ແນະນຳ ສນຊ (LFND)

ສນຊ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII

ໃນວັນທີ 30 ກັນຍາ 2019 ນີ້, ທີ່ສູນກາງແນວລາວສ້າງຊາດ (ສນຊ) ໄດ້ຈັດພິທີເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໂດຍເປັນກຽດເຂົ້າຮ່ວມເຜີຍແຜ່ຂອງທ່ານ ບຸນປອມ ບຸດຕະນະວົງ ກໍາມະການສູນກາງພັກ, ຮອງປະທານສະພາແຫ່ງຊາດ, ມີບັນດາທ່ານຮອງປະທານ ສນຊ, ບັນດາທ່ານທີ່ປືກສາວຽກງານແນວລາວສ້າງຊາດ, ບັນດາທ່ານຫົວໜ້າ-ຮອງຫົວໜ້າກົມ, ຫ້ອງການ, ສູນຝຶກອົບຮົມ, ບັນດາທ່ານມາຈາກສາສະໜາຕ່າງໆ, ສະມາຄົມຜູ້ອາຍຸສູງ, ສະມາຄົມຄຸນຄ່າລາວຕະຫຼອດພະນັກງານ-ລັດຖະກອນອ້ອມຂ້າງສູນກາງເຂົ້າຮ່ວມ.
ຈຸດປະສົງໃນການເຜີຍແຜ່ຄັ້ງນີ້, ເພື່ອຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໃຫ້ຕິດພັນກັບການຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 (ສະໄໝທີ X) ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃຫ້ບັນລຸຕາມລະດັບຄາດໝາຍ, ເພື່ອໂຄສະນາໃຫ້ທົ່ວປວງຊົນຮັບຮູ້ເຊື່ອມຊືມຢ່າງກວ້າງຂວາງ ແລະ ເຂົ້າຮ່ວມຈັດຕັ້ງປະຕິບັດບັນດາວຽກງານດັ່ງກ່າວ.

ທ່ານ ຮອງປະທານສະພາແຫ່ງຊາດ ໄດ້ເຜີຍແຜ່ 4 ເນື້ອໃນຄື: ມະຕິກອງປະຊຸມສະພາແຫ່ງຊາດ; ບົດລາຍງານຂອງລັດຖະບານ; ບົດຊີ້ແຈງຕໍ່ກອງປະຊຸມສະພາແຫ່ງຊາດ ແລະ ບັນດາກົດໝາຍສ້າງໃໝ່. ໂດຍເນັ້ນໜັກບັນດາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ບົດລາຍງານຂອງລັດຖະບານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019; ບົດລາຍງານກ່ຽວກັບ ວຽກງານທ່ອງທ່ຽວ ຕິດພັນກັບການຈັດຕັ້ງປະຕິບັດປີທ່ອງທ່ຽວ ລາວ-ຈີນ; ບົດລາຍງານ ກ່ຽວກັບການພັດທະນາຊັບພະຍາກອນມະນຸດ ທີ່ຕິດພັນກັບການພັດທະນາເສດຖະກິດ-ສັງຄົມ ໂດຍສະເພາະແມ່ນຂະແໜງ ກະສິກໍາ, ຄູ ແລະ ພະຍາບານ ເພື່ອສາມາດຕອບສະໜອງໃຫ້ແກ່ການພັດທະນາປະເທດຊາດ ແລະ ແກ້ໄຂຄວາມທຸກຍາກ; ບົດລາຍງານກ່ຽວກັບຄໍາຕັດສິນຂອງສານ, ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ຊີ້ແຈງຕໍ່ຄໍາຊັກຖາມ ກ່ຽວກັບການຄຸ້ມຄອງການອອກໃບຕາດີນ, ການອອກໃບຕາດີນຊໍ້າຊ້ອນ, ມະຕິວ່າດ້ວຍການຟື້ນຟູປ່າໄມ້, ມະຕິວ່າດ້ວຍການຮັບຮອງເອົາການເລືອກຕັ້ງ ປະທານສານປະຊາຊົນສູງສຸດ, ມະຕິວ່າດ້ວຍການຮັບຮອງການແຕ່ງຕັ້ງລັດຖະມົນຕີປະຈໍາສໍານັກງານນາຍົກລັດຖະມົນຕີ ແລະ ໃນຕອນທ້າຍຂອງກອງປະຊຸມທ່ານໄດ້ໃຫ້ຮູ້ກ່ຽວກັບກົດໝາຍສ້າງໃໝ່ ແລະ ກົດໝາຍທີ່ໄດ້ປັບປຸງໃໝ່ຕື່ມອີກ.

2019-10-02

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ