ແນະນຳ ສນຊ (LFND)

ກອງປະຊຸມໃຫຍ່ ຄັ້ງທີ III ຂອງໜ່ວຍພັກກົມກວດກາ ສູນກາງແນວລາວສ້າງຊາດ

ກົມ​ກວດກາ ສູນ​ກາງ​ແນວ​ລາວ​ສ້າງ​ຊາດ ​ໄດ້​ເປີດ​ກອງ​ປະຊຸມ​ໃຫຍ່ ຄັ້ງ​ທີ III ຂອງ​ໜ່ວຍ​ພັກຂຶ້ນ ​ໃນ​ວັນ​ທີ 7 ພະຈິກ 2019 ນີ້,  ທີ​ສູນ​ກາງ​ແນວ​ລາ​ວສ້າງ​ຊາດ. ​ໂດຍ​ການ​ເປັນ​ປະທານ​ຂອງ  ສະຫາຍ ຄຳ​ໃບ ດຳລັດ ກຳມະການ​ສູນ​ກາງ​ພັກ, ຮອງ​ເລຂາ​ຄະນະ​ພັກ, ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ, ມີ​ບັນດາຜູ້ຕາງໜ້າ​ໜ່ວຍ​ພັກກົມ​ອ້ອມຂ້າງ, ສະມາ​ຊິກພັກ​ອາວຸ​ໂສ-ບຳນານ, ຜູ້​ຕ່າງ​ໜ້າ​ອົງການ​ຈັດ​ຕັ້ງ​ມະຫາຊົນ ​ແລະ ສະມາຊິກ​ພັກພາຍ​ໃນ​ໜ່ວຍ​ເຂົ້າ​ຮ່ວມ.

ສະ​ຫາຍ ນາງ ສີ​ພະຈັນ ນັນທະ​ວົງສາ ​ເລຂາ​ໜ່ວຍ​ພັກ​ກົມ​ກວດກາ ສູນ​ກາງ​ແນວ​ລາວ​ສ້າງ​ຊາດ ​ໄດ້​ຜ່ານ​ຮ່າງບົດ​ລາຍ​ງານ​ການ​ເມືອງ​  ​ເຊິ່ງປະ​ກອບ​ມີ​ສອງ​ພາກ​ຄື: ພາກ​ທີ I ສັງ​ເກດ​ຕີ​ລາຄາ​ການຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ II ຂອງ​ໜ່ວຍ​ພັກ​ກົມ​ກວດກາ ​ໄລຍະ ປີ 2014-2019. ​ເຊິ່ງ​ໃນ​ໄລຍະ​ທີ່​ຜ່ານ​ມາຄະ​ນະ​ໜ່ວຍ​ພັກ​ໄດ້​​ເອົາ ໃຈ​ໃສ່​ການ​ສຶກສາ​ອົບຮົມ​ການ​ເມືອງ-​ແນວ​ຄິດ​ໃຫ້​ສະມາຊິກ​ພັກ, ພະນັກງານ​ຂອງ​ຕົນ​ດ້ວຍຫຼາຍຮູບການ ​ແລະ ຖື​ສຳຄັນ​ຕໍ່ວຽກງານ​ກໍ່ສ້າງ​ພັກ ​ແລະ ຂະຫຍາຍ​ພັກ​ຕາມ​ທິດ​ຂອງ​ການກໍ່ສ້າງ​ພັກ ຕະຫຼອດ​ໄລຍະ 5 ປີ ສາມາດ​ກໍ່ສ້າງ ​ແລະ ຂະຫຍາຍ​ມະຫາຊົນ​ກ້າວໜ້າ​ທີ່​ມີ​ມາດຖານ​ເງື່ອນ​ໄຂ​ ​ເຂົ້າ​ເປັນ​ສະມາຊິກ​ພັກ​ສົມບູນ 3 ສະຫາຍ; ສຳຮອງ 1 ສະຫາຍ, ຮຽນກົດລະບຽບພັກ 1 ສະຫາຍ ແລະ ຮຽນສະໜັບສະໜູນ 1 ສະຫາຍ. ​ໃນ​ນີ້​ຄະນະ​ໜ່ວຍ​ພັກ​ໄດ້​ເອົາ​ໃຈ​ໃສ່​ໃນ​ການ​ຊີ້​ນຳ-ນຳພາ ​ໂດຍ​ຫັນ​ເອົາ 6 ​ແຜນ​ງານ​ຂອງ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ແນວ​ລາວ​ສ້າງ​ຊາດ​ມາ​ເປັນ 2 ​ແຜນ​ງານ, 5 ​ໂຄງການ 15 ກິດຈະ​ກຳ ທີ​ມີ​ຜົນສຳ​ເລັດ; ພາກ​ທີ II ທິດ​ທາງ​ແຜນການ​ສູ້​ຊົນ​ຂອງ​ໜ່ວຍ​ພັກ​ກົມ​ກວດກາ ​ໃນຕໍ່ໜ້າ ແຕ່ປີ 2020-2025 ​ແລະ ​ໄດ້ຮັບ​ຟັງ​ສະຫາຍ​ຮອງ​ເລຂາ​ພັກ​ຜ່ານ ບົດສຳຫຼວດການນຳພາ ຂອງຄະນໜ່ວຍພັກ ສະໄໝທີ II ປີ(2014-2019).  ​ເຊິ່​ງ​ໃນ​ປັດຈຸບັນ​ໜ່ວຍພັກ​ກົມ​ກວດກາປະກອບມີ: ເລຂາໜ່ວຍພັກ 1 ສະຫາຍ, ຮອງເລຂາໜ່ວຍພັກ 1 ສະຫາຍ, ມີສະມາ ຊິກພັກທັງໝົດ 9 ສະຫາຍ, ໃນນັ້ນມີສະມາຊິກເປັນອາດີດການນຳ ແລະ ພະນັກງານບຳນານ 2 ສະຫາຍ; ຈາກ​ນັ້ນ ​ກອງ​ປະຊຸມ​ໄດ້​ໃຊ້​ສິດ​ປະຊາທິປະ​ໄຕ ປ່ອນ​ບັດ​ເລືອກ​ເອົາ ຄະນະ​ພັກ​ຊຸດ​ໃມ່ ​ໂດຍ​ກອງ​ປະຊຸມ​ໄດ້​ເຫັນ​ດີ​ເປັນ​ເອກະ​ພາບ​ເລືອກ​ເອົາ ສະຫາຍ ນາງ ສີ​ພະຈັນ ນັນທະ​ວົງສາ  ​ເປັນ​ເລຂາ​ໜ່ວຍ​ພັກ, ສະຫາຍ ດາວ​ວັນ ​ໂຊຕຸກກີ ​ເປັນ​ຮອງ​ເລຂາ​ທັງ​ເປັນ​ປະທານ​ກວດກາ ​ແລະ ສະຫາຍ ນາງ ​ໄກສອນ ຂະ​ຫຍອງ​ເອກ ​ເປັນ​ຄະນະ​ໜ່ວຍ.

          ໃນໂອກາດນີ້, ສະຫາຍ ຄຳໃບ ດຳລັດ ກຳມະການ​ສູນ​ກາງ​ພັກ, ຮອງ​ເລຂາ​ຄະນະ​ພັກ, ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່ຜົນ​ງານ​ທີ່​ຍາດ​ມາ​ໄດ້​ໃນ​ໄລຍະ​ທີ່​ຜ່ານ​ມາ ​ໂດຍ​ສະ​ເພາະ​ການ​ຊີ້​ນຳ-ນຳພາ ຂອງ​ຄະນະ​ໜ່ວຍ​ພັກກົມ​ກວດກາ​ທີ່​ໄດ້ຕິດຕາມ​, ກວດກາຂົງ​ເຂດ​ວຽກງານແນວ​ລາວ​ສ້າງ​ຊາດ ​ໄດ້​ມີ​ການ​ຫັນປ່ຽນຢ່າງ​ຕັ້ງໜ້າ. ພ້ອມ​ນີ້ ທ່ານ​ຍັງ​ໄດ້​​ເນັ້ນຕື່ມບາງ​ບັນຫາ​ທີ່​ຄວນ​ເອົາ​ໃຈ​​ໃສ່​ຄື: ຈົງ​ເພີ່ມທະວີ​​ເອົາ​ໃຈ​ໃສ່​ໃນ​ການສຶກສາ​ອົບຮົມ​ການ​ເມືອງ-​ແນວ​ຄິດ ​ໃຫ້ຖັນ​ແຖວ​ສະມາຊິກ​ພັກ, ​ພະນັກງານ​-ລັດຖະກອນ ທີ່​ຂຶ້ນ​ກັບ​ຄວາມ​ຮັບຜິດ​ຊອບຂອງ​ຕົນ ​ໃຫ້​ມີ​ຄວາມ​ຮັບ​ຮູ້, ​ເຂົ້າໃຈ​ຕໍ່​ແນວທາງ​ຂອງ​ພັກ ​ແລະ ປະກອບ​ສ່ວນ​ຢ່າງ​ຕັ້ງໜ້າ ​ໃນ​ການ​ສ້າງ​ຂະ​ບວນການ​ຕ່າງໆ ​ເພື່ອ​ສະເຫຼີມສະຫຼອງວັນ​ສຳຄັນ​ຕ່າງໆ; ​ເອົາ​ໃຈ​ໃສ່​ໃນ​ການ​ເຂົ້າ​ຮ່ວມ​ຮັບ​ຟັງ​ການ​ເຜີຍ​ແຜ່, ​ເຊື່ອມ​ຊຶມ​ເອກະສານ​ນິຕິ​ກຳ​ຕ່າງໆ ​ເພື່ອ​ແນ່​ໃສ່​ເຮັດ​ໃຫ້​ສະມາຊິກ​ພັກ​ມີ​ຄວາມ​ຮັບ​ຮູ້, ​ເຂົ້າ​ໃຈ, ກ​ຳ​ໄດ້ ​ແລະ ສາ​ມາດ​ຈັດ​ຕັ້ງ​ຜັນ​ຂະ​ຫຍາ​ຍ​ເຂົ້າ​ສູ່​​ໜ້າ​ທີ່​ວຽກງານ​ທີ່​ຕົນ​ຮັບຜິດຊອບ; ສືບຕໍ່ຊີ້​ນຳ-ນຳພາ ຄົ້ນຄວ້າ ​ແລະ ຫັນ​ເອົາ​ແຜນການ​ເຄື່ອນ​ໄຫວ​ຂອງ​ຄະນະ​ພັກ​ໃນ​ແຕ່ລະ​ໄລຍະ, ນິຕິ​ກຳ​​ໃນຂົງ​ເຂດ​ວຽກງານ​ກວດກາ, ມະຕິ​ກອງ​ປະຊຸມ​ໃຫຍ່​ຄັ້ງ​ນີ້​ເປັນອັນ​ລະອຽດ ພ້ອມ​ທັງ​ຈັດ​ຕັ້ງ​ປະຕິບັດ​ໃຫ້​ກາຍ​ເປັນ​ຮູບ​ປະ​ທຳ; ສືບຕໍ່ນຳພາ​ຈັດ​ຕັ້ງ​ປະຕິບັດ​ແຜນການ​ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ສາມາດປະເມີນໄດ້ໜ່ວຍ ພັກປອດໃສ, ເຂັ້ມແຂງ, ໜັກແໜ້ນໃນແຕ່ລະປີຕິດພັນກັບການຈັດຕັ້ງປະຕິບັດໜ້າທີ່ການເມືອງ, ແຜນຍຸດທະສາດ ການພັດທະນາ ຂອງສູນກາງແນວລາວສ້າງຊາດ, ແຜນງານ, ໂຄງການກິດຈະກຳຕ່າງໆ ຂອງກົມ 5 ປີຕໍ່ໜ້າໃຫ້ບັນລຸຈຸດ ປະສົງ-ຕາມຄາດໝາຍທີ່ວາງໄວ້.

2019-11-08

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ