ແນະນຳ ສນຊ (LFND)

ທ່ານ ສີສະຫວາດ ແກ້ວບຸນພັນ ເຄື່ອນໄຫວຢ້ຽມຢາມແຂວງຫຼວງພະບາງ

ໃນລະຫວ່າງ ວັນທີ 21-23 ຕຸລາ 2019 ນີ້, ທ່ານ ສີສະຫວາດ ແກ້ວບຸນພັນ ອາດີດກໍາມະການກົມການເມືອງສູນກາງພັກ, ອາດີດນາຍົກລັດຖະມົນຕີ, ອາດີດປະທານສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມແຂວງຫຼວງພະບາງ ໂດຍເປັນກຽດຕ້ອນຮັບຂອງ ທ່ານ ສຸກັນ ບຸນຍົງ ຄະນະປະຈຳພັກແຂວງ, ຮອງເຈົ້າແຂວງ ແຂວງຫຼວງພະບາງ.

ໃນໂອກາດດຽວກັນນີ້, ໄດ້ພົບປະກັບທ່ານ ສຸກັນ ບຸນຍົງ ຮອງເຈົ້າແຂວງແຂວງຫຼວງພະບາງ ຊຶ່ງໄດ້ຮັບຟັງການລາຍງານສະພາບລວມໂດຍຫຍໍ້ ຂອງແຂວງຫຼວງພະບາງໃຫ້ ທ່ານ ສີສະຫວາດ ແກ້ວບຸນພັນ ໄດ້ຮັບຊາບ ຊຶ່ງໄດ້ຍົກໃຫ້ຮູ້ວ່າ: ຕະຫຼອດໄລຍະທີ່ຜ່ານມາ ແຂວງຫຼວງພະບາງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ.

ກ່ອນອື່ນ ທ່ານ ສີສະຫວາດ ແກ້ວບຸນພັນ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານຂອງຄະນະພັກ, ຄະນະປະຈຳແຂວງຫຼວງພະບາງ ທີ່ຍາດມາໄດ້. ແຕ່ຄຽງຄູ່ກັບຜົນງານທີ່ພົ້ນເດັ່ນນັ້ນ ຄະນະພັກ, ຄະນະປະຈຳ ຕ້ອງສືບຕໍ່ເພີ່ມທະວີສຶກສາອົບຮົມການເມືອງແນວຄິດໃຫ້ແກ່ຖັນແຖວສະມາຊິກພັກ ແລະ ພະນັກງານລັດຖະກອນ ໃຫ້ມີຄວາມສາມັກຄີປອງດອງ, ມີຄວາມເຂັ້ມແຂງພາຍໃນພັກ ເພື່ອເປັນຄັນທຸງໃນການສຶກສາອົບຮົມ, ປຸກລະດົມປະຊາຊົນບັນດາຊົນເຜົ່າ ຮັກສາມູນເຊື້ອຄວາມສາມັກຄີ, ປຸກລະດົມປະຊາຊົນບັນດາເຜົ່າຜະລິດເປັນສິນຄ້າ ແກ້ໄຂຄວາມທຸກຍາກ, ສ້າງທຸກເງື່ອນໄຂໃຫ້ປະຊາຊົນມີຢູ່ມີກິນ ໃຫ້ຊີວິດຂອງປະຊາຊົນດີຂຶ້ນເລື້ອຍໆ, ພ້ອມກັນສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ແລະ ສືບຕໍ່ບູລະນະບັນດາແຫຼ່ງທ່ອງທ່ຽວໃຫ້ມີຄວາມສວຍງາມ ເພື່ອດຶງດູດນັກທ່ອງທ່ຽວ ເຂົ້າມາທ່ຽວຊົມ. ຫຼັງຈາກນັ້ນ, ທ່ານ ສີສະຫວາດ ແກ້ວບຸນພັນ ກໍໄດ້ເຄື່ອນໄຫວຢ້ຽມຢາມໂຄງການເສັ້ນທາງລົດໄຟ ແລະ ສະຖານທີ່ທ່ອງທ່ຽວຈຳນວນໜຶ່ງຕື່ມອີກ.

2019-10-25

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ