ແນະນຳ ສນຊ (LFND)

ພິທີມອບ-ຮັບເຄື່ອງຊ່ວຍເຫຼືອ ຢູ່ໂຮງໝໍມະໂຫສົດ

ເນື່ອງໃນໂອກາດວັນສ້າງຕັ້ງແນວລາວສ້າງຊາດ ຄົບຮອບ 69 ປີ ແລະ ເພື່ອເປັນການຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ໃນວັນທີ 13 ສິງຫາ 2019 ທີ່ໂຮງໝໍມະໂຫສົດ ໄດ້ມີພິທີມອບ-ຮັບ ເຄື່ອງຊາວຍເຫຼືອ ໂດຍເປັນກຽດ ມອບເຄື່ອງຊ່ວຍເຫຼືອ ຂອງທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີທ່ານ ຮສ. ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານ ດຣ. ພິສິດ ພຸດສະຫວັດ ຜູ້ອໍານວຍການໂຮງໝໍ ມະໂຫ ສົດ ພ້ອມດ້ວຍບັນດາຄະນະອໍານວຍການ, ພະນັກງານແພດ-ໝໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີຄັ້ງນີ້ ທ່ານ ປະທານສູນກາງແນວລາວສ້າງຊາດ ໄດ້ຮັບຟັງບົດລາຍງານສະຫຼຸບຫຍໍ້ກ່ຽວກັບການເຝົ້າລະ ວັງ, ຄວບຄຸ້ມ ແລະ ປິ່ນປົວພະຍາດໄຂ້ຍຸງລາຍ ໃນໄລຍະຜ່ານມາ ຈາກທ່ານ ຮອງຜູ້ອໍານວຍການໂຮງໝໍມະໂຫສົດ, ຈາກນັ້ນໄດ້ຮັບຟັງການໂອ້ລົມຈາກທ່ານປະທານສູນກາງແນວລາວສ້າງຊາດ ເຊິ້ງທ່ານໄດ້ເນັ້ນ ໃຫ້ແພດ-ໝໍ, ພາກສ່ວນທີ່ກ່ຽວຂ້ອງທຸກຂັ້ນ, ທຸກພາກສ່ວນ ເອົາໃຈໃສ່ໃນການເຝົ້າລະວັງການແຜ່ລະບາດຂອງພະຍາດຕ່າງໆທີ່ເກີດຂຶ້ນ ໂດຍສະເພາະ ພະຍາດໄຂ້ຍຸງ ແລະ ພະຍາດອື່ນໆ... ພ້ອມດຽວກັນນັ້ນ ກະຊວງສາທາລະນະສຸກ, ພະແນກສາທາລະນະສຸກ ສົມທົບກັບພາກສ່ວນທີ່ກ່ຽວຂ້ອງ ໃຫ້ຄໍາແນະນໍາ, ການໂຄສະນາ ແລະ ໃຫ້ຄວາມຮູ້ ກ່ຽວກັບຜົນຮ້າຍຂອງພະຍາດດັ່ງກ່າວໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ ເພື່ອໃຫ້ເຂົາເຈົ້າມີຄວາມຕື່ນຕົວ ເປັນເຈົ້າການໃນການຮັກສາສຸຂະພາບ ແລະ ຮັກສາຄວາມສະອາດແນ່ໃສ່ເຮັດໃຫ້ທຸກຄົນ, ທຸກຄອບຄົວມີສຸຂະພາບແຂງແຮງປາສະຈາກໂລກໄພໄຂ້ເຈັບ ເວົ້າລວມ, ເວົ້າສະເພາະ ແມ່ນການຊ່ວຍກັນຕ້ານ ແລະ ສະກັດກັ້ນ ການແຜ່ລະບາດຂອງພະຍາດໄຂ້ເລືອດອອກທີ່ພວມແຜ່ລະບາດໃນຫຼາຍທ້ອງຖິ່ນໃຫ້ຫຼຸດໜ້ອຍຖ້ອຍລົງ, ພ້ອມກັນນັ້ນ ທ່ານ ປະທານສູນກາງແນວລາວສ້າງຊາດ ໄດ້ມອບ ເຄື່ອງຊ່ວຍເຫຼືອ ເຊິ່ງເປັນ ອຸປະກອນການແພດ, ຢາ, ເຄື່ອງອຸປະໂພກ, ບໍລິໂພກ ແລະ ອາຫານ ລວມມູນຄ່າ 60 ລ້ານກີບ ມອບໃຫ້ ໂຮງໝໍມະໂຫສົດ ນະຄອນຫຼວງວຽງຈັນຕື່ມອີກ ເຊິ່ງເຄື່ອງດັ່ງກ່າວໄດ້ຮັບການສະໜັບສະໜູນຈາກທະ ນາຄານ ພົງສະຫວັນ.

          ໃນໂອກາດນີ້, ທ່ານຜູ້ອໍານວຍການໂຮງໝໍມະໂຫສົດ ໄດ້ຕາງໜ້າໃຫ້ພະນັກງານແພດ-ໝໍກ່າວສະແດງຄວາມຂອບໃຈເປັນຢ່າງສູງຕໍ່ການປະກອບສ່ວນຊ່ວຍເຫຼືອຂອງ ທ່ານປະທານສູນກາງແນວລາວສ້າງຊາດ ສໍາລັບເຄື່ອງຊ່ວຍ ເຫຼືອໃນຄັ້ງນີ້, ທາງໂຮງໝໍແມ່ນຈະໄດ້ແຈກຢາຍໃຫ້ຄົນເຈັບ ແລະ ພໍ່ແມ່ປະຊາຊົນທີ່ມາເຝົ້າຄົນເຈັບ ສ່ວນເຄື່ອງອຸປະ ກອນການແພດ ແລະ ຢາ ຈະນໍາໃຊ້ເຂົ້າໃນການບໍລິການ, ແລະ ການປິ່ນປົວ ຢູ່ໂຮງໝໍໃຫ້ເກີດປະໂຫຍດສູງສຸດ

            ຫຼັງຈາກນັ້ນ ທ່ານ ປອ ໄຊສົມພອນ ພົມວິຫານ ພ້ອມດ້ວຍຄະນະ ກໍ່ໄດ້ຢ້ຽມຢາມ ແລະ ແຈກຢາຍເຄື່ອງອຸປະໂພກ, ບໍລິໂພກ ແລະ ອາຫານຈໍານວນໜຶ່ງໃຫ້ແກ່ຄົນເຈັບທີ່ປິ່ນປົວຢູ່ໂຮງໝໍດັ່ງກ່າວຕື່ມອີກ.

2019-08-16

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ