ແນະນຳ ສນຊ (LFND)

ກອງປະຊຸມຝຶກອົບຮົມວຽກງານຊົນເຜົ່າໃຫ້ພະນັກງານຫຼັກແຫຼ່ງ ແຂວງ ຊຽງຂວາງ

ເພື່ອເປັນການຜັນຂະຫຍາຍຕາມໂຄງການຮ່ວມມືລະຫວ່າງ ຄະນະກໍາມະການສູນກາງແນວລາວສ້າງຊາດ ແລະ ຄະ ນະກໍາມະການຊົນເຜົ່າແຫ່ງ ລັດຖະບານ ສສ ຫວຽດ ນາມໃຫ້ໄດ້ຮັບຜົນປະໂຫຍດສູງສຸດ ໃນລະຫວ່າງວັນທີ່ 24-26 ກັນຍາ 2019 ນີ້ ທີ່ແຂວງຊຽງຂວາງ ກົມຊົນເຜົ່າ ສູນກາງແນວລາວສ້າງຊາດ ໄດ້ເປີດກອງປະຊຸມຝຶກອົບຮົມໃຫ້ພະນັກງານຫຼັກແຫຼ່ງ ແຂວງ ຊຽງຂວາງ ໂດຍເປັນປະທານກອງປະຊຸມ ຂອງທ່ານ ໄມ ຄໍາວົງ ຫົວໜ້າກົມຊົນເຜົ່າ ສູນກາງແນວລາວສ້າງຊາດ ໃຫ້ກຽດເຂົ້າຮ່ວມຂອງທ່ານ ດໍາດີ ນັນທະວົງ ກໍາມະການພັກແຂວງ ປະທານແນວລາວສ້າງຊາດແຂວງຊຽງຂວາງ ແລະ ທ່ານ ບຸຍ ວັນ ລິກ ຫົວໜ້າກົມນະໂຍບາຍຊົນເຜົ່າ ຄະນະກໍາມະການຊົນຜົ່າ ແຫ່ງລັດຖະບານ ສສ ຫວຽດນາມ ມີພະນັກງານ-ລັດຖະກອນທີ່ຮັບຜິດຊອບວຽກງານຊົນເຜົ່າຂອງແນວລາວສ້າງຊາດແຂວງ, ແນວລາວສ້າງຊາດເມືອງ 7 ເມືອງ, ພະນັກງານອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ເພື່ອເປັນການທົບທວນຄືນການຈັດຕັ້ງປະຕິບັດໂຄງການຮ່ວມມື ລະຫວ່າງ ຄະນະກໍາມະການສູນກາງແນວລາວສ້າງຊາດ ແລະ ຄະນະກໍາມະການຊົນເຜົ່າ ແຫ່ງລັດຖະບານ ສສ ຫວຽດນາມ ທີ່ຜ່ານມາທີ່ໄດ້ເຊັນບົດບັນທຶກຮ່ວມມືກັນ ແຕ່ວັນທີ 13 ສິງຫາ 2012 ທີ່ນະຄອນຫຼວງຮ່າໂນ້ຍ ສສ ຫວຽດນາມ; ພ້ອມກັນນີ້ທັງ ເພື່ອເປັນການຍົກລະດັບຄວາມຮູ້ຄວາມສາມາດໃນຂົງເຂດວຽກງານຊົນເຜົ່າໃຫ້ພະນັກງານ-ລັດຖະກອນ, ສ້າງຄວາມເຂັ້ມແຂງໃຫ້ອົງການແນວລາວສ້າງຊາດ ເພື່ອເພີ່ມທະວີການຮ່ວມມືຮອບດ້ານ ແລະ ຄວາມສາມັກຄີແບບພິເສດລາວ-ຫວຽດນາມ ແນ່ໃສ່ເຮັດໃຫ້ການຮ່ວມມືດັ່ງກ່າວມີປະສິດທິ ພາບ ແລະ ປະສິດທິຜົນສູງຂຶ້ນ.
ວຽກງານຊົນເຜົ່າຂອງແນວລາວສ້າງຊາດ ແມ່ນການສຶກສາອົບຮົມການເມືອງ-ແນວຄິດ, ປຸກລະດົມຂົນຂວາຍ ແນ່ໃສ່ເຮັດໃຫ້ບັນດາຊົນເຜົ່າມີຄວາມສາມັກຄີ, ມີຄວາມເອກອ້າງທະນົງໃຈໃນຄວາມເປັນຊາດ, ເປັນຊົນເຜົ່າຂອງຕົນ, ມີຄວາມກະຕືລື້ລົ້ນໃນການພັດທະນາປະເທດຊາດເຊິ່ງເລີ່ມແຕ່ການພັດທະນາຕົນເອງ, ບັນດາການເຄື່ອນໄຫວປົກປ້ອງສົ່ງເສີມສິດ ຜົນປະໂຫຍດຂອງບັນດາຊົນເຜົ່າໃນຂອບເຂດທົ່ວປະເທດ. ໃນນີ້, ຜູ້ເຂົ້າຮ່ວມກອງປະຊຸມໄດ້ຮັບຟັງກ່ຽວກັບເອກະສານສໍາຄັນຕໍ່ວຽກງານດັ່ງກ່າວຈາກຊ່ຽວຊານ ສສ ຫວຽດນາມ ທີ່ຮັບຜິດຊອບວຽກງານຊົນເຜົ່າມາເປັນວິທະຍາກອນເປັນຕົ້ນ: ເອກະສານ ກ່ຽວກັບນະໂຍບາຍຊົນເຜົ່າ ແລະ ການປະຕິບັດນະໂຍບາຍຊົນເຜົ່າ ຢູ່ ສສ ຫວຽດນາມ; ທັດສະນະຄະຕິພັກຄອມມູນິດ ສສ ຫວຽດນາມ ກ່ຽວກັບວຽກງານຊົນເຜົ່າ; ຄວາມຮູ້ກ່ຽວກັບວຽກງານການຕ່າງປະເທດ ກົມພົວພັນຕ່າງປະເທດ ຄະນະກໍາມະການຊົນເຜົ່າ ສສ ຫວຽດ ນາມ ແລະ ເອກກະສານກ່ຽວກັບ ເສີມຂະຫຍາຍບົດບາດຂອງຜູ້ມີອິດທິພົນໃນວົງສາຄະນາຍາດຊົນ ເຜົ່າສ່ວນໜ້ອຍຢູ່ ສສ ຫວຽດນາມ. ນອກຈາກນັ້ນ ຜູ້ເຂົ້າຮ່ວມກອງປະຊຸມຍັງໄດ້ປະກອບຄໍາເຫັນ, ແລກປ່ຽນບົດຮຽນບາງບັນຫາທີ່ມີຄວາມສົນໃຈ ຢ່າງກົງໄປກົງມາ ເພື່ອໃຫ້ແນວລາວສ້າງຊາດແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ມີຄວາມຮູ້, ຄວາມເຂົ້າໃຈຢ່າງເລິກເຊິ່ງຕໍ່ວຽກງານຊົນເຜົ່າທີ່ຕົນຮັບຜິດຊອບຢູ່ນັ້ນ ເພື່ອພ້ອມກັນຜັນຂະຫຍາຍເນື້ອໃນເຂົ້າສູ່ວຽກງານຕົວຈິງຢູ່ໃນທ້ອງຖິ່ນຕົນໃຫ້ໄດ້ຮັບຜົນດີ.
ໃນຕອນທ້າຍ ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສູນກາງແນວລາວສ້າງຊາດ ໄດ້ມີຄໍາເຫັນຕໍ່ກອງປະຊຸມ ເຊິ່ງທ່ານຍັງໃຫ້ຮູ້ວ່າ ກອງປະຊຸມຄັ້ງນີ້ແມ່ນມີຄວາມໝາຍສໍາຄັນຫຼາຍ ເພາະມັນແມ່ນໜ້າທີ່ ແມ່ນພາລະບົດ ບາດຂອງອົງການພວກເຮົາ ທັງແມ່ນຄວາມຮັບຜິດຊອບຂອງຄະນະພັກ, ພະນັກງານຫຼັກແຫຼ່ງ, ຜູ້ຊົງຄຸນວຸດທິ, ພະນັກງານປະຕິວັດອົງການປົກຄອງທຸກຂັ້ນ ຕໍ່ການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າເປັນປຶກແຜ່ນ. ຄຽງຄູ່ກັນນັ້ນ ຕ້ອງມີສະຕິລະ ວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ ເພື່ອແບ່ງແຍກຄວາມສາມັກຄີໃນສັງຄົມ, ກໍ່ຄືການ ເຄື່ອນໄຫວປັ່ນປວນ, ຜິດກັບຮີດຄອງປະເພນີອັນດີງາມຂອງຊາດ ແລະ ລະບຽບກົດໝາຍ, ແນວທາງນະໂຍບາຍຂອງພັກ ແລະ ລັດ, ສະກັດກັ້ນ ແລະ ຕອບຕ້ານ, ຕີຖອຍກົນອຸບາຍ ຂອງສັດຕູທີ່ສວຍໃຊ້ບັນຫາຊົນເຜົ່າ ເພື່ອມ້າງເພລະບອບໃໝ່ຢ່າງທັນການ. ພ້ອມດຽວກັນນັ້ນ ໃຫ້ເອົາໃຈໃສ່ຕໍ່ການສ້າງພະນັກງານຫຼັກແຫຼ່ງ ແລະ ພະນັກງານວິຊາການຂອງຊົນເຜົ່າຕ່າງໆ, ສືບ ຕໍ່ສົ່ງເສີມບົດບາດຂອງຜູ້ຊົງຄຸນວຸດທິ ແລະ ຕັ້ງໜ້າປຸກລະດົມຂົນຂວາຍປະຊາຊົນລາວບັນດາເຜົ່າ ໃນການເຂົ້າຮ່ວມຂະບວນການຕ່າງໆທີ່ສຳຄັນຂອງຊາດ ແລະ ປະກອບສ່ວນຢ່າງຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມ ຂອງແຂວງໃຫ້ບັນລຸຕາມຄາດໝາຍ ກໍຄືວຽກງານແນວລາວສ້າງຊາດໃຫ້ມີການປ່ຽນແປງໃໝ່ທີ່ຕັ້ງໜ້າ ແລະ ນັບມື້ດີຂຶ້ນເທື່ອລະກ້າວ.

2019-09-27

ປະຕິທິນ

Oct-2019
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ