ແນະນຳ ສນຊ (LFND)

ລາວ - ຫວຽດນາມ ເພີ່ມທະວີການຮ່ວມມືວຽກງານສາສະໜາ

ໃນລະຫວ່າງວັນທີ 19 - 23 ສິງຫາ 2019 ຜ່ານມາ, ຄະນະຜູ້ແທນສູນກາງແນວລາວສ້າງຊາດ ນຳໂດຍ ສະຫາຍ ສົມອົກ ກິ່ງສະດາ - ຮອງຫົວໜ້າສູນກາງແນວລາວສ້າງຊາດ ພ້ອມດ້ວຍຄະນະໄດ້ເດີນທາງໄປຢ້ຽມຢາມ ແລະ ແລກປ່ຽນບົດຮຽນກັບ ຄະນະສາສະໜາລັດຖະບານຫວຽດນາມ ຊຶ່ງນຳໂດຍ ສະຫາຍ ຫວູຈຽນຖັງ - ຫົວໜ້າຄະນະສາສະໜາລັດຖະບານ ພ້ອມດ້ວຍຄະນະ ທີ່ ນະຄອນຫຼວງຮ່າໂນ້ຍ ສສ.ຫວຽດ ນາມ.

ໃນໂອກາດດັ່ງກ່າວ, ສະຫາຍ ຫວູຈຽນຖັງ - ຫົວໜ້າຄະນະສາສະໜາລັດຖະບານ ພ້ອມດ້ວຍຄະນະໄດ້ກ່າວຕ້ອນຮັບຄະນະຜູ້ແທນຂອງລາວ ພ້ອມທັງຕີລາຄາສູງຕໍ່ການມາຢ້ຽມຢາມ, ແລກປ່ຽນບົດຮຽນຂອງຄະນະຜູ້ແທນໃນຄັ້ງນີ້ ແມ່ນມີຄວາມໝາຍສຳຄັນເປັນຢ່າງຍິ່ງ ເປັນການປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ກໍ່ຄືປະຊາຊົນສອງຊາດ ຫວຽດນາມ - ລາວ ໃຫ້ຈະເລີນງອກງາມຍິ່ງໆຂື້ນເວົ້າລວມ, ເວົ້າສະເພາະແມ່ນການພົວພັນຮ່ວມມື ຊ່ວຍເຫຼືອຊຶ່ງກັນ ແລະ ກັນລະຫວ່າງ ຄະນະສາສະໜາລັດຖະບານຂອງ ຫວຽດນາມ ກັບສູນກາງແນວລາວສ້າງຊາດ.
ການພົບປະແລກປ່ຽນບົດຮຽນໃນຄັ້ງນີ້ ທັງສອງຝ່າຍໄດ້ຜັດປ່ຽນກັນແຈ້ງສະພາບວຽກງານສາສະໜາ ແລະ ການຄຸ້ມຄອງລັດກ່ຽວກັບສາສະໜາຂອງແຕ່ລະປະເທດ. ສອງຝ່າຍຕີລາຄາສູງການຈັດຕັ້ງປະຕິບັດຂໍ້ຕົກລົງຮ່ວມມືວຽກງານສາສະໜາທີ່ໄດ້ລົງນາມກັນຢູ່ ຮ່າໂນ້ຍ ໃນລະຫວ່າງເດືອນກໍລະກົດ 2014, ໂດຍສະເພາະແມ່ນໝາກຜົນຂອງການແລກ ປ່ຽນຄະນະຜູ້ແທນ; ຮ່ວມກັນຈັດຕັ້ງກອງປະຊຸມແລກປ່ຽນບົດຮຽນ ກ່ຽວກັບວຽກງານສາສະໜາລະຫວ່າງບັນດາແຂວງທີ່ມີຊາຍແດນຕິດຈອດກັນ; ສ້າງເງື່ອນໄຂໃຫ້ອົງ ການພຸດທະສາສະໜາສອງຊາດ ໄດ້ເພີ່ມທະວີການການພົບປະແລກປ່ຽນ, ຮ່ວມມືຊ່ວຍເຫຼືອຊຶ່ງກັນ ແລະ ກັນ… ພ້ອມທັງໄດ້ແລກປ່ຽນຄໍາຄິດເຫັນກ່ຽວກັບບັນຫາ ທີ່ຕ່າງຝ່າຍຕ່າງໃຫ້ຄວາມສົນໃຈ ຊຶ່ງສອງຝ່າຍເຫັນກົງກັນວ່າ ວຽກງານຄຸ້ມຄອງລັດກ່ຽວກັບສາສະໜາ ເປັນວຽກງານໜຶ່ງທີ່ສຳຄັນ ແລະ ຈໍາເປັນ, ແມ່ນພາລະບົດບາດໜຶ່ງທີ່ ພັກ - ລັດ ໃນການຊີ້ນຳ, ນໍາພາ ເພື່ອປະກອບສ່ວນເຂົ້າໃນການພັດທະນາເສດຖະກິດ, ສັງຄົມມີຄວາມສະຫງົບ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.
ສະຫາຍ ສົມອົກ ກິ່ງສະດາ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງສະຫາຍຫົວໜ້າຄະນະສາສະໜາລັດຖະບານໃນຄັ້ງນີ້, ພ້ອມທັງໄດ້ສະແດງຄວາມຂອບໃຈຕໍ່ພັກ - ລັດຖະບານຫວຽດນາມ ທີ່ໄດ້ໃຫ້ການຊ່ວຍເຫຼືອ, ແລກປ່ຽນບົດຮຽນອັນລ້ຳຄ່າກ່ຽວກັບວຽກງານສາສະໜາ, ປະກອບສ່ວນສ້າງສາຍພົວພັນສາມັກຄີ, ມິດຕະພາບ ລາວ - ຫວຽດນາມ ບໍ່ໃຫ້ອິດທິກຳລັງປໍລະປັກສາມາດນຳໃຊ້ ບັນຫາທາງສາສະໜາເພື່ອມາທຳລາຍສາຍພົວພັນອັນເປັນມູນເຊື້ອທີ່ດີງາມລະຫວ່າງສອງຊາດ ລາວ - ຫວຽດນາມ.

2019-08-27

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ