ແນະນຳ ສນຊ (LFND)

ສປປ ລາວ ຕ້ອນຮັບຄະນະຜູ້ແທນຂັ້ນສູງໂຄງການທໍາມະຍາດຕາ 5 ແຜ່ນດິນ

ສູນກາງແນວລາວສ້າງຊາດຮ່ວມກັບໂຄງການທໍາມະຍາດຕາ 5 ແຜ່ນດິນ ຄັ້ງທີ 2, ບັນດາປະເທດລຸ່ມແມ່ນໍ້າຂອງໄດ້ຮ່ວມກັນຈັດພິທີໄຫວ້ພະຮັບສິນໃສ່ບາດຖວາຍທານແດ່ ພະສົງ 300 ອົງ ແລະ ຍິນດີຕ້ອນຮັບຄະນະຜູ້ແທນຂັ້ນສູງໂຄງການທໍາມະຍາດຕາຈາກ 5 ປະເທດຄື: ໄທ, ລາວ, ມຽນມາ, ຫວຽດນາມ ແລະ ກໍາປູເຈຍ ເຂົ້າສູ່ປະເທດລາວ. ພິທີດັ່ງກ່າວ ໄດ້ຈັດຂຶ້ນ ໃນວັນທີ 26 ຕຸລາ ຜ່ານມາ, ທີ່ເດີ່ນທາດຫຼວງວຽງຈັນ, ມີພະອາຈານມະຫາງອນ ດໍາລົງບຸນ ປະທານ ສູນກາງອົງການພຸດທະສາສະໜາສໍາພັນລາວ, ບັນດາພະເຖລະຈາກພາຍໃນ ແລະ ຕ່າງປະເທດ, ມີທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານ ສູນກາງແນວລາວສ້າງຊາດ ພ້ອມດ້ວຍຄະນະນໍາຂັ້ນສູງ, ທູຕານຸທູດ ຈາກ 10 ປະເທດອາຊຽນ, ແຂກຖືກເຊີນ ແລະ ມວນຊົນຊາວນະຄອນຫຼວງວຽງຈັນຫຼາຍພັນຄົນເຂົ້າຮ່ວມ.

ທ່ານ ສຸພະໄຊ ວິລະພູຊົງ ເລຂາທິການສະມາຄົມ ໂພທິຄະຍາວິຊາໄລ ໃນນາມ ຕາງໜ້າໂຄງການທໍາມະຍາດຕາ 5 ແຜ່ນດິນ ກ່າວວ່າ: ໂຄງການທໍາມະຍາດຕາ 5 ແຜ່ນດິນລຸ່ມແມ່ນໍ້າຂອງຄັ້ງນີ້, ຈະເກີດຄວາມສໍາເລັດທີ່ຈົບງາມດ້ວຍກຸສົນສາມັກຄີທໍາທີ່ທຸກທ່ານໄດ້ບໍາເພັນກຸສົນຮ່ວມກັນ ແລະ ນັບເປັນປະຫວັດສາດອິກຄັ້ງໜຶ່ງ ທີ່ຕ້ອງບັນທືກໄວ້ທີ່ພຸດທະ 5 ແຜ່ນດິນ ລຸ່ມແມ່ນໍ້າຂອງຮ່ວມມືຮ່ວມໃຈກັນນໍາພຸດທະທໍາໄປໃຊ້ໃນວິຖີຊີວິດ ເພື່ອສັນຕິພາບປະຊາຊົນລຸ່ມແມ່ນໍ້າຂອງ ຊຶ່ງໂຄງການທໍາມະຍາດຕາ 5 ແຜ່ນດີນຄັ້ງນີ້ຈັດຂຶ້ນເປັນຄັ້ງທີ 2 ໄດ້ມີພິທີເປີດຢ່າງເປັນທາງການ ໃນວັນທີ 15 ຕຸລາ 2019 ຢູ່ວັດພະທາດຜາເງົາ ເມືອງຊຽງແສນ ແຂວງຊຽງລາຍ ລາຊະອານາຈັກໄທ. ຈາກນັ້ນ, ຄະນະໂຄງການດັ່ງກ່າວ ໄດ້ເດີນທາງໄປປະເທດມຽນມາ, ສປປ ລາວ, ສສ ຫວຽດນາມ ແລະ ຈະມີພິທີປິດຢ່າງເປັນທາງການ ຢູ່ ລາຊະອານາຈັກ ກໍາປູເຈຍ ໃນວັນທີ 31 ຕຸລາ 2019.
ສໍາລັບ ສປປ ລາວ ເຮົາໄດ້ມີໂອກາດຕ້ອນຮັບຄະນະຜູ້ແທນຂັ້ນສູງໂຄງການທໍາມະຍາດຕາ ໂດຍຜ່ານແຂວງບໍ່ແກ້ວ, ຫຼວງນໍ້າຖາ, ອຸດົມໄຊ, ຜົ້ງສາລີ, ຫຼວງພະບາງ ແລະ ນະຄອນຫຼວງວຽງຈັນ.
ໃນໂອກາດນີ້, ທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນະຄອນຫຼວງວຽງຈັນ ໄດ້ໃຫ້ກຽດກ່າວວ່າ: ເມືອງວຽງຈັນເປັນນະຄອນຫຼວງຂອງປະເທດລາວ ແລະ ເປັນນະຄອນຫຼວງທີ່ມີປະຫວັດສາດ ຍາວນານໃນບັນດາປະເທດລຸ່ມແມ່ນໍ້າຂອງ, ໃນປີ 2020 ຈະມີອາຍຸ 400 ປີ, ມີບູຮານສະຖານຫຼາຍແຫ່ງ, ມີທໍາມະຊາດທີ່ສວຍງາມ, ມີພື້ນຖານວັດທະນະທໍາດ້ານວັດຖຸ ແລະ ຈິດໃຈຢູ່ຄຽງຄູ່ກັນກັບການດໍາລົງຊີວິດທີ່ເປັນເອກະລັກຂອງປະຊາຊົນລາວ ກໍຄືນະຄອນຫຼວງວຽງຈັນ ພ້ອມກັນນັ້ນ, ທ່ານ ບຸນທ່ຽງ ຂຸນສີ ໄດ້ລາຍງານກ່ຽວກັບສະພາບເສດຖະກິດນະຄອນຫຼວງວຽງຈັນ ວ່າ: ໃນ 6 ເດືອນຕົ້ນປີນີ້ ເສດຖະກິດນະຄອນຫຼວງວຽງຈັນມີສະຖຽນລະພາບທີ່ດີ, ສັງຄົມມີຄວາມສະຫງົບໂດຍພື້ນຖານ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເທື່ອລະກ້າວ ຄາດວ່າໝົດປີ 2019 ເສດຖະກິດຈະຂະຫຍາຍຕົວໃນລະດັບ 9,47% ລວມຍອດຜະລິດຕະພັນພາຍໃນ GDP
ໃນໂອກາດດຽວກັນນີ້ ທ່ານ ປອ ໄຊສົມພອນ ພົມວິຫານ ພ້ອມດ້ວຍຄະນະຜູ້ແທນສົງຈາກ 5 ປະເທດໃນໂຄງທໍາມະຍາດຕາ 5 ແຜ່ນດິນ ໄດ້ຮ່ວມກັນປູກຕົ້ນໄມ້ມະຫາໂພ ຢູ່ ທີ່ເດີ່ນພະທາດຫຼວງ 1 ຕົ້ນ ແລະ ໃນມື້ດຽວກັນນັ້ນ ທ່ານ ນ. ຄໍາຈັນ ພົມແສງສະຫວັນ ພ້ອມດ້ວຍຄະນະຜູ້ແທນສົງຈາກ 5 ປະເທດໄດ້ປູກຕົ້ນໄມ້ມະຫາໂພ 1 ຕົ້ນ ຢູ່ທີ່ວັດອົງຕື້ ເພື່ອເປັນສັນຍາລັກພິທີດັ່ງກ່າວຕື່ມອີກ.

2019-10-29

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ