ແນະນຳ ສນຊ (LFND)

ພິທີຖະແຫຼງຂ່າວກອງປະຊຸມຄະນະປະຈໍາ ສູນກາງແນວລາວສ້າງຊາດ ເປີດກ້ວາງ ຄັ້ງທີ 4 ສະໄໝທີ X.

ໃນວັນທີ 1 ຕຸລາ 2019 ນີ້, ສູນກາງແນວລາວສ້າງຊາດ(ສນຊ) ໄດ້ຈັດພິທີຖະແຫຼງຂ່າວ ກອງປະຊຸມຄະນະປະຈໍາສູນກາງແນວລາວສ້າງຊາດ ເປີດກ້ວາງ ຄັ້ງທີ 4 ສະໄໝທີ X, ເປັນກຽດຖະແຫຼງໂດຍ ທ່ານ ນາງ ຄໍາຈັນ ພົມແສງສະຫວັນ ຄະນະປະຈໍາພັກ, ຮອງປະທານສູນກາງແນວລາວສ້າງຊາດ.

ທ່ານ ຮອງປະທານ ສນຊ ໄດ້ໃຫ້ຮູ້ວ່າ ກອງປະຊຸມດັ່ງກ່າວ ຈະໄດ້ຈັດຂື້ນ ໃນລະຫວ່າງວັນທີ 7-9 ຕຸລາ2019 ນີ້, ກອງປະຊຸມຄັ້ງນີ້ ຈະໄດ້ນໍາເອົາຫຼາຍຫົວຂໍ້ມາຄົ້ນຄວ້າປຶກສາຫາລືເຊິ່ງມີບັນດາເນື້ອໃນຄື: ຜ່ານບົດລາຍງານການເຄື່ອນໄຫວ ຂອງຄະນະປະຈໍາ ສູນແນວລາວສ້າງຊາດ ໃນໄລຍະຜ່ານມາ 2018-2019 ແລະ ທິດທາງແຜນການໃນປີ 2019-2020, ຮ່າງບົດປະກອບຄໍາເຫັນຂອງອົງການແນວລາວສ້າງຊາດຕໍ່ກອງປະຊຸມສະໄໝສາມັນເທືອທີ 8 ຂອງສະພາແຫ່ງຊາດຊຸດທີ VIII, ບົດລາຍງານກ່ຽວກັບສະພາບວຽກງານຄຸ້ມຄອງລັດຖະກອນ ແລະ ປັບປຸງກົງຈັກການຈັດຕັ້ງ ຂອງແນວລາວສ້າງຊາດ ແລະ ໂຄງຮ່າງລາຍງານການເມືອງກອງປະຊຸມໃຫຍ່ ຂອງແນວລາວສ້າງຊາດ ແຕ່ລະຂັ້ນ, ບົດແນະນໍາການກະກຽມສ້າງຂະບວນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ (13 ສິງຫາ 1950-13 ສິງຫາ 2020), ບົດປະກອບຄໍາເຫັນ ຂອງແນວລາວສ້າງຊາດນະຄອນຫຼວງວຽງຈັນ ກ່ຽວກັບການປຸກລະດົມຊຸກຍູ້ຂະບວນການປະຕິບັດ 6 ສ ແລະ ການປົກປັກຮັກສາສິງແວດລ້ອມຢູ່ນະຄອນຫຼວງວຽງຈັນ, ບົດປະກອບຄໍາເຫັນຂອງແນວລາວສ້າງຊາດ ແຂວງໄຊຍະບູລີກ່ຽວກັບຂະບວນການສ້າງຄອບຄົວ ແລະ ບ້ານສາມັກຄີປອງດອງຢູ່ພາຍໃນແຂວງ, ບົດປະກອບຄໍາເຫັນຂອງແນວລາວສ້າງຊາດແຂວງອັດຕະປື ກ່ຽວກັບການປະກອບສ່ວນໃນການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າເມືອງສະໜານໄຊ, ບົດປະກອບຄໍາເຫັນ ຂອງແນວລາວສ້າງຊາດເມືອງວຽງໄຊ ແຂວງຫົວພັນ ກ່ຽວກັບການປຸກລະດົມ-ຂົນຂວາຍປະຊາຊົນບັນດາເຜົ່າປະກອບສ່ວນໃນການປົກປັກຮັກສາ ແລະ ສ້າງສາພັດທະນາພາຍໃນເມືອງ, ບົດປະກອບຄໍາເຫັນ ຂອງກຸ່ມບໍລິສັດພົງສະຫວັນ ກ່ຽວກັບການຮ່ວມມືກັບ ສູນກາງແນວລາວສ້າງຊາດ ໃນການຊຸກຍູ້ຂະບວນການຜະລິດກະສິກໍາເປັນສິນຄ້າ ໂດຍຕິດພັນກັບການສ້າງຄອບຄົວ ແລະ ບ້ານສາມັກຄີປອງດອງ ແລະ ຮັບຟັງການປະກອບຄໍາຄິດຄໍາເຫັນ ຂອງຜູ້ແທນກອງປະຊຸມ ເພື່ອແລກປ່ຽນບົດຮຽນເຊິ່ງກັນ ແລະ ກັນ. ນອກຈາກນີ້, ຄະນະຜູ້ແທນກອງປະຊຸມເຄື່ອນໄຫວຢ້ຽມຢາມໂຄງການ ສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າຢູ່ເຂດຈຸດສຸມພັດທະນາ 516 ເມືອງລ້ອງຊານ ແຂວງໄຊສົມບູນ.
ພ້ອມກັນນີ້, ທ່ານ ນາງ ຄໍາຈັນ ພົມແສງສະຫວັນ ກໍໄດ້ຍົກໃຫ້ເຫັນພາລະບົດບາດ, ສິດ, ໜ້າທີຂອງແນວລາວສ້າງຊາດໂດຍສັງເຂບ ແລະ ຍົກໃຫ້ເຫັນບາງຜົນງານທີ່ພົ້ນເດັ່ນໃນການເຄື່ອນໄຫວວຽກງານແນວລາວສ້າງຊາດໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ໂດຍຫຍໍ້.

2019-10-02

ປະຕິທິນ

Oct-2019
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ