ແນະນຳ ສນຊ (LFND)

ຊາວໜຸ່ມ-ເຍົາວະຊົນ ຮ່ຳຮຽນຄຸນສົມບັດ ແລະ ແບບແຜນການດຳລົງຊີວິດ ຂອງທ່ານ ປະທານ ສຸພານຸວົງ

ໃນວັນທີ 1 ສິງຫາ 2019 ນີ້, ສູນກາງຊາວໜຸ່ມປະຊາຊົນປະຕິວັດຕິວັດລາວ ໄດ້ຈັດເວທີສົນທະນາກ່ຽວກັບຊີວິດ ແລະ ການເຄື່ອນໄຫວ ຂອງທ່ານ ປະທານ ສຸພານຸວົງ ເນື່ອງໃນໂອກາດລະນຶກວັນຄ້າຍວັນເກີດ ທ່ານ ປະທານ ສຸພານຸວົງ ຄົບຮອບ 110 ປີ ໃນຫົວຂໍ້ “ຊາວໜຸ່ມ-ເຍົາວະຊົນ ຮ່ຳຮຽນຄຸນສົມບັດ ແລະ ແບບແຜນການດຳລົງຊີວິດ ຂອງທ່ານ ປະທານ ສຸພານຸວົງ”, ເປັນກຽດສົນທະນາໂດຍ ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ ທັງເປັນລູກສາວຂອງ ທ່ານ ປະທານ ສຸພານຸວົງ, ເປັນກຽດເຂົ້າຮ່ວມຟັງມີທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີບັນດາທ່ານຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ບັນດາທ່ານຄະນະບໍລິຫານງານຊາວໜຸ່ມກະຊວງ-ອົງການ, ຫົວໜ້າ-ຮອງຫົວໜ້າກົມ, ຫ້ອງການ, ພະນັກງານ-ລັດຖະກອນ ສູນກາງຊາວໜຸ່ມ ແລະ ເຍົາວະຊົນ ເຂົ້າຮ່ວມ.

ທ່ານ ນາງ ຍອດແກ້ວມະນີ ສຸພານຸວົງ ໄດ້ຫວນຄືນເຖິງຊີວິດ ແລະ ການເຄື່ອນໄຫວປະຕິວັດ ຂອງ ທ່ານ ປະທານ ສຸພານຸວົງ ໂດຍຫຍໍ້ ເຊິ່ງ ທ່ານໄດ້ໃຫ້ຮູ້ວ່າ: ທ່ານ ປະທານ ສຸພານຸວົງ ເກີດມື່ອວັນທີ 13 ກໍລະກົດ 1909 ໃນຄອບຄົວເຊື້ອເຈົ້າ, ທ່ານໄດ້ເຂົ້າສຶກສາຊັ້ນປະຖົມຢູ່ຫຼວງພະບາງ, ຊັ້ນມັດທະຍົມອຸດົມຢູ່ນະຄອນຫຼວງຮ່າໂນ້ຍ ສສ ຫວຽດນາມ ທັງໄດ້ຮຽນຈົບວິຊາວະກອນກໍ່ສ້າງ-ຂົວທາງ ຢູ່ນະຄອນຫຼວງປາລີ ປະເທດຝລັ່ງ ແລະ ກັບມາປະເທດ, ທ່ານໄດ້ເຂົ້າຮ່ວມກັບຂະບວນການຕໍ່ສູ້ຢ່າງພິລະອາດຫານຕ້ານຈັກກະພັດພວກລ່າເມືອງຂຶ້ນແບບເກົ່າ ແລະ ແບບໃໝ່, ປົດປ່ອຍປະເທດຊາດ,  ທັງນຳພາປະເທດຊາດກ້າວຂຶ້ນບົນເສັ້ນທາງອັນສະຫວ່າງສະໄຫວ.

ທ່ານ ປະທານ ສຸພານຸວົງ ແມ່ນຜູ້ນຳທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື້ອຮັກແພງມິດສະຫາຍຢ່າງຈິງໃຈ; ເປັນນັກປັນຍາຊົນຜູ້ຍິ່ງໃຫຍ່, ເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ, ມີທັດສະນະຫຼັກໝັ້ນອັນໜັກແໜ້ນ, ມີນ້ຳໃຈເສຍສະຫຼະອັນສູງສົ່ງ ເພື່ອຊາດ ເພື່ອປະຊາຊົນ; ຕະຫຼອດຊີວິດຂອງ ທ່ານ ປະທານ ສຸພານຸວົງ ບໍ່ວ່າຈະຢູ່ໃນຕຳແໜ່ງໃດ, ຄວາມຮັກຜິດຊອບອັນໃດ ເພີ່ນກໍໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວບັນດາເຜົ່າ.

ພ້ອມກັນນີ້, ກໍໄດ້ມີການປະກອບຄຳຄິດຄຳເຫັນສົນທະນາກ່ຽວກັບຊີວິດ ແລະ ການເຄື່ອນໄຫວປະຕິວັດ ຂອງທ່ານ ປະທານ ສຸພານຸວົງ ຕໍ່ພະນັກງານ, ຊາວໜຸ່ມ-ເຍົາວະຊົນ ເຊິ່ງເຮັດໃຫ້ສະມາຊິກພັກ, ພະນັກງານ-ລັດຖະກອນ ແລະ ຊາວໜຸ່ມ-ເຍົາວະຊົນ ໄດ້ຮັບຮູ້, ເຊື່ອມຊຶມ ແລະ ກໍາແໜ້ນກ່ຽວກັບບັນດາຜົນງານຂອງທ່ານ ປະທານ ສຸພານຸວົງ ຜູ້ນຳພັກ-ລັດ ຜູ້ນຳທີ່ແສນເຄົາລົບຮັກຂອງພວກເຮົາ ໃນການຕໍ່ສູ້ກັບພວກລ່າເມືອງຂຶ້ນແບບເກົ່າ ແລະ ແບບໃໝ່; ໄດ້ຮໍ່າຮຽນເອົາມູນເຊື້ອຮັກຊາດ, ຄວາມສາມັກຄີ, ນ້ຳໃຈຕໍ່ສູ້ກູ້ຊາດບໍ່ຍອມຈຳນົນອັນພິລະອາດຫານ ແລະ ນໍ້າໃຈເສຍສະຫຼະອັນສູງສົ່ງຂອງຜູ້ນຳພັກ-ລັດ ທີ່ມີຕໍ່ປະເທດຊາດ ທັງສືບຕໍ່ຮ່ຳຮຽນເອົາແບບຢ່າງທີ່ອົດທົນ, ຝຶກຝົນຫຼໍ່ຫຼອມຕົນເອງ ໃຫ້ກາຍເປັນເຍົາວະຊົນ, ຊາວໜຸ່ມ ຜູ້ທີ່ມີຄຸນສົມບັດ, ມີແບບແຜນດຳລົງຊີວິດທີ່ປອດໃສຂາວສະອາດ ແລະ ເປັນຜູ້ສືບທອດທີ່ດີຂອງປະເທດຊາດຕໍ່ໄປ.

2019-08-07

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ