ແນະນຳ ສນຊ (LFND)

ທ່ານ ປະທານສູນກາງແນວລາວສ້າງຊາດເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງ ຫຼວງນໍ້າທາ

ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ຫຼວງນໍ້າທາ ໂດຍການຕ້ອນຮັບຂອງ ທ່ານ ເພັດຖາວອນ ພິລາວັນ ເລຂາພັກແຂງ ເຈົ້າແຂວງໆຫຼວງນໍ້າທາ ໃນລະຫວ່າງວັນທີ 23-24 ກໍລະກົດ 2019 ນີ້ ທີ່ສະໂມສອນແຂວງ ຫຼວງນໍ້າທາ; ໃນວາລະການເຄື່ອນໄຫວທ່ານປະທານສູນກາງແນວລາວສ້າງຊາດໄດ້ພົບປະ ແລະ ເຮັດວຽກກັັບຄະນະນຳຂັ້ນແຂວງ,  ແນວລາວສ້າງຊາດ ແລະ ອົງການຈັດຕັ້ງມະຫາຊົນແຂວງ.

ໃນການເຄື່ອນໄຫວເຮັດວຽກໃນຄັ້ງນີ້ ທ່ານ ປະທານສູນກາງແນວລາວສ້າງຊາດ ໄດ້ຮັບຟັງບົດລາຍງານສະ ພາບລວມຂອງແຂວງໂດຍຫຍໍ້ ຈາກທ່ານ ເພັດຖາວອນ ພິລາວັນ ເລຂາພັກແຂວງ ເຈົ້າແຂວງໆຫຼວງນໍ້າທາ ໂດຍສະ ເພາະ ວຽກງານການເມືອງ, ພື້ນຖານໂຄ່ງລ່າງເສດຖະກິດ, ວຽກງານວັດທະນະທໍາ-ສັງຄົມ ແລະ ວຽກງານອື່ນໆທີ່ກ່ຽວຂ້ອງ ທັງຈຸດດີ, ຈຸດອ່ອນ, ຂໍ້ຄົງຄ້າງຕ່າງໆໃຫ້ປະທານສູນກາງແນວລາວສ້າງຊາດໄດ້ຮັບຊາບ. ພ້ອມກັນນີ້ ກໍ່ໄດ້ມີການແລກປ່ຽນຄວາມຄິດຄວາມເຫັນກ່ຽວກັບວຽກງານຕ່າງໆພາຍໃນແຂວງ ເວົ້າລວມ, ເວົ້າສະເພາະ ວຽກງານການກະກຽມກອງປະຊຸມໃຫຍ່ 3 ຂັ້ນຂອງແຂວງ, ວຽກງານແນວລາວສ້າງຊາດ ແລະ ວຽກງານອົງການຈັດຕັ້ງມະຫາຊົນ.

          ຫຼັງຈາກນັ້ນ, ທ່ານປະທານສູນກາງແນວລາວສ້າງຊາດ ໄດ້ເຂົ້າຮ່ວມ ແລະ ໂອ້ລົມຕໍ່ກອງປະຊຸມ ຄົບຄະນະກໍາມະການແນວລາວສ້າງຊາດແຂວງ ຫຼວງນໍ້າທາ ຄັ້ງທີ 9 ສະໄໝທີ VI. ມີ ທ່ານ ນ ລັດສະໜີ ມິ່ງບຸບຜາ ກໍາມະການພັກແຂວງ ປະທານແນວລາວສ້າງຊາດແຂວງ, ມີບັນດາທ່ານຮອງປະທານແນວລາວສ້າງຊາດແຂວງ, ບັນດາຕາງໜ້າພະ ແນກການອ້ອມຂ້າງ, ອົງການຈັດຕັ້ງມະຫາຊົນ ແລະ ພະນັກງານແນວລາວສ້າງຊາດແຂວງເຂົ້າຮ່ວມ. ໃນກອງປະຊຸມຄັ້ງນີ້, ກ່ອນອື່ນທ່ານ ປະທານສູນກາງແນວລາວສ້າງຊາດໄດ້ຮັບຟັງ ບົດສະຫຼຸບວຽກງານຮອບດ້ານປະຈໍາປີ 2018 ແລະ ທິດທາງແຜນການ ປີ 2019; ບົດສະຫຼຸບວຽກງານສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຈາກທ່ານ ບຸນລິວັນ ຮອງປະທານແນວລາວສ້າງຊາດແຂວງ ແລະ ວຽກອື່ນໆທີ່ກ່ຽວຂ້ອງ. ພ້ອມດຽວກັນນັ້ນ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ເປັນກຽດໂອ້ລົມ ເຊິ່ງກ່ອນອື່ນທ່ານ ໄດ້ຍ້ອງຍໍຊົມເຊີຍຕໍ່ຜົນສໍາເລັດ ແລະ ຕີລາຄາສູງຕໍ່ຜົນງານການເຄື່ອນໄຫວລວມຂອງແນວລາວສ້າງຊາດແຂວງທີ່ຍາດມາໄດ້ໃນໄລຍະທີ່ຜ່ານມາ ແລະ ທ່ານ ໄດ້ເນັ້ນບາງບັນຫາຄື: ໃຫ້ແນວລາວສ້າງຊາດແຂວງ ຫຼວງນໍ້າທາ ຈົ່ງເພີ່ມທະວີກ້ອນກຳລັງມະຫາສາມັກຄີທຸກຊົນເຜົ່າ, ຊັ້ນຄົນ, ສາສະຫນາ, ເພດ, ໄວໃຫ້ໜັກແໜ້ນ ຄຽງຄູ່ກັນນັ້ນຕ້ອງຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບສຸກຂອງສັງຄົມ; ເອົາໃຈໃສ່ບຸກທະລຸທາງດ້ານຈິນ ຕະນາການ, ປັບປຸງແບບແຜນວິທີເຮັດວຽກຂອງຕົນ, ບຸກທະລຸກຢ່າງແຂງແຮງທາງດ້ານການພັດທະນາຊັບພະຍາກອນມະນຸດ ໂດຍສະເພາະແມ່ນການບໍາລຸງສ້າງ ແລະ ຍົກລະດັບຄວາມຮູ້ ຄວາມສາມາດຂອງພະນັກງານວິຊາການ; ເອົາໃຈໃສ່ຊຸກຍູ້ປະຊາຊົນໃນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນ ໂດຍການສ້າງກອງທຶນພັດທະຂັ້ນບ້ານໃຫ້ເກີດດອກອອກຜົນ; ພ້ອມດຽວກັນນັ້ນ ຕ້ອງສົມທົບກັບພະແນກພາຍໃນແຂວງ, ພາກສ່ວນທີ່ກ່ຽວຂ້ອງ ເອົາໃຈໃສ່ຈັດຕັ້ງປະຕິບັດໃນການແກ້ໄຂປະກົດການຫຍໍ້ທໍ້ໃນສັງຄົມ ບໍ່ວ່າຈະເປັນການສະກັດກັ້ນການຄ້າຂາຍເຖື່ອນ, ການຄ້າຢາເສບຕິດ, ບັນຫາການຄ້າມະນຸດ, ບັນຫາລຽບຕາມຊາຍແດນ ແລະ ບັນຫາອື່ນໆໃຫ້ໝົດໄປ, ຄຽງຄູ່ກັນນັ້ນ ຕ້ອງມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີ. ເວົ້າລວມ ເວົ້າສະເພາະ ຄະນະກໍາມະການແນວລາວສ້າງຊາດແຕ່ລະຂັ້ນ, ພະນັກງານຫຼັກແຫຼ່ງ, ຜູ້ຊົງຄຸນວຸດທິ, ພະນັກງານປະຕິວັດ, ທະຫານ, ຕໍາຫຼວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມຂົນຂວາຍປະຊາຊົນບັນດາເຜົ່າ ໃນການເຂົ້າຮ່ວມຂະບວນການຕ່າງໆທີ່ສຳຄັນຂອງຊາດ ແລະ ປະກອບ ສ່ວນຢ່າງຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມ ຂອງແຂວງໃຫ້ບັນລຸຕາມຄາດໝາຍ ກໍຄືວຽກງານແນວລາວສ້າງຊາດໃຫ້ມີການປ່ຽນແປງໃໝ່ທີ່ຕັ້ງໜ້າ ແລະ ນັບມື້ດີຂຶ້ນເທື່ອລະກ້າວ.

2019-07-25

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ