ແນະນຳ ສນຊ (LFND)

ປະທານ ສນຊ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ

ໃນວັນທີ 19 ສິງຫາ 2019, ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ, ໂດຍໄດ້ຮັບການຕ້ອນຮັບຢ່າງອົບອຸ່ນຂອງທ່ານ ສັນຕິພາບ ພົມວິຫານ ກຳມະການສູນກາງພັກ, ເລຂາພັກແຂວງ, ເຈົ້າແຂວງແຂວງສະຫວັນນະເຂດ ແລະ ບັນດາທ່ານຄະນະພັກ, ຄະນະນຳຂອງແຂວງ.

ທ່ານ ເຈົ້າແຂວງສະຫວັນນະເຂດ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ ໂດຍສັງເຂບ ເຊິ່ງທ່ານໄດ້ໃຫ້ຮູ້ວ່າ ໃນໄລຍະຜ່ານມາ ໄດ້ຈັດຕັ້ງເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ສະມາຊິກພັກ, ພະນັກງານ ໄດ້ຮັບຮູ້ ແລະ ເຈົ້າໃຈຢ່າງເລິກເຊິ່ງ; ການພັດທະນາເສດຖະກິດຂອງແຂວງ 6 ເດືອນຕົ້ນປີ ປະຕິບັດລວມຍອດຜະລິດຕະພັນພາຍໃນ ໄດ້ໃນມູນຄ່າ 9,437 ຕື້ກີບ ເທົ່າກັບ 49,47% ຂອງແຜນການ; ໄດ້ສືບຕໍ່ສຸມໃສວຽກງານພັດທະນາຊົນນະບົດ ແກ້ໄຂຄວາມຍາກຂອງປະຊາຊົນ ໂດຍໄດ້ຍູ້ແຮງການສ້າງບ້ານພັດທະນາ, ການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍຢ່າງຕັ້ງໜ້າ. ພ້ອມກັນນີ້, ທ່ານຍັງໄດ້ຍົກໃຫ້ເຫັນ ວຽກງານປ້ອງກັນຊາດ-ປ້ອງກັນຄວາມສະຫງົບ, ການຈັດຕັ້ງປະຕິບັດໂຄງການລົງທຶນຂອງລັດ, ວຽກງານການຜະລິດກະສິກຳ, ວຽກງານດ້ານອຸດສາຫະກຳ, ການພັດທະນາພຶ້ນຖານໂຄງລ່າງ, ການພັດທະນາວັດທະນະທຳ-ສັງຄົມ, ວຽກງານສາທາລະນະສຸກ ແລະ ວຽກງານການສຶກສາ.

ໂອກາດນີ້, ທ່ານປະທານ ສນຊ ກໍໄດ້ພົບປະໂອ້ລົມກອງບັນຊາການປ້ອງກັນຄວາມສະຫງົບ  ແລະ ພົບປະໂອ້ລົມພະແນກກະສິກຳ-ປ່າໄມ້ ຂອງແຂວງ ເຊິ່ງໄດ້ຮັບຟັງການລາຍງານຂອງທ່ານ ພັອ ຄຳພົນ ສີຫະປັນຍາ ຄະນະປະຈຳພັກ, ຫົວໜ້າກອງບັນຊາການປ້ອງກັນຄວາມສະຫງົບຂອງແຂວງ ເຊິ່ງຜ່ານມາໄດ້ຈັດຕັ້ງປະຕິບັດ 4 ແຜນງານໃຫຍ່, 41 ໂຄງການຂອງກະຊວງວາງອອກ ໂດຍຫັນມາເປັນແຜນງານ ແລະ ໂຄງການລະອຽດ ແລະ ໄດ້ຮັບຟັງການລາຍງານແຜນການຕ້ານແລ້ງ-ຕ້ານຖ້ວມໄລຍະສັ້ນ ແລະ ໄລຍະຍາວ ຂອງແຂວງສະຫວັນນະເຂດ ຈາກທ່ານ ຄຳລຸຍ ຍາດຕິວົງ ຫົວໜ້າພະແນກກະສິກຳ-ປ່າໄມ້ ແລະ ໄດ້ປະກອບຄຳຄິດຄຳເຫັນຢ່າງກົງໄປກົງມາ ເພື່ອແລກປຽກກ່ຽວກັບ ການຜະລິດກຳສິກຳເປັນສິນຄ້າ ເປັນຕົ້ນແມ່ນການປູກເຂົ້າ ສົ່ງຂາຍອອກຕ່າງປະເທດ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂື້ນ.

ໂອກາດນີ້, ທ່ານ ປະທານ ສນຊ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງຄະນະພັກແຂວງ ໃນໄລຍະຜ່ານມາ ແລະ ທ່ານໄດ້ຫວນຄືນມູນເຊື້ອການເຕີບໃຫຍ່ຂະຫຍາຍຕົວ, ພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດ ໂດຍຫຍໍ້. ພ້ອມກັນນີ້, ທ່ານຍັງໄດ້ເນັ້ນບາງບັນຫາທີ່ສຳຄັນຕື່ມວ່າ: ໃຫ້ຄະນະພັກ, ຄະນະນຳຂອງແຂວງຈົ່ງເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ແລະ ເຊື່ອມຊຶມແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໃຫ້ຖັນແຖວສະມາຊິກພັກ-ພະນັກງານ, ທະຫານ, ຕຳຫຼວດ ແລະ ປະຊາຊົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ; ເອົາໃຈໃສ່ໃນການແກ້ໄຂບັນຫາປະກົດການຫຍໍ້ທໍ້ຕ່າງໆ ຂອງສັັງຄົມໃຫ້ຫຼຸດໜ້ອຍຖອຍລົງ, ໃຫ້ກໍ່ສ້າງພະນັກງານລົງຮາກຖານ ເພື່ອແກ້ໄຂປະກົດການຕ່າງໆຢູ່ຂັ້ນຮາກຖານ, ໃຫ້ມີສະຕິລະວັງຕົວຕໍ່ກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີພາຍ;   ປຸກລະດົມປະຊາຊົນລາວບັນດາເຜົ່າ ເຂົ້າຮ່ວມຂະບວນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກ, ປະກອບສ່ວນໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາ, ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ ແລະ ເອົາໃຈໃສ່ກະກຽມກອງປະຊຸມໃຫຍ່ 3 ຂັ້ນຂອງພັກ ເປັນຕົ້ນເອົາໃຈໃສ່ວຽກງານໂຄສະນາ ແລະ ສ້າງຂະບວນການ ໃຫ້ມີບັນຍາກາດຟັດຟື້ນ.

          ໂອກາດໄປເຮັດວຽກໃນຄັ້ງນີ້, ທ່ານ ປະທານ ສນຊ ພ້ອມດ້ວຍຄະນະ ກໍໄດ້ໄປຢ້ຽມຢາມ ທິມງານແພດທີ່ກວດສຸຂະພາບໂດຍບໍ່ເສຍຄ່າ ຢູ່ໂຮງຮຽນອະນຸບານ ມິດຕະພາບ ສະຫວັນນະເຂດ-ກວາງບິງ ແລະ ໄດ້ມອບອຸປະກອນການຮຽນ, ຢາປົວພະຍາດ ລວມມູນຄ່າ 17,280,000 ກີບ ໃຫ້ໂຮງຮຽນອະນຸບານ ມິດຕະພາບ ສະຫວັນນະເຂດ-ກວາງບິງ ແລະ ກໍໄດ້ໄປວາງກະຕ່າອອກໄມ້ຢູ່ອະນຸສາວະລີ ທ່ານ ປະທານ ໄກສອນ ພົມວິຫານ ແລະ ອະນຸສາວະລີ ທ່ານ ພູນ ສີປະເສີດ.

2019-08-21

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ