ແນະນຳ ສນຊ (LFND)

ເຊັນສັນຍາ ວ່າດ້ວຍການຊື້-ຂາຍເບ້ຍໄມ້ ແລະ ຝຸ່ນ

ກຸ່ມບໍລິສັດ ພົງສະຫວັນ ຈໍາກັດ ແລະ ລັດວິສາຫະກິດສ່ວນບຸກຄົນ ກິມລ໋ອງ ກໍ່ສ້າງ ແລະ ການຄ້າ ແຂວງເຊີນລາ ສສ ຫວຽດນາມ ໄດ້ຈັດພິທີເຊັນສັນຍາ ວ່າດ້ວຍການຊື້-ຂາຍ ເບ້ຍໄມ້ອຸດສາຫະກໍາ ແລະ ຝຸ່ນໃນວັນທີ 5 ສິງຫາ ຜ່ານມານີ້, ທີ່ສູນກາງແນວລາວສ້າງຊາດ (ສນຊ) ເບ້ຍໄມ້ອຸດສາຫະກໍາ ແລະ ຝຸ່ນ ລະຫວ່າງ ກຸ່ມບໍລິສັດ ພົງສະຫວັນ ຈໍາກັດ, ວິສາຫະກິດສ່ວນບຸກຄົນ ກິມລ໋ອງ ກໍ່ສ້າງ ແລະ ການຄ້າ ແຂວງເຊີນລາ ສສ ຫວຽດນາມ ແລະ ແນວລາວສ້າງຊາດ ແຂວງໄຊສົມບູນເປົ້າໝາຍປູກເປັນສວນທົດລອງຢູ່ໂຄງການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ເຂດຈຸດສຸມ 516 ບ້ານແກ່ວສາມີ, ເມືອງລ້ອງຊານ ແຂວງໄຊສົມບູນເປັນກຽດເຂົ້າຮ່ວມ ໃນພິທີເຊັນສັນຍາຄັ້ງນີ້ ໂດຍທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານ ສນຊ, ມີຮອງປະທານ ສນຊ, ເຈົ້າເມືອງລ້ອງຊານ, ປະທານໃຫຍ່ ຂາຮຸ້ນ ກຸ່ມບໍລິສັດພົງສະຫວັນ ຈໍາກັດ ພ້ອມຄະນະ.

ເບ້ຍໄມ້ກິນໝາກທີ່ຈະນໍາມາປູກ ໃນສວນທົດລອງແບບຢ່າງ 7 ປະເພດ, ປູກໃນເນື້ອທີ່ 20 ເຮັກຕາ ຂອງໂຄງການ ໃນນັ້ນມີ ຕົ້ນໝາກມ່ວງ 1800 ເບ້ຍ, ອາໂວກາໂດ 1500 ເບ້ຍ ໝາກໝັ້ນ 1200 ເບ້ຍ, ລໍາໄຍ 1800 ເບ້ຍ, ຕົ້ນສະໝູນໄພ (ໂສມ) 4000 ເບ້ຍ, ຕົ້ນໄມ້ອຸດສາຫະກໍາ 1000 ເບ້ຍ, ຕົ້ນໝາກພຸກ 1800 ເບ້ຍ. ເປົ້າໝາຍປູກເປັນສ່ວນຕົວແບບຈາກນັ້ນຈະຂະຫຍາຍໄປປູກໃນແຂວງອື່ນໆ ຕາມຄວາມສາມາດ ພ້ອມທັງສ້າງເປັນສູນເພາະພັນທົດລອງກ້າເບ້ຍໄມ້ເພື່ອຈໍາໝ່າຍໃຫ້ແຂວງອື່ນໆພາຍໃນປະເທດ.
ເຕັກນິກໃນການປູກແມ່ນມີຊ່ຽວຊານຈາກວິສາຫະກິດສ່ວນບຸກຄົນ ກິມລ໋ອງ ກໍ່ສ້າງ ແລະ ການຄ້າ ແຂວງເຊີນລາ ສສ ຫວຽດນາມ ມາສິດສອນ ພ້ອມທັງຈັດສົ່ງພະນັກງານເຕັກນິກການປູກ, ບົວລະບັດຮັກສາ 2 ຄົນມາປະຈໍາຢູ່ໂຄງການພ້ອມທັງສິດສອນໃຫ້ຄົນລາວໄປພ້ອມ. ຫຼັງຈາກນັ້ນ, ມອບໃ້ວິຊາການຄົນລາວສືບຕໍ່ຄຸ້ມຄອງ ແລະ ປົກປັກຮັກສາຕໍ່ໄປ.
ສໍາລັບຜົນຂອງການຜະລິດເບ້ຍໄມ້ທາງບໍລິສັດແມ່ນຈະເກັບຊື້ຄືນທັງໝົດຕາມລາຄາທ້ອງຕະຫຼາດ. ໂຄງການດັ່ງກ່າວໄດ້ຮັບການສະໜັບສະໜູນທືນຮອນຈາກກຸ່ມບໍລິສັດພົງສະຫວັນ ຈໍາກັດ.
ໂຄງການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ເຂດຈຸດສຸມ 516 ເມືອງລ້ອງຊານຂອງກຸ່ມບໍລິສັດ ພົງສະຫວັນຈໍາກັດ ເປັນການສ້າງເຂດທົດລອງ ໃນເຂດເມືອງລ້ອງຊານ ແຂວງໄຊສົມບູນໃຫ້ເປັນແບບຢ່າງໃນການພັດທະນາ ແລະ ເປັນສູນຮຽນຮູ້ດ້ານກະສິກໍານັບແຕ່ການປູກ, ການບໍາລຸງຮັກສາ, ການເກັບກ່ຽວຜົນຜະລິດການຈໍາໜ່າຍ ແລະ ການແປຮູບເປັນຜະລິດຕະພັນຕ່າງໆ ພ້ອມກັນນັ້ນ ຍັງເຮັດໃຫ້ປະຊາຊົນສາມາດຮຽນຮູ້ດ້ານເຕັກນິກວິຊາການ, ສາມາດກຸ້ມຕົນເອງ ໃນການປະກອບອາຊີບ ແລະ ສ້າງລາຍຮັບໃຫ້ແກ່ຄອບຄົວ ເພື່ອຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເທື່ອລະກ້າວຕາມນະໂຍບາຍການແກ້ໄຂຄວາມທຸກຍາກຂອງພັກ ແລະ ລັດຖະບານ.
ຮ່ວມລົງນາມ ໃນສັນຍາຄັ້ງນີ້, ມີທ່ານ ສີວິໄລ ພົມມະຈັກ ຮັກສາການຜູ້ອໍານວຍການໃຫຍ່ກຸ່ມບໍລິສັດ ພົງສະຫວັນ ຈໍາກັດ, ທ່ານ ລໍ່ ວັນ ຢຸງ ປະທານສະພາບໍລິຫານ ອໍານວຍການວິສາຫະກິດສ່ວນບຸກຄົນ ກິມລ໋ອງກໍ່ສ້າງ ແລະ ການຄ້າ, ທ່ານເລັ່ງຊົງ ຕົງສີ ປະທານແນວລາວສ້າງຊາດແຂວງໄຊສົມບູນ.

2019-08-08

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ