ແນະນຳ ສນຊ (LFND)

ພິທີປາຖະກະຖາ ວັນຄ້າຍວັນເກີດ ປະທານ ສຸພານຸວົງ ຄົບຮອບ 110 ປີ

ເນື່ອງ​ໃນ​ໂອກາດ​​ວັນຄ້າຍວັນເກີດ​ຂອງປະທານ ສຸ​ພານຸ​ວົງ ຄະນະ​ໂຄສະນາ​ອົບຮົມສູນກາງພັກ ຮ່ວມກັບ ສູນກາງແນວລາວສ້າງຊາດ (ສນຊ) ໄດ້ຈັດພິທີປາຖະ​ກະຖາ ວັນເກີດປະທານ ສຸພານຸວົງ ຄົບຮອບ 110 ປີ (13/07/1909-13/07/2019) ຂຶ້ນ​ໃນ​ວັນ​ທີ 10 ກໍລະກົດ 2019 ທີ່​ສະໂມສອນຄະນະໂຄສະນາ-ອົບຮົມສູນກາງພັກ ໂດຍເປັນ​ກຽດ​​ປາຖະກະຖາ​ຂອງ​ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ) ມີທ່ານ ສີປະເສີດ ແສນສະຫວັດ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາຜູ້ຕາງໜ້າມາຈາກ ກະຊວງ, ອົງການ, ພະແນກການຕ່າງໆເຂົ້າຮ່ວມຮັບຟັງ.

ໃນການປາຖະກະຖາຄັ້ງນີ້ ເພື່ອ​ລະນຶກເຖິງຄຸນງາມຄວາມດີ, ເສີມຂະຫຍາຍມູນເຊື້ອຄວາມອົງອາດກ້າຫານ, ເປັນແບບຢ່າງທາງດ້ານຈິດໃຈ ແລະ ພຶດຕິກໍາຕົວຈິງຂອງເພິ່ນ. ທ່ານ ສຸພານຸວົງ ນັກຮັກຊາດ-ນັກປະຕິວັດຜູ້ກ້າແກ່ນ ແລະ ເປັນຜູ້ນໍາທີ່ດີເດັ່ນ-ວິລະບູລຸດຂອງຊາດລາວ ທ່ານເປັນເຊື້ອເຈົ້າ ແຕ່ໄດ້ເສຍສະຫຼະທຸກສິ່ງທຸກຢ່າງທາງດ້ານຄວາມສຸກ ແລະ ຜົນປະໂຫຍດສ່ວນຕົວ ເພື່ອພາລະກິດລວມຂອງຊາດ ຂອງປະຊາຊົນລາວ, ຄຸນລັກສະນະທີ່ພົ້ນເດັ່ນຂອງເພີ່ນແມ່ນເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ເປັນປັນຍາຊົນຜູ້ຍິ່ງໃຫຍ່, ນໍ້າໃຈຮັກຊາດ ອັນດູດດື່ມ, ເປັນນັກການເມືອງທີ່ເກັ່ງກ້າ ແລະ ດໍາລົງຊີວິດແບບລຽບງ່າຍ.

​ ທ່ານ ປອ ໄຊສົມພອນ ພົມວິຫານ   ໄດ້ຍົກ​ໃຫ້​ເຫັນບັນດາ​ຜົນງານ ​ແລະ ຄຸນ​ງາມ​ຄວາມ​ດີ​ຂອງ  ​ປະທານ ສຸພາ​ນຸວົງ, ໃນໄລຍະ​ການເຄື່ອນໄຫວ​ປະຕິວັດ  ທ່ານ ​ໄດ້​ສຸມ​ສະຕິ​ປັນຍາ ​ແລະ ​ເຫື່ອ​ແຮງ​ ​​ເພື່ອ​ຊີ້​ນຳ​ຂະ​ບວນການ​ປະຕິວັດ​ລາວ  ຈົນສາມາດຍາດ​ເອົາ​ໄຊຊະນະ​ອັນ​ຍິ່ງ​​ໃຫຍ່ ມາ​ໃຫ້​ປະ​ເທດ​ຊາດ.  ຊື່​ສຽງ​ຂອງ​ປະທານ ສຸພານຸວົງ ​ໄດ້​ພົ້ນ​ເດັ່ນ​ຂຶ້ນ​  ໃນ​ຄະນະ​ທີ່​ເປັນ​ນັກຮົບ​ ຮັກ​ຊາດ​ຮຸ່ນ​ທຳ​ອິດ  ທີ່​ໄດ້​ເອົາ​ຊີວິດ​ຂອງ​ຕົນ​ ຜູກ​ພັນ​ກັບ​ການປະຕິວັດ​ ຕະຫລອດ​ມາ  ​ໂດຍ​ບໍ່​ງໍ້​ງ່ຽງ​ຕໍ່​ຄວາ​ມຫຍຸ້ງຍາກລຳບາກ,  ມີຄວາມ​ເສຍສະຫລະ ​ບໍ່​ຫວາດ​ຫວັ່ນ ​ຕໍ່​ກັບ​ການ​ຈັບ​ກຸມ​ຄຸມ​ຂັງ​ຂອງ​ສັດຕູ  ຍາມ​ໃດ​ກໍ​ຕໍ່ສູ້​ເພື່ອ​ອຸດົມ​ຄະຕິ​ປະຕິວັດ​ອັນ​ສູງ​ສົ່ງ ​ເພື່ອ​ຄວາມ​ເປັນ​ເອກະລາດ  ​ແລະ ຄວາມ​ວັດທະນາຖາວອນ​  ຂອງ​ປະ​ເທດ​ຊາດ ​ເພື່ອ​ອິດສະຫລະພາບ  ຄວາມ​ຢູ່ດີ​ກິນ​ດີ​ຂອງ​ປະຊາຊົນ.  ຫລັງ​ຈາກ​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ ນັບ​ແຕ່ ປີ 1975-1995  ປະທານ ສຸພາ​ນຸວົງ ​ໄດ້​ນຳພາ​ປະຊາຊົນ​ລາວ  ​ຜ່ານ​ຜ່າ​ອຸປະສັກ​ຕ່າງໆ  ໃນ​ໄລຍະ​ຂ້າມ​ຜ່ານ, ນຳພາ​ປະຊາຊົນ ​ດຳ​ເນີນ​ພາລະກິດ​ປ່ຽນ​ແປງ​ໃໝ່ ​ແລະ ນຳພາ​ປະຊາຊົນ ປະກອບສ່ວນຢ່າງຕາງໜ້າເຂົ້າໃນຂະບວນການປົກປັກຮັກສາ ແລະ ​ສ້າງສາ​ພັດທະນາ​ປະ​ເທດ​ຊາດ ​ໃຫ້​ຈະ​ເລີ​ນຮຸ່ງ​ເຮືອງ​ ເທື່ອ​ລະ​ກ້າວ.

2019-07-11

ປະຕິທິນ

Jul-2019
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ