ແນະນຳ ສນຊ (LFND)

ທ່ານ ປະທານ ສນຊ ເຄື່ອນໄຫວຢ້ຽມຢາມພົບປະພະນັກງານຫຼັກແຫຼງຢູ່ເມືອງພີນ

ໃນວັນທີ 20 ສິງຫາ 2019, ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມເມືອງພີນ ແຂວງສະຫວັນນະເຂດ, ໂດຍໄດ້ຮັບການຕ້ອນຮັບຈາກ ທ່ານ ຄຳມາດ ເນົາວົງພະຈັນ ເລຂາພັກເມືອງ, ເຈົ້າເມືອງພເມືອງພີນ, ມີບັນດາທ່ານຄະນະພັກ, ຄະນະນຳຂອງເມືອງ ແລະ ພະນັກງານ-ລັດຖະກອນ ເຂົ້າຮ່ວມທັງໝົດ 145 ທ່ານ, ຍິງ 49 ທ່ານ.

ທ່ານ ຄຳມາດ ເນົາວົງພະຈັນ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ ຂອງເມືອງໂດຍສັງເຂບ ເຊິ່ງທ່ານໄດ້ຍົກໃຫ້ເຫັນວ່າ ໃນໄລຜ່ານມາຄະນະພັກໄດ້ເອົາໃຈໃສ່ຊີ້ນຳ-ນຳພາ ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ກຳລັງປະກອບອາວຸດໄດ້ຮັບການປັບປຸງໃຫ້ໜັກແໜ້ນເຂັ້ມແຂງ, ພະນັກງານນັກຮົບໄດ້ລົງກໍ່ສ້າງຮາກຖານການເມືອງ, ນຳພາສ້າງບ້ານປ້ອງກັນຊາດເຂັ້ມແຂງໄດ້ 36 ບ້ານ; ເສດຖະກິດຂອງເມືອງສືບຕໍ່ຂະຫຍາຍຕົວສະເລ່ຍ 5,93% ລາຍຮັບລວມຍອດຜະລິດຕະພັນພາຍໃນ GDP 287,991 ຕື້ກີບ, ສະເລ່ຍໄດ້ 7,149,114 ກີບຕໍ່ຄົນຕໍ່ປີ. ພ້ອມກັນນັ້ນ, ທ່ານຍັງໄດ້ຍົກໃຫ້ເຫັນວຽກງານແຜນການແລະການລົງທຶນ, ວຽກງານວັດທະນະທຳ-ສັງຄົມ, ວຽກງານນິຕິບັນຍັດຕຸລາການ, ວຽກງານພະນັກງານ ແລະ ຜົນສຳເລັດວຽກງານການກະກຽມກອງປະຊຸມໃຫຍ່ ຂອງອົງຄະນະພັກເມືອງ.

ໂອກາດນີ້, ທ່ານປະທານ ສນຊ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງຄະນະພັກ, ຄະນະນຳຂອງເມືອງ ໃນໄລຍະຜ່ານມາ ແລະ ທ່ານໄດ້ຫວນຄືນມູນເຊື້ອການເຕີບໃຫຍ່ຂະຫຍາຍຕົວ, ພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດໂດຍຫຍໍ້ ແລະ ທ່ານໄດ້ມີບາງຄຳເຫັນໂອ້ລົມຕື່ມວ່າ: ໃຫ້ສືບຕໍ່ເຜີຍແຜ່ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ພະນັກງານ, ປະຊາຊົນໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງ; ເອົາໃຈໃສຕໍ່ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ; ມີລະຕິລະວັງຕົວຕໍ່ກຸ່ມຄົນບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີພາຍໃນ, ໃຫ້ເອົາໃຈໃສ່ຕໍ່ວຽກງານສາທາລະນະສຸກ ແລະ ວຽກງານການສຶກສາ ເປັນຕົ້ນແມ່ນສົ່ງເສີມໃຫ້ເດັກໜ້ອຍໄດ້ເຂົ້າໂຮງຮຽນຕາມເກນອາຍຸ ແລະ ປຸກລະດົມປະຊາຊົນໃຫ້ພາເດັກມາສັກຢາ ແລະ ຢອດຢາ; ສຶກສາອົບຮົມໃຫ້ປະຊາຊົນຈົ່ງຮັກສາມູນເຊື້ອຄວາມສາມັກຄີເປັນປຶກແຜ່ນແໜ້ນໜາ, ໃຫ້ປະຊາຊົນມີຄວາມດຸໝັ່ນຂະຫຍັນພຽນ ແລະ ສົ່ງເສີມການປູກການລ້ຽງ ເພື່ອແກ້ໄຂຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ນັບມື້ດີຂື້ນເທື່ອລະກ້າວ.

ພ້ອມກັນນີ້, ທ່ານ ປະທານ ສນຊ ພ້ອມດ້ວຍຄະນະ ກໍໄດ້ໄປຢ້ຽມຢາມ ທິມງານແພດທີ່ກວດສຸຂະພາບໂດຍບໍ່ເສຍຄ່າ ຢູ່ໂຮງໝໍເມືອງພີນ ແລະ ໄດ້ມອບອຸປະກອນການຮຽນ, ຢາປົວພະຍາດ ລວມມູນຄ່າ 20,664,000 ກີບ ໃຫ້ໂຮງໝໍເມືອງພີນ ແລະ ໄປຢ້ຽມຢາມໂຄງການຊົນລະປະທານຫ້ວຍອະໃກ້ ແລະ ຢ້ຽມຢາມປະຊາຊົນ ບ້ານອະປອກ-ມະລົວ ທີ່ເຄື່ອນຍ້າຍຈາກໂຄງການຊົນລະປະທານດັ່ງກ່າວ.

2019-08-21

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ