ແນະນຳ ສນຊ (LFND)

ຮອງປະທານ ສນຊ ເຄື່ອນໄຫວຢ້ຽມຢາມ ແລະ ພົບປະໂອ້ລົມປະຊາຊົນ ບ້ານຊຽງດາ

ວັນທີ 29 ຕຸລາ 2019 ນີ້, ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມປະປະຊາຊົນບ້ານຊຽງດາ ເມືອງໄຊເສດຖາ ນະຄອນຫຼວງວຽງຈັນ, ເປັນກຽດເຂົ້າຮ່ວມມີ ທ່ານ ບຸນທ່ຽງ ຂູນສີ ຄະນະປະຈຳພັກ, ປະທານແນວລາວສ້າງຊາດນະຄອນຫຼວງວຽງຈັນ.

ໂອກາດນີ້, ທ່ານ ຮອງປະທານສູນກາງແນວລາວສ້າງຊາດໄດ້ເຂົ້າພົບປະຄະນະພັກ, ຄະນະປະຈຳຂອງເມືອງ ເຊິ່ງໄດ້ຮັບຟັງ ການລາຍງານການເຄື່ອນໄຫວວຽກງານແນວລາວສ້າງຊາດ ຂອງເມືອງໃນໄລຍະຜ່ານມາ ໂດຍຫຍໍ້ ຈາກທ່ານ ຄຳສະຫວັນ ໂຄດໄສ ຮອງເລຂາພັກເມືອງ, ຮອງເຈົ້າເມືອງ ເມືອງໄຊເສດຖາ. ພ້ອມກັນນີ້ ທ່ານ ເຍ່ຍເກີຢ່າ ໜໍຈໍຈົງຕົວ ພ້ອມຄະນະໄດ້ໄປຢ້ຽມຢາມປະຊາຊົນ ບ້ານຊຽງດາ ແລະ ໄດ້ຮັບຟັງການລາຍງານກ່ຽວກັບຜົນງານການເຄື່ອນໄຫວວຽກງານໃນໄລຍະຜ່ານມາ ຂອງບ້ານໂດຍຫຍໍ້ ຈາກທ່ານ ພັນໂທ ອຸທອນ ວິໄລສັກ ຮອງຫົວໜ້າກອງບັນຊາການທະຫານ ເມືອງໄຊເສດຖາ, ເລຂາພັກບ້ານ, ນາຍບ້ານບ້ານຊຽງດາ ເຊິ່ງທ່ານໄດ້ຍົກໃຫ້ເຫັນວ່າ: ໃນໄລຍະຜ່ານອົງການປົກຄອງບ້ານ ໄດ້ຈັດຕັ້ງເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ໄດ້ຈັດຕັ້ງປະຕິບັດວຽກງານຕາມ 4 ເນື້ອໃນ 4 ຄາດໝາຍ, ເຮັດຕາມພາລະບົດບາດ, ສິດ ແລະ ໜ້າທີ່ ຂອງຄະນະບ້ານແລະ ໄດ້ເອົາໃຈໃສ່ຊີ້ນຳ-ນຳພາ ປັບປຸງແບບແຜນວິທີເຮັດວຽກຂອງອົງການປົກຄອງບ້ານ, ໄດ້ເຕົ້າໂຮມຄວາມສາມັກຄີປອງດອງ ແລະ ປຸກລະດົມປະຊາຊົນບັນດາເຜົ່າໃຫ້ຮັກສາວັດທະນະທຳ ຮີດຄອງປະເພນີ ອັນດີງາມຂອງແຕ່ລະເຜົ່າ.
ໃນໂອກາດນີ້, ທ່ານ ເຍ່ຍເກີຢ່າ ໜໍຈໍຈົງຕົວ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງເມືອງ ແລະ ບ້ານ ໃນໄລຍະຜ່ານມາ ແລະ ທ່ານ ໄດ້ມີບາງຄຳເຫັນໂອ້ລົມຕື່ມວ່າ:ໃຫ້ສືບຕໍ່ຈັດຕັ້ງເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ເລົ່າມູນເຊື້ອວັນສຳຄັນຕ່າງໆຂອງພັກ, ຂອງລັດ, ຂອງຊາດ ໃຫ້ປະຊາຊົນ ແລະ ລູກຫຼານໄດ້ຮັບຮູ້, ເຂົ້າໃຈຢ່າງເລິກເຊິ່ງ ແລະກວ້າງຂວາງຂຶ້ນຕື່ມ; ສືບຕໍ່ສົ່ງເສີມໃຫ້ປະຊາຊົນບັນດາເຜົ່າປົກປັກຮັກສາວັດທະນະທຳ ຮີດຄອງປະເພນີອັນດີງາມ ຂອງແຕ່ລະເຜົ່າ. ພະນັກງານແນວລາວສ້າງຊາດບ້ານໃຫ້ຄົ້ນຄວ້າ ບັນດາວຽກງານຂອງແນວລາວສ້າງຊາດ ເປັນຕົ້ນແມ່ນວຽກງານສາສະໜາ, ວຽກງານຊົນເຜົ່າ ແລະ ວຽກງານຊັ້ນຄົນອົງການຈັດຕັ້ງສັງຄົມໃຫ້ສາມາດກຳແໜ້ນ, ເຂົ້າໃຈຕໍ່ວຽກງານຂອງແນວລາວສ້າງຊາດ ແລະ ເປັນໃຈກາງເຕົ້າໂຮມຄວາມສາມັກຄີພາຍໃນບ້ານໃຫ້ເປັນປຶກແຜ່ນແໜ້ນໜາ, ມີຄວາມຊ່ວຍເຫຼືອເຊິ່ງກັນ ແລະກັນ; ໃຫ້ເອົາໃຈໃສ່ໃນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງ, ຊຸກຍູ້ປະຊາຊົນທຳຜະລິດກະສິກຳເປັນສິນຄ້າສົ່ງອອກສູ່ຕະຫຼາດ, ເອົາໃຈໃສ່ຕໍ່ວຽກງານສິ່ງແວດລ້ອມ ເປັນຕົ້ນ ແມ່ນບໍ່ຖີ້ມ ແລະ ຈູດຂີ້ເຍື້ອຊະຊາຍ, ສົ່ງເສີມໃຫ້ລູກຫຼານເຂົ້າໂຮງຮຽນຕາມເກນອາຍຸ, ເປັນເຈົ້າການເກັບກຳຫາງສຽງຂອງປະຊາຊົນ, ຊ່ວຍກັນສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ໃຫ້ຫຼຸດນ້ອຍຖອຍລົງເປັນກ້າວໆ.

2019-11-04

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ