລິຈາກເລືອດເພື່ອຊ່ວຍເຫຼືອສັງຄົມຢ່າງເປັນຂະບວນຟົດຟື້ນ. ພ້ອມນີ້ໃນພິທີຍັງໄດ້ມີການມອບໃບຍ້ອງຍໍໃຫ້ມູນນິທິວີເລີບຢູ, ບັນດາກົມກອງທີ່ເຂົ້າຮ່ວມບໍລິຈາກເລືອດ ແລະ ໃຫ້ບຸກຄົນຜູ້ທີ່ສາມາດບໍລິຈາກເລືອດໄດ້.

2019-07-11

ປະຕິທິນ

Jul-2019
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ