ແນະນຳ ສນຊ (LFND)

ພິທີປາຖະກະຖາ ວັນຄ້າຍວັນເກີດ ປະທານ ສຸພານຸວົງ ຄົບຮອບ 110 ປີ

ສານປະຊາຊົນສູງສຸດ ໄດ້ຈັດພິທີປາຖະ​ກະຖາ ວັນຄ້າຍວັນເກີດປະທານ ສຸພານຸວົງ ຄົບຮອບ 110 ປີ (13/07/1909-13/07/2019) ຂຶ້ນ​ໃນ​ວັນ​ທີ 17 ກໍລະກົດ 2019 ທີ່​ຫ້ອງປະຊຸມຊັ້ນ 4 ສານປະຊາຊົນສູງສຸດ ໂດຍເປັນ​ກຽດ​​ປາຖະກະຖາ​ຂອງ​ທ່ານ ນ. ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ (ສນຊ) ມີທ່ານ ຄໍາພັນ ບຸນພາຄົມ, ຮອງປະທານສານປະຊາຊົນສູງສຸດ, ມີບັນດາທ່ານຫົວໜ້າ-ຮອງຫົວໜ້າກົມ ຕະຫຼອດຮອດພະນັກງານ-ລັດຖະກອນຂອງສານປະຊາຊົນສູງສຸດ ແລະ ສານປະຊາຊົນນະຄອນຫຼວງວຽງຈັນຈໍານວນໜຶ່ງເຂົ້າຮ່ວມຮັບຟັງ.

ໃນການປາຖະກະຖາຄັ້ງນີ້ ເພື່ອ​ລະນຶກເຖິງຄຸນງາມຄວາມດີຄຸນສົມບັດສິນທໍາປະຕິວັດ ແລະ ບົດຮຽນອັນປະເສີດເລີດລໍ້າ, ເພື່ອເສີມຂະຫຍາຍມູນເຊື້ອຄວາມອົງອາດກ້າຫານ, ຄວາມເປັນແບບຢ່າງທາງດ້ານຈິດໃຈ ແລະ ພຶດຕິກໍາຕົວຈິງຂອງເພິ່ນ. ທ່ານ ສຸພານຸວົງ ນັກຮັກຊາດ-ນັກປະຕິວັດຜູ້ກ້າແກ່ນ ປີຊາສາມາດ ແລະ ເປັນຜູ້ນໍາທີ່ດີເດັ່ນ-ວິລະບູລຸດຂອງຊາດລາວ ທ່ານເປັນເຊື້ອເຈົ້າ ແຕ່ໄດ້ເສຍສະຫຼະທຸກສິ່ງທຸກຢ່າງທາງດ້ານຄວາມສຸກ ແລະ ຜົນປະໂຫຍດສ່ວນຕົວ ເພື່ອພາລະກິດລວມຂອງຊາດ ຂອງປະຊາຊົນລາວ, ຄຸນລັກສະນະທີ່ພົ້ນເດັ່ນຂອງເພີ່ນແມ່ນເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ເປັນປັນຍາຊົນຜູ້ຍິ່ງໃຫຍ່, ນໍ້າໃຈຮັກຊາດ ອັນດູດດື່ມ, ເປັນນັກການເມືອງທີ່ເກັ່ງກ້າ ແລະ ດໍາລົງຊີວິດແບບລຽບງ່າຍ.

​ ທ່ານ ນ ຍອດແກ້ວມະນີ ສຸພານຸວົງ ໄດ້ຫວນຄືນປະຫວັດ ແລະ ຜົນງານທີ່ພົ້ນເດັ່ນຂອງທ່ານ ປະທານ ສຸພານຸວົງ ໂດຍຫຍໍ້ວ່າ: ທ່ານປະທານ ສຸພານຸວົງ ໄດ້ເຂົ້າສຶກສາຊັ້ນປະຖົມຢູ່ ຫຼວງພະບາງ, ຊັ້ນມັດທະຍົມຢູ່ ນະຄອນຫຼວງຮ່າໂນ້ຍ ສສ ຫວຽດນາມ ແລະ ສຶກສາຕໍ່ລະດັບປະລິນຍາຕີ ສາຂາວິສະວະກຳກໍ່ສ້າງ ແລະ ຂົວທາງ ຢູ່ນະຄອນຫຼວງປາຣີ ປະເທດຝຣັ່ງ, ໄດ້ເຂົ້າຮ່ວມຂະບວນການຕໍ່ສູ້ຢ່າງພິລະອາດຫານ ຕ້ານຈັກກະພັດລ່າເມືອງຂຶ້ນ ແບບເກົ່າ ແລະ ແບບໃໝ່. ປະທານ ສຸພານຸວົງ ເປັນເຊື້ອເຈົ້າ ເປັນເຊື້ອກະສັດ ເປັນຜູ້ນຳທີ່ມີ ຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍໄດ້ຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖື ໝູ່ຄະນະ, ເອື້ອເຟື້ອຮັກແພງ ມິດສະຫາຍຢ່າງຈິງໃຈ, ມີທັດສະນະຫຼັກໝັ້ນອັນໜັກແໜ້ນ ແລະ ນ້ຳໃຈເສຍສະຫຼະອັນສູງສົ່ງ ເພື່ອຊາດ ເພື່ອປະຊາຊົນ, ເປັນໜຶ່ງໃນບັນດາຜູ້ນຳທີ່ດີເດັ່ນ ແລະ ເຄົາລົບຮັກຂອງປະຊາຊົນລາວເຜົ່າຕ່າງໆ, ທ່ານໄດ້ອຸທິດໝົດຈິດໝົດໃຈ, ໝົດ ຄວາມສາມາດ ແລະ ຫົວຄິດປະດິດສ້າງຂອງຕົນໃຫ້ແກ່ພາລະກິດປົກປັກຮັກສາ ແລະ ສ້າງສາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກ ຂອງປະຊາຊົນລາວບັນດາເຜົ່າ.

2019-07-18

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ