ແນະນຳ ສນຊ (LFND)

ກອງປະຊຸມພົບປະແລກປ່ຽນບັນດາການຈັດຕັ້ງສັງຄົມອ້ອມຂ້າງສູນກາງ ແລະ ນະຄອນຫຼວງວຽງຈັນ

ໃນວັນທີ 6 ສິງຫາ 2019 ນີ້, ທີ່ສູນກາງແນວລາວສ້າງຊາດ ໄດ້ຈັດກອງປະຊຸມພົບປະແລກປ່ຽນ ບັນດາການຈັດຕັ້ງສັງຄົມ, ມູນນິທິ ທົ່ວນະຄອນຫຼວງວຽງຈັນ ໂດຍການເປັນປະທານຂອງທ່ານ ປອ ໄຊສົມພອນ ພົມວິຫານ  ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ), ເປັນກຽດເຂົ້າຮ່ວມມີທ່ານ ເຍ່ຍເກີຢາ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ, ມີທ່ານ ອໍາພາ ສິມມະລອນ ຫົວໜ້າກົມພັດທະນາ ກະຊວງພາຍໃນ, ມີທ່ານ ບຸນທ່ຽງ ຂຸນສີ ປະທານແນວລາວສ້າງຊາດນະຄອນຫຼວງ, ບັນດາທ່ານຮອງປະທານ (ສນຊ) , ບັນດາທ່ານ ຫົວໜ້າຫ້ອງການ, ຫົວໜ້າກົມ, ສູນຝຶກອົບຮົມ ແລະ ບັນດາທ່ານປະທານ, ຮອງປະທານສະມາຄົມ, ມູນນິທິ ພ້ອມດ້ວຍສະມາຊິກອ້ອມຂ້າງສູນກາງທົ່ວນະຄອນຫຼວງວຽງຈັນເຂົ້າຮ່ວມ.

ທ່ານ ໄທລໍ ຫວ່າເຊັ້ງ ຫົວໜ້າກົມຊັ້ນຄົນ-ການຈັດຕັ້ງສັງຄົມ ໄດ້ລາຍງານການເຄື່ອນໄຫວວຽກງານການຈັດຕັ້ງສັງຄົມ ໃນໄລຍະຜ່ານມາ ກົມຊັ້ນຄົນ-ການຈັດຕ້ັງສັງຄົມ ໄດ້ປະຕິບັດໜ້າທີ່ເປັນເສນາທິການທາງດ້ານວິຊາການວຽກງານການຈັດຕັ້ງສັງຄົມ ໃຫ້ຄະນະປະຈໍາສູນກາງແນວລາວສ້າງຊາດ ເຊິ່ງຍາມໃດພັກ-ລັດ ແລະ ສູນກາງແນວລາວສ້າງຊາດ ກໍ່ໄດ້ໃຫ້ຄວາມສໍາຄັນ, ຊຸກຍູ້ການຈັດຕັ້ງສັງຄົມ ເຄື່ອນໄຫວຕາມພາລະບົດບາດຂອງຕົນ, ໃນໄລຍະ 1 ປີ ຜ່ານມາບັນດາສະມາຄົມ, ມູນນິທິ ທັງຫຼາຍລ້ວນແຕ່ໄດ້ປະກອບສ່ວນຕໍ່ການພັດທະນາເສດຖະກິດ-ສັງຄົມ. ມາເຖິງປັດຈຸບັນທົ່ວປະເທດມີສະມາຄົມ ທັງໝົດ 167 ສະມາຄົມ, ໃນນັ້ນສະມາຄົມທີ່ຂຶ້ນກັບຂັ້ນສູນກາງຄຸ້ມຄອງ (ກະຊວງພາຍໃນ) ມີ 46 ສະມາຄົມ ແລະ 1 ກຸ່ມການຜະລິດ, ສະມາຄົມທີ່ຂຶ້ນກັບທ້ອງຖິ່ນຄຸ້ມຄອງ (ແຂວງ, ນະຄອນຫຼວງ) ມີ 109 ສະມາຄົມ, ມີມູນິທິທັງໝົດ 25 ມູນນິທິ, ຂຶ້ນກັບສູນກາງຄຸ້ມຄອງ ມີ 18 ມູນນິທິ, ຢູ່ຂັ້ນແຂວງ, ນະຄອນຫຼວງມີ 7 ມູນນິທິ.

          ໃນໂອກາດນີ້, ທ່ານ ປອ ໄຊສົມພອນ ພົມວິຫານ ໄດ້ໂອ້ລົມຕື່ມບາງເນື້ອໃນດັ່ງນີ້: ກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງບັນດາສະມາຄົມ, ມູນນິທິທີ່ໄດ້ປະກອບສ່ວນຢ່າງຫ້າວຫັ້ນ ໃນການຊ່ວຍ ເຫຼືອບັນເທົາທຸກໃຫ້ປະຊາຊົນບັນດາເຜົ່າທີ່ພົບໄພພິບັດ; ພ້ອມດຽວກັນນັ້ນ ກໍໄດ້ມີຫຼາຍສະມາຄົມ, ມູນນິທິໄດ້ໃຫ້ການຊ່ວຍເຫຼືອໃນການກໍ່ສ້າງ, ສ້ອມແປງໂຮງຮຽນ, ສຸກສາລາ, ກໍ່ສ້າງນໍ້າລິນ, ນໍ້າບາດານ, ຂົວ-ທາງ, ສ້າງອາຊີບ, ມອບອຸປະກອນການຮຽນ, ອຸປະກອນກິລາ, ເຄື່ອງນຸ່ງຮົ່ມ, ເຄື່ອງບໍລິໂພກ ແລະ ໄດ້ປະກອບສ່ວນດ້ານອື່ນໆຕື່ມອີກໃນຫຼາຍແຂວງໃນທົ່ວປະເທດ. ນອກຈາກນີ້, ທ່ານໄດ້ມີບາງຄໍາເຫັນເນັ້ນຕື່ມວ່າ: ໃຫ້ບັນດາທ່ານປະທານ, ຮອງປະທານ ແລະ ຄະນະຂອງສະມາຄົມ, ມູນິທິທັງຫຼາຍຈົ່ງກໍາ

ແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ລະບຽບການສະເພາະຂອງຕົນ ເພື່ອສຶກສາອົບຮົມການເມືອງ-ແນວຄິດ, ເຜີຍແຜ່ ແນະນໍາສະມາຊິກຂອງຕົນໃຫ້ຮັບຮູ້, ກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ລະບຽບການ ສະເພາະຂອງຕົນຢ່າງເລິກເຊິ່ງ; ເພີມທະວີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ແລກປ່ຽນ-ບົດຮຽນ, ປະສົບການນໍາກັນ ເພື່ອເຮັດໃຫ້ຜູ້ທີ່ມີປະສົບການທີ່ເຂັ້ມແຂງ, ຊ່ວຍຜູ້ທີ່ກໍາລັງກໍ່ຮ່າງສ້າງຕົວໃໝ່ ສືບຕໍ່ເຄື່ອນໄຫວ ແລະ ກ້າວເດີນໄປດ້ວຍກັນຢ່າງໝັ້ນຄົງ ຄຽງຄູ່ກັນນັ້ນ, ເພີ່ມທະວີນໍ້າໃຈຮັກຊາດ, ເສີມຂະຫຍາຍມູນເຊື້ອຄວາມສາມັກຄີປອງດອງ, ຄວາມເປັນເອກະລາດ ເປັນເຈົ້າຕົນເອງ ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ , ເອົາໃຈໃສ່ປັບປຸງການຈັດຕັ້ງຂອງຕົນເປັນປົກກະຕິ; ນໍາໃຊ້ບົດຮຽນຕົວຈິງ ບວກໃສ່ບົດຮຽນຂອງບັນດາການຈັດຕັ້ງສະມາຄົມ, ມູນນິທິຂອງບັນດາປະເທດ ທີ່ປະສົບຜົນສໍາເລັດ ເພື່ອມາດັດປັບມານໍາໃຊ້ຢູ່ປະເທດຂອງພວກເຮົາ ໃຫ້ເກີດຜົນປະໂຫຍດສູງສຸດ. ໃນການເຄື່ອນໄຫວຂອງຕົນນອກຈາກມີລະບຽບ, ມີແຜນການເຄື່ອນໄຫວ, ມີການຕິດຕາມ-ກວດກາ, ປະເມີນຜົນຂອງວຽກງານດັ່ງກ່າວນີ້ແລ້ວ ໃນນັ້ນໃຫ້ຖືສໍາຄັນການນໍາໃຊ້ ແລະ ກໍ່ສ້າງບຸກຄະລາກອນໃຫ້ເປັນມືອາຊີບ, ມີຄວາມໂປ່ງໃສ, ເຮັດວຽກເພື່ອສັງຄົມຢ່າງແທ້ຈິງ ແລະ ພ້ອມກັນເຂົ້າຮ່ວມທຸກຂະບວນການທີ່ສໍາຄັນຂອງພັກຂອງຊາດ.

2019-08-09

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ