ແນະນຳ ສນຊ (LFND)

ກອງປະຊຸມຝຶກອົບຮົມວຽກງານສາສະໜາໃຫ້ແກ່ພະນັກງານແນວລາວສ້າງຊາດ ຂັ້ນສູນກາງ, ແຂວງ ແລະ ເມືອງ

ໃນວັນທີ 5-7 ພະຈິກ 2019 ນີ້, ທີ່ສູນກາງແນວລາວສ້າງຊາດ ໄດ້ຈັດກອງປະຊຸມຝຶກອົບຮົມວຽກງານສາສະໜາໃຫ້ແກ່ພະນັກງານແນວລາວສ້າງຊາດ ຂັ້ນສູນກາງ, ແຂວງ ແລະ ເມືອງ ໂດຍການເປັນປະທານຂອງທ່ານ ຮສ. ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ (ຜູ້ຊີ້ນໍາວຽກງານສາສະໜາ) ເປັນກຽດເຂົ້າຮ່ວມບັນຍາຍເອກະສານຂອງທ່ານ ນ. ເຈີ່ນທິ ມິງງາ ຮອງຫົວໜ້າຄະນະກໍາມະການສາສະໜາແຫ່ງລັດຖະບານ ສສ ຫວຽດນາມ ມີທ່ານ ຄະນອງລິດ ສີສົມບູນ, ຫົວໜ້າກົມສາສະນາ ສນຊ ມີບັນດາທ່ານຊ່ຽວຊານມາຈາກ ສສ ຫວຽດນາມ ແລະ ມີບັນດານັກສໍາມະນາກອນມາຈາກບັນດາແຂວງ ແລະ ເມືອງຈໍານວນໜຶ່ງເຂົ້າຮ່ວມ.

ຈຸດປະສົງໃນການຝຶກອົບຮົມວຽກງານສາສະໜາຄັ້ງນີ້, ເພື່ອປະຕິບັດຕາມ ຂໍ້ຕົກລົງການຮ່ວມມືສອງຝ່າຍລະຫວ່າງຄະນະກໍາມະການສູນກາງແນວລາວສ້າງຊາດ ແລະ ຄະນະກໍາມະການສາສະໜາແຫ່ງລັດຖະບານ ສສ ຫວຽດນາມ ໄລຍະປີ 2014-2020 ທີ່ໄດ້ເຊັນຢູ່ທີ່ນະຄອນຫຼວງຮ່າໂນຍ ຄັ້ງວັນທີ 8/7/2014.ຊູດຝຶກອົບຮົມຄັ້ງນີ້ ໄດ້ຈັດເປັນເວລາ 3 ວັນ ເລີ່ມແຕ່ວັນທີ 5-7 ພະຈິກ 2019 ໄດ້ແບ່ງເປັນສອງພາກຄື: ພາກທິດສະດີ ແລະ ບົດຮຽນຕົວຈິງເປັນ 2 ວັນ; ທັດສະນະສຶກບັນດາໂບດ ຂອງສາສະໜາຕ່າງໆ ຢູ່ນະຄອນຫຼວງວຽງຈັນ ເປັນເວລາ 1 ວັນ. ຊິ່ງກອງປະຊຸມຝຶກອົບຮົມວຽກງານສາສະໜາຄັ້ງນີ້, ໄດ້ເຜີຍແຜ່ 5 ເອກະສານທີ່ສໍາຄັນຄື: ເຜີຍແຜ່ເອກະສານ ສະພາບສາສະໜາຢູ່ໃນໂລກ ແລະ ສສ ຫວຽດນາມ ໃນປັດຈຸບັນ; ເຜີຍແຜ່ເອກະສານ ແນວທາງນະໂຍບາຍຂອງພັກ-ລັດ ຫວຽດນາມຕໍ່ວຽກງານສາສະໜາ; ເຜີຍແຜ່ເອກະສານ ການຄຸ້ມຄອງລັດ ສສ ຫວຽດນາມ ຕໍ່ວຽກງານສາສະໜາ; ເຜີຍແຜ່ເອກະສານ ການພົວພັນປະສານສົມທົບ ລະຫວ່າງ ຄະນະກໍາມະການສາສະໜາ ແຫ່ງລັດຖະບານ ສສ ຫວຽດນາມ ກັບ ຄະນະກໍາມະການແນວໂຮມປະເທດຊາດຫວຽດນາມ; ເຜີຍແຜ່ ເອກະສານສາສະໜາເຢຊູຄຮິດ ແລະ ບົດຮຽນໃນການຄຸ້ມຄອງສາສະໜາດັ່ງກ່າວ ຢູ່ ຫວຽດນາມ. ພ້ອມກັນນີ້, ຜູ້ແທນເຂົ້າຮ່ວມກອງປະຊຸມຝຶກອົບຮົມວຽກງານດັ່ງກ່າວ ໄດ້ຕັ້ງຄໍາຖາມແລກປ່ຽນບົດຮຽນຢ່າງກົງໄປກົງມາຢ່າງເລິກເຊິ່ງຕໍ່ວຽກງານສາສະໜາ.
ໃນໂອ້ກາດນີ້, ທ່ານ ຮສ. ດຣ ສົມອົກ ກິ່ງສະດາ ໄດ້ເປັນກຽດໂອ້ລົມວ່າ: ກ່ອນອື່ນທ່ານໄດ້ສະແດງຍ້ອງຍໍຊົມເຊີຍຕໍ່ກົມສາສະໜາ ທີ່ໄດ້ຫ້າງຫາກະກຽມຢ່າງຮອບດ້ານ, ຊົມເຊີຍຕໍ່ບັນດານັກສໍາມະນາກອນມີຄວາມຮັບຜິດຊອບສູງໃນການຄົ້ນຄວ້າແລກປ່ຽນບົດຮຽນ ແລະ ຊົມເຊີຍຕໍ່ບັນດາທ່ານຊ່ຽວຊານທີ່ມາຈາກ ສສ ຫວຽດນາມ ທີ່ໄດ້ກະກຽມບົດຮຽນອັນລໍ້າຄ່າ ເຂົ້າໃນການຝຶກອົບຮົມຄັ້ງນີ້ ຖືວ່າເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດ ລາວ-ຫວຽດນາມ ໃຫ້ມີຄວາມໜັກແໜ້ນເຂັ້ມແຂງຮອບດ້ານ. ພ້ອມກັນນີ້, ທ່ານ ໄດ້ເນັ້ນໃຫ້ບັນດາພະນັກງານທີ່ເຮັດວຽກງານສາສະໜາ ໃຫ້ນໍາເອົາບົດຮຽນດັ່ງກ່າວ ໄປໝູນໃຊ້ເຂົ້າໃນວຽກງານຕົວຈິງ ໃຫ້ເກີດປະໂຫຍດສູງສຸດ ແລະ ໃຫ້ພວກທ່ານຈົ່ງສືບຕໍ່ເປັນຫູເປັນຕາເພື່ອບໍ່ໃຫ້ມີຜູ້ສວຍໃຊ້ສາສະໜາຕ່າງໆໄປໃນທາງທີ່ບໍ່ຖືກຕ້ອງຕາມລະບຽບກົດໝາຍບ້ານເມືອງ.

2019-11-08

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ