ແນະນຳ ສນຊ (LFND)

ທ່ານ ປະທານສູນກາງແນວລາວສ້າງຊາດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງບໍ່ແກ້ວ

ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ບໍ່ແກ້ວ ໂດຍການຕ້ອນຮັບຂອງ ທ່ານ ບົວຄົງ ນາມມະວົງ ກໍາມະການສໍາຮອງສູນກາງພັກ, ເລຂາພັກແຂວງ, ເຈົ້າແຂວງໆບໍ່ແກ້ວ ໃນລະຫວ່າງວັນທີ 25-26 ກໍລະກົດ 2019 ນີ້; ໃນວາລະການເຄື່ອນໄຫວທ່ານປະທານສູນກາງແນວລາວສ້າງຊາດໄດ້ພົບປະ ແລະ ເຮັດວຽກກັັບຄະນະນຳຂັ້ນແຂວງ,  ແນວລາວສ້າງຊາດ ແລະ ອົງການຈັດຕັ້ງມະຫາຊົນຂອງແຂວງ ທີ່ຫໍວັດທະນະທໍາແຂວງ ບໍ່ແກ້ວ.

ການເຄື່ອນໄຫວດັ່ງກ່າວ, ທ່ານປະທານສູນກາງແນວລາວສ້າງຊາດ ໄດ້ໂອ້ລົມ ແລະ ມີຄຳຄິດເຫັນບາງບັນຫາຕໍ່ ຄະນະພັກ-ຄະນະນຳ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງພາຄີ ແລະ ພະນັກງານຫຼັກແຫຼ່ງ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ແຂວງຍາດມາໄດ້ໃນໄລຍະຜ່ານມາພ້ອມທັງໄດ້ຫວນຄືນມູນເຊື້ອອັນສະຫງ່າລາສີ, ຜົນງານທີ່ພົ້ນເດັ່ນ, ພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດ; ພ້ອມດຽວກັນນັ້ນ, ທ່ານໄດ້ເນັ້ນຫຼາຍບັນຫາໃຫ້ບັນດາການນໍາແຂວງບໍ່ແກ້ວ ຈົ່ງເພີ່ມທະວີກ້ອນກຳລັງມະຫາສາມັກຄີທຸກຊົນເຜົ່າ, ຊັ້ນຄົນ, ສາສະຫນາ, ເພດ, ໄວໃຫ້ໜັກແໜ້ນ ຄຽງຄູ່ກັນນັ້ນຕ້ອງຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບສຸກຂອງສັງຄົມ; ເອົາໃຈໃສ່ໂຄສະນາປຸກລະດົມ, ເສີມຂະຫຍາຍສິດເປັນເຈົ້າຂອງປະຊາຊົນໃນການປະຕິບັດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII, ຄົ້ນຄວ້າຜັນຂະຫຍາຍບັນດາແນວທາງນະໂຍຂອງບາຍພັກ-ລັດ ແລ້ວຫັນເປັນແຜນງານ, ເປັນໂຄງການລະອຽດ ທີ່ແທດເໝາະກັບສະພາບຕົວຈິງ ແລະ ທ່າແຮງບົ່ມຊ້ອນຂອງແຂວງ; ພ້ອມນັ້ນ ແຂວງຕ້ອງຖືສໍາຄັນໃນການຫັນລົງທ້ອງຖິ່ນຮາກຖານ ແລະ ເອົາໃຈໃສ່ວຽກງານການສຶກສາອົບຮົມການເມືອງ-ແນວຄິດ ຂອງຖັນແຖວພະນັກງານຫຼັກແຫຼ່ງ, ສະມາຊິກພັກໃຫ້ກຳແໜ້ນ ແລະ ເຊື່ອມຊຶມແນວທາງນະໂຍບາຍຂອງພັກຢ່າງເລິກເຊິ່ງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃນການແກ້ໄຂປະກົດການຫຍໍ້ທໍ້ໃນສັງຄົມ ບໍ່ວ່າຈະເປັນການສະກັດກັ້ນການຄ້າຂາຍເຖື່ອນ, ການຄ້າຢາເສບຕິດ, ບັນຫາການຄ້າມະນຸດ, ບັນຫາຕາມເຂດຊາຍແດນ ແລະ ບັນຫາອື່ນໆໃຫ້ໝົດໄປ; ຄຽງຄູ່ກັນນັ້ນ, ຕ້ອງມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີທີ່ສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີ ພ້ອມກັນນີ້, ທ່ານຍັງໄດ້ຮຽກຮ້ອງໃຫ້ຄະນະພັກເອົາໃຈໃສ່ຊີ້ນໍາ-ນໍາພາກະກຽມຮອບດ້້ານໃຫ້ແກ່ກອງປະຊຸມໃຫຍ່ 3 ຂັ້ນ; ສືບຕໍ່ເອົາໃຈໃສ່ກໍາແໜ້ນ ແລະ ສຶກສາອົບຮົມປະຊາຊົນລາວບັນດາເຜົ່າ ປະຕີິບັດຕາມແນວທາງນະໂຍບາຍຂອງພັກ, ລະບຽບກົດໝາຍ, ໂຄສະນາມູນເຊື້ອຄວາມສາມັກຄີ, ມູນເຊື້ອທາງວັດທະນະທໍາທີ່ເປັນເອກະລັກຂອງຊົນເຜົ່າຕ່າງໆ ເພື່ອສ້າງໃຫ້ເຂົາເຈົ້າມີຄວາມທະນົງໃຈ ແລະ ພູມໃຈໃນຄວາມເປັນຊົນເຜົ່າຂອງຕົນເອງ ເວົ້າລວມ, ເວົ້າສະເພາະ, ໃຫ້ຄະນະກໍາມະການແນວລາວສ້າງຊາດແຕ່ລະຂັ້ນ, ພະນັກງານຫຼັກແຫູ່ງ, ຜູ້ຊົງຄຸນວຸດທິ, ພະນັກງານປະຕິວັດ, ທະຫານ, ຕໍາຫຼວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມຂົນຂວາຍປະຊາຊົນບັນດາເຜົ່າ ໃນການເຂົ້າຮ່ວມຂະບວນການຕ່າງໆທີ່ສຳຄັນຂອງຊາດ ແລະ ປະກອບສ່ວນຢ່າງຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມ ຂອງແຂວງໃຫ້ບັນລຸຕາມຄາດໝາຍ ກໍຄືວຽກງານແນວລາວສ້າງຊາດໃຫ້ມີການປ່ຽນແປງໃໝ່ທີ່ຕັ້ງໜ້າ ແລະ ນັບມື້ດີຂຶ້ນເທື່ອລະກ້າວ. ພ້ອມດຽວກັນນັ້ນ, ທ່ານ ປະທານສູນກາງແນວລາວສ້າງຊາດ ພ້ອມຄະນະ ຍັງໄດ້ໂອ້ລົມປະຊາຊົນຢູ່ ເມືອງ ຕົ້ນເຜິ້ງ ແລະ ຢ້ຽມຢາມ ດ່ານສາກົນຂົວມິດຕະພາບລາວ-ໄທ ແຫ່ງທີ 4 ຕື່ມອີກ.

2019-08-07

ປະຕິທິນ

Nov-2019
S M T W T F S
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ