ແນະນຳ ສນຊ (LFND)

ພິທີ ເຊັນບົດບັນທືກຊ່ວຍຈໍາລະຫວ່າງ ສູນກາງແນວລາວສ້າງຊາດ ແລະ ສະພາສັງຄົມຂອງສະຫະພັນລັດເຊຍ

ພິທິເຊັນບົດບັນທຶກຊ່ວຍຈໍາວ່າດ້ວຍການພົວພັນ ແລະ ການຮ່ວມມືລະຫວ່າງ ສູນກາງແນວລາວສ້າງຊາດ ແລະ ສະພາສັງຄົມຂອງສະຫະພັນລັດເຊຍ ທີ່ສູນກາງແນວລາວສ້າງຊາດ ໃນວັນທີ 05 ພະຈິກ 2019. ໃນພິທີເຊັນບົດບັນທຶກຄັ້ງນີ້ ໂດຍມີທ່ານ ຮຈ. ດຣ ສົມອົກ ກິ່ງສະດາ ຮອງປະທານ ສູນກາງແນວລາວສ້າງຊາດ, ທ່ານ ເອເລນາ ຊູຕຼໍມີນາ ປະທານສະພາທາງສັງຄົມຂອງສະຫະພັນລັດເຊຍ. ໂດຍເປັນກຽດເຂົ້າຮ່ວມຂອງ ທ່ານ ປອ ໄຊສົມພອນ ພົມວິຫານ ກໍາມະການກົມການ ເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານສົມດີ ບຸນຄຸ້ມ ຮອງຄະນະພົວພັນຕ່າງປະເທດສູນກາງພັກ, ທ່ານ ສຈ. ດຣ ບຸນຍົງ ບຸບຜາ ກໍາມະການສູນກາງແນວລາວສ້າງຊາດ, ພ້ອມດ້ວຍພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.

ການຮ່ວມມືໃນຄັ້ງນີ້ ແມ່ນເພື່ອເປັນການພົວພັນ ແລະ ຮ່ວມມືກັນທາງດ້ານປະຫວັດສາດ, ວັດທະນາທໍາ ແລະ ວິທະຍາສາດ, ສິດທິມະນຸດ, ຄວາມກ້າວໜ້າທາງສັງຄົມ, ສິດເສລີພາບຂັ້ນພື້ນຖານ ແລະ ອິດສະລະພາບເພື່ອຄວາມສະດວກໃຫ້ແກ່ການພັດທະນາທາງດ້ານສັງຄົມ, ການກຸສົນສາທາລະນະ ແລະ ອົງການຈັດຕັ້ງອື່ນໆ. ເພື່ອເປັນການຂະຫຍາຍສາຍພົວພັນ ມິດຕະພາບອັນເປັນມູນເຊື້ອໃນຂົງເຂດພັດທະນາການຮ່ວມມື ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນລັດເຊຍ, ເປັນຕົ້ນແມ່ນ ສູນກາງແນວລາວສ້າງຊາດ ແລະ ສະພາທາງສັງຄົມລັດເຊຍ, ຈຶ່ງໄດ້ຕົກລົງເຮັດບົດບັນທຶກຊ່ວຍຈໍາດັ່ງກ່າວ: ເພື່ອແລກປ່ຽນຄໍາຄິດຄໍາເຫັນ ແລະ ອອກແຮງປະສານສົມທົບກ່ຽວກັບບັນຫາທີ່ທັງສອງຝ່າຍມີຄວາມສົນໃຈຮ່ວມກັນ, ສືບຕໍ່ຮັດແໜ້ນສາຍພົວພັນລະຫວ່າງສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນລັດເຊຍ ພ້ອມກັນນັ້ນກໍຈະດໍາເນີນການປຶກສາຫາລືແລກປ່ຽນການຢ້ຽມຢາມຂອງຄະນະຜູ້ແທນ, ທັງສອງຝ່າຍຈະເຜີຍແຜ່ຂໍ້ມູນຂ່າວສານໄດ້ຢ່າງກວ້າງຂວາງທີ່ພົວພັນກັບຊີວິດດ້ານວັດ ທະນາທໍາ,ເສດຖະກິດ - ສັງຄົມຢູ່ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນລັດເຊຍ. ເພື່ອຮັບປະກັນໃຫ້ມີການປະສານສົມທົບຊຶ່ງກັນ ແລະ ກັນ, ທັງສອງຝ່າຍຈະສ້າງຕັ້ງຄະນະກໍາມະການຮັບຜິດຊອບດ້ານເຕັກນິກທີ່ກ່ຽວຂ້ອງເພື່ອການປະສານງານເຮັດວຽກຮ່ວກັນ.

2019-11-06

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ