ແນະນຳ ສນຊ (LFND)

ພິທີປະກາດເມືອງທ່າພະບາດເປັນເມືອງປະຕິບັດຂະບວນການ ສ້າງຄອບຄົວ ແລະ ບ້ານສາມັກຄີປອງດອງ

ພິທີປະກາດເມືອງທ່າພະບາດ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວແນວລາວສ້າງຊາດ ເປັນເມືອງທຳອິດຂອງແຂວງບໍລິຄໍາໄຊ ເປັນເມືອງທີ 2 ຂອງ ສປປ ລາວ ເປັນກຽດເຂົ້າຮ່ວມມີ ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ, (ສນຊ), ທ່ານ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ ເຈົ້າແຂວງບໍລິຄໍາໄຊ, ມີທ່ານ ລໍາສະໄໝ ວໍລະສານ ປະທານແນວລາວສ້າງຊາດແຂວງໆບໍລິຄໍາໄຊ, ທ່ານ ດວງຕາ ມໍລະຄາສຸກ ເຈົ້າເມືອງໆທ່າພະບາດ ແລະ ແຂກຖືກເຊີນຈາກສູນກາງ, ແຂວງ, ບັນດາເມືອງອ້ອມຂ້າງ ຕະຫຼອດຮອດພໍ່ແມ່ປະຊາຊົນລາວບັນດາຊົນເຜົ່າພາຍໃນເມືອງເຂົ້າຮ່ວມຢ່າງພ້ອມພຽງ ທີ່ເດີນວັດທາດພຣະບາດ ເມືອງທ່າພະບາດ ໃນວັນທີ 13 ສິງຫາ 2019.

ເມືອງທາດພຣະບາດເປັນເມືອງໜຶ່ງໃນ 7 ເມືອງ ຂອງແຂວງບໍລິຄໍາໄຊ ໄດ້ຮັບການສ້າງຕັ້ງຂຶ້ນໃນວັນທີ 15 ພຶດສະພາ 1986 ,ປະກອບມີ 26 ບ້ານ, ມີພົນລະເມືອງທັງໝົດ 29,203 ຄົນ, ປະກອບມີ 6 ຊົນເຜົ່າ; ປະຊາຊົນຊາວເມືອງທ່າພະບາດມີມູນເຊື້ອຮັກຊາດ, ຮັກບ້ານເກີດເມືອງນອນ, ມີຄວາມດຸໝັ່ນຂະຫຍັນພຽນໃນການທຳມາຫາກິນລ້ຽງຊີບ, ມີຄວາມສາມັກຄີປອງດອງ ແລະ ມີຮີດຄອງປະເພນີວັດທະນະທຳທີ່ເປັນເອກະລັກຂອງຕົນມາແຕ່ດົນນານ; ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຢູ່ເມືອງທ່າພະບາດ ໄດ້ເລີ່ມມາແຕ່ປີ 2014 ໂດຍການຈັດຕັ້ງປະຕິບັດໂຄງການພັດທະນາກ້ອນກຳລັງມະຫາສາມັກຄີທົ່ວປວງຊົນ ເຊິ່ງເຮັດທົດລອງມີ 4 ຊຸດຄື: ຊຸດທີ 1 ມີ 3 ບ້ານ 1,050 ຄອບຄົວ, ຊຸດ 2 ມີ 6 ບ້ານ 1,366 ຄອບຄົວ; ຊຸດ 3 ມີ 8 ບ້ານ 1,237 ຄອບຄົວ ແລະ ຊຸດທີ 4 ມີ 9 ບ້ານ 1,245 ຄອບຄົວ, ທົ່ວເມືອງມີ 26 ບ້ານຖືກຮັບຮອງເປັນບ້ານສາມັກຄີປອງດອງຈໍານວນ 26 ບ້ານເທົ່າກັບ 100%, ແນວລາວສ້າງຊາດ ເມືອງທ່າພະບາດ ໄດ້ປັບປຸງຊີວິດການເປັນຢູ່ຂອງປະຊາຊົນໃຫ້ຮັ່ງມີເຂັ້ມແຂງ ໂດຍຖືເອົາການຜະລິດເປັນສິນຄ້າ, ປູກຟັງ, ລ້ຽງສັດ ແລະ ຄ້າຂາຍຈໍານວນໜຶ່ງ ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນເປັນກ້າວໆມາປະຈຸບັນມີຄອບຄົວພົ້ນທຸກ ຈໍານວນ 5,378 ຄອບຄົວ, ຄອບຄົວວັດທະນະທໍາ 4,785 ຄອບຄົວ ໂດຍປະຕິບັດຕາມມາດຕະຖານສ້າງຄອບຄົວ ແລະ ບ້ານສາມັກຄີປອງດອງ ຕາມຄຳແນະນຳ ຂອງສູນກາງແນວລາວສ້າງຊາດ. ສຳລັບປີ 2018 ນີ້ ຜ່ານການປະເມີນຄອບຄົວສາມັກຄີປອງດອງຕາມ 4 ມາດຖານ ໃນຈຳນວນຄອບຄົວທັງໝົດ 5,378 ຄອບຄົວ ມີ 4,898 ຄອບຄົວ ກວມ 98% ທີ່ສາມາດປະຕິບັດໄດ້ຕາມມາດຖານ ແລະ ບ້ານທີ່ໄດ້ຜ່ານການປະເມີນຜົນ ມີ 26 ບ້ານ, ຈຳນວນບ້ານທີ່ໄດ້ຮັບຮອງເປັນບ້ານສາມັກຄີປອງດອງ 26 ບ້ານ ເທົ່າກັບ 100% ແລະ ໄດ້ມອບໃບຢັ້ງຢືນເປັນບ້ານສາມັກຄີປອງດອງສຳເລັດ. ໂດຍອີງໃສ່ມາດຖານຄອບຄົວ ແລະ ບ້ານສາມັກຄີປອງດອງ ທີ່ໄດ້ກຳນົດໄວ້, ບັນດາຜົນງານທີ່ຍາດມາໄດ້ຫຼາຍປີຕິດຕໍ່ກັນ. ດັ່ງນັ້ນ, ສູນກາງແນວລາວ ສ້າງຊາດ ຈຶ່ງໄດ້ອອກຂໍ້ຕົກລົງວ່າດ້ວຍການຢັ້ງຢືນເມືອງທ່າພະບາດເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ເປັນເມືອງທຳອິດຂອງແຂວງບໍລິຄໍາໄຊ ເປັນກຽດກ່າວມອບໂດຍທ່ານ ຄໍາໃບ ດໍາລັດ ຮອງປະທານສູນກາງແນວລາວສ້າງຊາດ ແລະ ຮັບໂດຍທ່ານເຈົ້າເມືອງໆທ່າພະບາດ ເຊິ່ງໄດ້ຈັດພິທີ ມອບ-ຮັບ ຢ່າງ ສົມກຽດ.
ໃນພິທີດັ່ງກ່າວ, ທ່ານ ຄໍາໃບ ດໍາລັດ ໄດ້ເປັນກຽດໂອ້ລົມ ເຊິ່ງເນື້ອໃນບາງຕອນ ທ່ານໄດ້ເນັ້ນວ່າ: ຄະນະຮັບຜິດຊອບກໍຄືຄະນະກຳມະການແນວລາວສ້າງຊາດຂັ້ນເມືອງ-ບ້ານ ຈະຕ້ອງເອົາໃຈໃສ່ຮັກສານາມ ມະຍົດທີ່ໄດ້ປະກາດຮັບຮອງແລ້ວ ແລະ ນາມມະຍົດຕ່າງໆ ເພື່ອເສີມຂະຫຍາຍມູນເຊື້ອທີ່ຊາວເມືອງທ່າພະບາດໄດ້ເຮັດສຳເລັດໃນໄລຍະຜ່ານມາ ໃຫ້ເປັນແບບຢ່າງໃຫ້ແກ່ບັນດາເມືອງພາຍໃນແຂວງ ກໍຄືບັນດາແຂວງໃກ້ຄຽງ; ພ້ອມນີ້, ແນວລາວສ້າງຊາດຂັ້ນເມືອງ-ບ້ານ ສົມທົບກັບບັນດາຜູ້ຊົງຄຸນວຸດທິບັນດາຊົນເຜົ່າ ປະກອບສ່ວນຕາມມາດຖານການສ້າງຄອບຄົວ ແລະ ບ້ານສາມັກຄີປອງດອງ, ມາດຖານການສ້າງຄອບຄົວ ແລະ ບ້ານພັດທະນາ, ບ້ານວັດທະນະທຳ, ບ້ານແບບຢ່າງສາທາລະນະສຸກ, ເຂົ້າຮ່ວມຢ່າງຕັ້ງໜ້າໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ເພື່ອສ້າງໃຫ້ສັງຄົມມີຄວາມສະຫງົບ, ເປັນປລະບຽບຮຽບຮ້ອຍ ສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມຂອງເມືອງ ກໍຄືແຂວງໃຫ້ກ້າວໜ້າຂຶ້ນ ຢ່າງບໍ່ຢຸດຢັ້ງ;
ໃນໂອ້ກາດນີ້, ທ່ານຮອງປະທານສູນກາງແນວລາວສ້າງຊາດ ໄດ້ລັນຄ່ອງ 9 ບາດ ເພື່ອເປັນສີລິມຸງຄຸນ ພ້ອມກັນນີ້, ຍັງໄດ້ຮັບຊົມສິນລະປະຕື່ມອີກ.

2019-08-19

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ