ແນະນຳ ສນຊ (LFND)

ສຳເລັດກອງປະຊຸມຝຶກອົບຮົມວຽກງານແນວລາວສ້າງຊາດ ໃຫ້ 3 ເມືອງ ຂອງນະຄອນຫຼວງວຽງຈັນ

ໃນວັນທີ 5-7 ສິງຫາ 2019 ນີ້, ສູນຝຶກອົບຮົມ ສູນກາງແນວລາວສ້າງຊາດ(ສນຊ) ໄດ້ຈັດກອງປະຊຸມ ຝຶກອົບຮົມວຽກງານແນວລາວສ້າງຊາດ ໃຫ້ພະນັກງານແນວລາວສ້າງຊາດ 3 ເມືອງ ຂອງນະຄອນຫຼວງວຽງຈັນ ຄື: ເມືອງຈັນທະບູລີ, ເມືອງສີໂຄດຕະບອງ ແລະ ເມືອງສັງທອງ, ໂດຍການເປັນປະທານຂອງ ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ບັນດາທ່ານຕາງໜ້າແນວລາວສ້າງຊາດເມືອງ ແລະ ແນວລາວສ້າງຊາດຂັ້ນບ້ານ 125 ບ້ານ ຂອງ 3 ເມືອງດັ່ງກ່າວ ເຂົ້າຮ່ວມ.

ກອງປະຊຸມຝຶກອົບຮົມຄັ້ງນີ້, ໄດ້ຮັບຟັງການຫວນຄືນປະຫວັດການກຳເນີດ, ການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີ ຂອງແນວລາວສ້າງຊາດ ໂດຍຫຍໍ້, ໄດ້ຮັບຟັງການເຜີຍແຜ່ເຊື່ອມຊຶມກົດໝາຍ ວ່າດ້ວຍແນວລາວສ້າງຊາດ ສະບັບປັບປຸງ ປີ 2018, ວຽກງານໂຄສະນາ-ຂົນຂວາຍປະຊາຊົນ,  ວຽກງານສາສະໜາ, ວຽກງານຊົນເຜົ່າ ແລະ ວຽກງານຊັ້ນຄົນ-ອົງການຈັດຕັ້ງສັງຄົມ. ພ້ອມກັນນີ້, ບັນດານັກສຳມະນາກອນທີ່ເຂົ້າຮ່ວມ ໄດ້ປະກອບຄຳຄິດຄຳເຫັນແລກປ່ຽນບັດຮຽນເຊິ່ງກັນ ແລະ ກັນ ຢ່າງກົງໄປກົງມາ ຕໍ່ບັນດາເນື້ອໃນເອກະສານ  ເຮັດໃຫ້ນັກສຳມະນາກອນສາມາດຮັບຮູ້ ແລະ ເຂົ້າໃຈຕໍ່ເນື້ອໃນຈິດໃຈຂອງກອງປະຊຸມໄດ້ຢ່າງເລິກເຊິ່ງ.

ໂອກາດນີ້, ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ ໄດ້ມີບາງຄຳເຫັນໂອ້ລົມຕື່ມວ່າ: ໃຫ້ແນວລາວສ້າງຊາດບ້ານຈົ່ງສືບຕໍ່ເປັນຄັນທຸງເຕົ້າໂຮມຄວາມສາມັກຄີປອງດອງ ປະຊາຊົນລາວບັນດາເຜົ່າ, ສ້າງຄວາມເຂັ້ມແຂງ ແລະ ປັບປຸງກຳລັງແຮງທົ່ວປວງຊົນ, ສຶກສາອົບຮົມ, ປຸກລະດົມປະຊາຊົນເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເສີມຂະຫຍາຍສິດເປັນເຈົ້າໃນການປົກປັກຮັກສາວັດທະນະທຳ ແລະ ຮີດຄອງປະເພນີອັນດີງາມ ຂອງປະຊາຊົນລາວບັນດາເຜົ່າ, ລົງໃກ້ສິດຕິດແທດ, ເກັບກຳຄຳຄິດຄຳເຫັນ ແລະ ຄວາມມຸ່ງມາດປາດຖະໜາ ຂອງປະຊາຊົນລາວບັນດາເຜົ່າ.

ພ້ອມດຽວກັນນັ້ນ, ນັກສຳມະນາກອນທັງໝົດໄດ້ຮ່ວມປູກຕົ້ນໄມ້ຈັນຫອມ ຈຳນວນ 1 ຕົ້ນ ຮ່ວມກັບ ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຢູ່ທີ່ສຳນັກງານສູນກາງແນວລາວສ້າງຊາດ ອີກດ້ວຍ.

2019-08-09

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ