ແນະນຳ ສນຊ (LFND)

ຄະນະຜູ້ແທນ ສນຊ ສຳເລັດການຢ້ຽມຢາມ ແລະ ເຮັດວຽກຢູ່ທີ່ຣາຊະອານາຈັກໄທ

ໃນລະຫວ່າງວັນທີ 24-26 ສິງຫາ 2019 ນີ້, ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ທີ່ຣາຊະອານາຈັກໄທ, ໂດຍໄດ້ຮັບການຕ້ອນຮັບຢ່າງອົບອຸ່ນຂອງ ທ່ານ ພົນເອກ ນິລຸດ ເກດສິລິ, ນາຍົກສະພາມະຫາວິທະຍາໄລ ລາດຊະພັດ ອຸບົນລາຊະທານີ, ທ່ານ ນາງ ມົນນິພາ ໂກວິດສີລິກຸນ ປະທານຫໍການຄ້າໄທ ແຂວງໜອງຄາຍ.

ໃນການເຄື່ອນໄຫວເຮັດວຽກໃນຄັ້ງນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ເປັນກຽດເຂົ້າຮ່ວມພິທີງານວາງສີລາລຶກສ້າງຫໍແຈກ ຢູ່ທີ່ວັດດົງສ້າງຄວາຍ ເມືອງເມືອງ ແຂວງອຸດອນທານີ, ທ່ານ ພົນເອກ ນິລຸດ ເກດສິລິ ເປັນປະທານຝ່າຍຄາລະວາດ, ປະທານອຸປະຖຳພິທີວາງສີລາລຶກດັ່ງກ່າວ ແລະ ພະອາຈານ ອຸດົມ ປີຊາຢານ ເລຂານຸການເຈົ້າຄະນະໃຫຍ່ຕາເວັນອອກ ຜູ້ຊ່ວຍເຈົ້າອາວາດ ວັດໄຕຣມິດວິດທະຍາລາມ ເປັນປະທານຝ່າຍສົງ. ໃນພິທີ ທ່ານຮອງປະທານສູນກາງແນວລາວສ້າງຊາດ ໄດ້ຈູດທູບທຽນໄວ້ພະລັດຕະນະໄຕ, ເຂົ້າຮ່ວມວາງສີລາລຶກ ແລະ ຮັບຊົມການສະແດງສີລະປະວັນນະຄະດີ ຕື່ມອີກ.

ໃນໂອກາດນີ້, ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບຄະນະຜູ້ແທນສູນກາງແນວລາວສ້າງຊາດ ຢ່າງອົບອຸ່ນ ຈາກຝ່າຍໄທ, ທັງໄດ້ກ່າວເຖິງຄວາມຊົມເຊີຍສັນລະເສີນຕໍ່ການພົວພັນຮ່ວມມື ແລະ  ໄມຕີຈິດມິດຕະພາບ ລະຫວ່າງ ປະຊາຊົນສອງຊາດ ລາວ-ໄທ ນັບມື້ນັບເພີ່ມພູນຄູນສ້າງຍິ່ງໆຂຶ້ນ ແລະ ທ່ານກໍ່ສະແດງຄວາມຫວັງວ່າ ມິດຕະພາບ ແລະ ການພົວພັນບ້ານໃກ້ເຮືອນຄຽງທີ່ດີ ອັນເປັນມູນເຊື້ອທີ່ດີງາມ ລະຫວ່າງ ປະຊາຊົນສອງຊາດ ລາວ-ໄທ ຈະໄດ້ຮັບການພັດທະນາສືບຕໍ່ໄປ, ອັນເປັນການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບຂອງສອງຊາດ ລາວ-ໄທ ກໍ່ຄືຢູ່ໃນຂົງເຂດ ແລະ ໃນໂລກໃຫ້ຍືນ   ຍົງຄົງຕົວຕະຫຼອດໄປ. ພ້ອມກັນນັ້ນ, ຄະນະກໍໄດ້ໄປເຂົ້ານະມັດສະການ ເຈົ້າອາວາດວັດໂນນສະຫວ່າງ; ເຂົ້ານະມັດສະການ ເຈົ້າອາວາດວັດປ່າຄຳສະໂນດ, ໄປກາບໄຫວ້ເຈົ້າປູ່ສີສຸດໂທ ພະຍານະຄະລາດ, ເຈົ້າຍ່າສີປະທຸມມາ ນາຄີ ທີ່ວັດສີລິສຸດໂທ(ວັດປ່າຄຳສະໂນດ). ພ້ອມທັງໄດ້ຖວາຍຜ້າໄກຈຳນວນໜຶ່ງ ຕື່ມອີກ.

2019-08-28

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ