ແນະນຳ ສນຊ (LFND)

ສນຊ ປາຖະກະຖາວັນສ້າງຕັ້ງແນວລາວສ້າງຊາດ ຄົບຮອບ 69 ປີ

ໃນວັນທີ 12 ສິງຫາ 2019 ນີ້, ຢູ່ສໍານັກງານສູນກາງແນວລາວສ້າງຊາດໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 69 ປີ(13 ສິງຫາ 1950-13 ສິງຫາ 2019) ໂດຍການໃຫ້ກຽດປາຖະກະຖາຂອງ ທ່ານ ສຈ.ດຣ ພັນດວງຈິດ ວົງສາ, ອາດີດກຳມະການສູນກາງພັກ, ອາດີດປະທານສູນກາງແນວລາສ້າງຊາດ, ມີບັນດາຮອງປະທານ, ຫົວໜ້າກົມ, ຮອງຫົວໜ້າກົມ, ອົງການຈັດຕັ້ງມະຫາຊົນ, ບັນດາສະມາຄົມ, ບັນດາສາສະໜາຕ່າງໆ ແລະ ຕະຫຼອດຮອດພະນັກງານທົ່ວສໍານັກງານສູນກາງແນວລາວສ້າງຊາດເຂົ້າຮ່ວມ. 

ການປາຖະກະຖາໃນຄັ້ງນີ້, ທ່ານໄດ້ຍົກໃຫ້ເຫັນປະຫວັດຄວາມເປັນມາ, ມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວໃນຕະຫຼອດໄລຍະ 69 ປີ. ໂດຍຜ່ານ 3 ໄລຍະປະຫວັດສາດຄື: ໄລຍະແນວລາວອິດສະຫຼະ, ໄລຍະແນວລາວຮັກຊາດ ແລະ ໄລຍະແນວລາວສ້າງຊາດໃນປັດຈຸບັນ. ນັບແຕ່ມື້ສ້າງຕັ້ງແນວລາວອິດສະຫຼະແມ່ນໄດ້ປະຕິບັດບົດບາດອອກໜ້າແທນພັກ ເພື່ອເຕົ້າໂຮມກ້ອນກຳລັງສຳພັນທະພາບລະຫວ່າງຊົນຊັ້ນກຳມະກອນ-ຊາວກະສິກອນ ແລະ ບັນດາກຳລັງການເມືອງ, ກຳລັງການຈັດຕັ້ງສັງຄົມຕ່າງໆ, ອອກແຮງເຕົ້າໂຮມຄວາມສາມັກຄີປອງດອງທົ່ວປວງຊົນທັງຊາດ, ສຳພັນພິເສດກັບກອງທັບ ແລະ ປະຊາຊົນຫວຽດນາມອ້າຍນ້ອງ, ສຳພັນ 3 ຊາດອິນດູຈີນ, ເຮັດສຳເລັດພາລະກຳປະຫວັດສາດອັນສະຫງ່າອົງອາດຄື: ປົດປ່ອຍປະເທດຊາດອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າບັງຄັບໃຫ້ພວກລ່າເມືອງຂຶ້ນແບບເກົ່າຕ້ອງເຊັນສັນຍາເຊີແນວ 1954 ຍອມຮັບຮູ້ ເອກະລາດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ; ພ້ອມກັນນັ້ນຍັງໄດ້ຕາງໜ້າພັກເຄື່ອນໄຫວ ເພື່ອຕໍ່ສູ້ກັບຈັກກະພັດ ແລະ ລູກມືຂາຍຊາດ ທາງດ້ານການເມືອງ, ການທະຫານ, ການຕ່າງປະເທດ ປຸກລະດົມຂົນຂວາຍມະຫາຊົນ ກໍ່ຄືປະຊາຊົນລາວບັນດາຊົນເຜົ່າເຂົ້າຮ່ວມສ້າງພື້ນຖານ ແລະ ກຳລັງປະຕິວັດ, ຊຶ່ງໄດ້ສ້າງຖ່ວງທ່າ ແລະ ບາດກ້າວໃໝ່ໃຫ້ແກ່ຂະບວນການປະຕິວັດ, ສ້າງເງື່ອນໄຂ ແລະ ກະກຽມທຸກດ້ານ ເພື່ອສ້າງຕັ້ງພັກປະຊາຊົນລາວ ແລະ ໄດ້ຕາງໜ້າພັກແບກຫາບພາລະກິດອັນໜັກໜ່ວງ, ນຳພາປະຊາຊົນລາວບັນດາເຜົ່າຕໍ່ສູ້ຕີເອົາຊະນະຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່.
ໃນຕອນທ້າຍທ່ານຍັງໄດ້ເນັ້ນໃຫ້ສະມາຊິກພັກ, ພະນັກງານລັດຖະກອນພາຍໃນສຳນັກງານສູນກາງແນວລາວສ້າງຊາດຈົ່ງເສີມຂະຫຍາຍມູນເຊື້ອອັນຄວາມສາມັກຄີປະຊາຊົນລາວບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ນັບທັງຄົນເຊື້ອຊາດລາວທີດຳລົງຊີວິດຢູ່ຕ່າງປະເທດ ແລະ ຄົນຕ່າງດ້າວທີດຳລົງ ຊີວິດຢູ່ ສປປ ລາວ ໃຫ້ເປັນປຶກແຜນແໜ້ນໜາຍາມໃດກໍມີຄວາມຈົງຮັກພັກດີ, ສັດຊື່ບໍລິສຸດ, ເດີນຕາມ ເສັ້ນທາງຂອງພັກ, ຫັນລົງກໍ່ສ້າງຮາກຖານການເມືອງຕິດພັນກັບປະຊາຊົນ, ເພີ່ມທະວີປັບປຸງລະບົບການ ຈັດຕັ້ງໃຫ້ໜັກແໜ້ນ ແລະ ຍົກສູງຄຸນນະພາບຂອງພະນັກງານໃຫ້ມີຄວາມຮູ້ຄວາມສາມາດ; ເອົາໃຈໃສເພີ່ມທະວີວຽກງານການທູດປະຊາຊົນ ແລະ ຈົ່ງຮັກສາສືບທອດມູນເຊື້ອປະຫວັດສາດອັນອົງອາດກ້າແກ່ນ ແລະ ໝາກຜົນຂອງການປະຕິວັດທີຍາດມາໄດ້ໃນໄລຍະຜ່ານມາໃຫ້ຄົງຕະຫຼອດໄປ. ພ້ອມກັນນີ້, ສາສະໜາກາໂທລິກວຽງຈັນ ໄດ້ເຂົ້າອວຍພອນ ເນື່ອງໃນໂອກາດວັນສ້າງຕັ້ງແນວລາວສ້າງຊາດ ຄົບຮອບ 69 ປີ.

2019-08-16

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ