ແນະນຳ ສນຊ (LFND)

ກອງປະຊຸມເຜີຍແຜ່ ແນະນຳວຽກງານໂຄສະນາ ແລະ ຂະບວນການ ໃຫ້ແກ່ກອງປະຊຸມໃຫຍ່ຂອງພັກແຕ່ລະຂັ້ນ

ໃນວັນທີ່ 4 ພະຈິກ 2019 ນີ້, ທີ່ສູນກາງແນວລາວສ້າງຊາດ (ສນຊ), ອະນຸກຳມະການ ໂຄສະນາ ແລະ ຂະບວນການ ກະກຽມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໄດ້ຈັດກອງປະຊຸມເຜີຍແຜ່ ແນະນຳວຽກງານໂຄສະນາ ແລະ ຂະບວນການໃຫ້ແກ່ກອງປະຊຸມໃຫຍ່ ຂອງພັກແຕ່ລະຂັ້ນ ໂດຍການເປັນປະທານຂອງ ສະຫາຍ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ,ມີບັນດາສະຫາຍຮອງປະທານ ສນຊ, ບັນດາສະຫາຍຫົວໜ້າ-ຮອງຫົວໜ້າອະນຸໂຄສະນາ ແລະ ຂະບວນການ ຈາກກະຊວງ, ອົງການ ແລະ ບັນດາແຂວງທົ່ວປະເທດ ເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳລວມ ແລະ ອະນຸກຳມະການຕ່າງໆ ເພື່ອກະກຽມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ສະບັບເລກທີ 070/ກມສພ, ລົງວັນທີ 8 ພຶດສະພາ 2019, ມະຕິວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ສະບັບເລກທີ 061/ກມສພ, ລົງວັນທີ 29 ມັງກອນ 2019; ຄໍາແນະນໍາກ່ຽວກັບວຽກງານໂຄສະນາ ແລະ ຂະບວນການ ສະບັບເລກທີ 05/ອຄຂ, ລົງວັນທີ 20 ມິຖຸນາ 2019 ແລະບົດລາຍງານການເຄື່ອນໄຫວວຽກງານໂຄສະນາ ແລະ ຂະບວນການ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ບົດແນະນໍາວຽກງານໂຄສະນາ ແລະ ບົດແນະນໍາວຽກງານຂະບວນການ ກອງປະຊຸມໃຫຍ່ຂອງພັກແຕ່ລະຂັ້ນ. ພ້ອນກັນນີ້, ໄດ້ມີການປະກອບຄຳຄິດຄຳເຫັນແລກປ່ຽນຢ່າງກົງໄປກົງມາ ເຮັດໃຫ້ບັນສະຫາຍຜູ້ແທນກອງປະຊຸມສາມາດກຳແໜ້ນບັນດາເນື້ອໃນຂອງກອງປະຊຸມໄດ້ຢ່າງເລິກເຊິ່ງ.
ສະຫາຍ ປອ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໄດ້ມີບາງຄຳເຫັນເນັ້ນຕື່ມວ່າ:ໃຫ້ຄະນະຮັບຜິດຊອບວຽກງານໂຄສະນາ ແລະ ຂະບວນການ ເປັນເຈົ້າການໃນການຊຸກຍູ້ວຽກງານດັ່ງກ່າວ ຕາມພາລະບົດບາດ, ສິດ ແລະ ໜ້າທີ່ຂອງຕົນໃຫ້ເປັນປົກກະຕິ, ເອົາໃຈໃສ່ໃນການປະຕິບັດທິດຊີ້ນຳ ຂອງຄະນະພັກ ເພື່ອປະສານງານລະຫວ່າງສູນກາງກັບທ້ອງຖິ່ນ, ລະຫວ່າງແຂວງກັບເມືອງ ແລະ ເມືອງກັບຮາກຖານບ້ານ, ສົ່ງຂໍ້ມູນຂ່າວສານ ແລະ ລາຍງານສະພາບການຕ່າງໆ ເປັນປົກກະຕິທ່ວງທັນກັບຄວາມຕ້ອງການ ເພື່ອຮັບປະກັນການປະຕິບັດວຽກງານໃຫ້ມີຜົນສຳເລັດ; ເອົາໃຈໃສ່ເພີ່ມທະວີການໂຄສະນາ, ສຶກສາອົບຮົມ, ເລົ່າມູນເຊື້ອວັນສຳຄັນຕ່າງໆຂອງພັກ, ຂອງຊາດ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ ໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ; ຈັດຕັ້ງການສຳພາດວຽກດີຄົນເດັ່ນ ແລະ ເລື່ອງຈິງ-ຄົນແທ້, ຊຸກຍູ້ຂະບວນການສົ່ງເສີມການຜະລິດເປັນສິນຄ້າ ແລະ ແກ້ໄຂຄວາມທຸກຍາກ ຕິດພັນກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ, ເອົາໃຈໃສ່ຊຸກຍູ້ປະຊາຊົນບັນດາເຜົ່າເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ເພື່ອຊ່ວຍກັນຕ້ານປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ, ຊຸກຍູ້ການຕ້ານໄພແຫ້ງແລ້ງ, ຕ້ານໄພນ້ຳຖ້ວມ ແລະ ການຟື້ນຟູການປູກການລ້ຽງຂອງປະຊາຊົນ ເປັນຕົ້ນແມ່ນສະໜອງແນວພັນປູກ, ແນວພັນລ້ຽງ, ຝຸ່ນຊີວະພາບ ແລະ ອື່ນໆ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.

2019-11-06

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ