ແນະນຳ ສນຊ (LFND)

ກອງປະຊຸມໃຫຍ່ ຄັ້ງທີ III ຂອງໜ່ວຍພັກກົມຈັດຕັ້ງ ແລະ ພະນັກງານ ສູນກາງແນວລາວສ້າງຊາດ

ໃນວັນທີ 8 ພະຈິກ 2019 ນີ້, ໜ່ວຍພັກກົມຈັດຕັ້ງ ແລະ ພະນັກງານ ສູນກາງແນວລາວສ້າງຊາດ(ສນຊ) ໄດ້ຈັດກອງປະຊຸມໃຫຍ່ ຄັ້ງທີ III ຂອງໜ່ວຍພັກກົມຈັດຕັ້ງ ແລະ ພະນັກງານ ສູນກາງແນວລາວສ້າງຊາດ ຂື້ນ, ໂດຍການເປັນປະທານຂອງ ສະຫາຍ ຄຳຢາດ ລາດສະດາວົງ ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ສູນກາງແນວລາວສ້າງຊາດ, ເປັນກຽດເຂົ້າຮ່ວມຂອງ ສະຫາຍ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະພັກ, ປະທານສູນກາງແນວລາວສ້າງຊາດ, ສະຫາຍ ຄຳຫຼ້າ ລິ້ງນະສອນ ຄະນະພັກ, ຮອງປະທານສູງກາງແນວລາວສ້າງຊາດ ຜູ້ຊີ້ນຳວຽກງານຈັດຕັ້ງ ແລະ ພະນັກງານ, ມີບັນດາສະຫາຍເລຂາ-ຮອງເລຂາໜ່ວຍພັກຫ້ອງການ, ບັນດາກົມ, ສູນຝຶກອົບຮົມ ແລະ ຜູ້ຕາງໜ້າບັນດາອົງການຈັດຕັ້ງມະຫາຊົນ ອ້ອມຂ້າງສູນກາງແນວລາວສ້າງຊາດ ເຂົ້າຮ່ວມ.

ສະຫາຍ ຄຳຢາດ ລາດສະດາວົງ ໄດ້ຜ່ານບົດລາຍງາຍການເມືອງ ແລະ ບົດສຳຫຼວດການນຳພາລວມຂອງໜ່ວຍພັກ ໂດຍຫຍໍ້ ຊຶ່ງສະຫາຍໄດ້ຍົກໃຫ້ເຫັນວ່າໃນໄລຍະຜ່ານມາ ຄະນະໜ່ວຍພັກໄດ້ຖືເອົາວຽກງານການເມືອງ-ແນວຄິດເປັນກົກ ແລະ ສອດຫ້ອຍເຂົ້າທຸກວຽກງານ, ໄດ້ຈັດຕັ້ງເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ສະມາຊິກພັກ-ພະນັກງານໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ສະມາຊິກພັກໄດ້ມີການບຸກບືນ ຈັດຕັ້ງປະຕິບັດກອງປະຊຸມໃຫຍ່ ຄັ້ງທີ II ແລະ ຍາດໄດ້ຜົນງານຫຼາຍດ້ານ, ໄດ້ເອົາໃຈໃສ່ນຳພາຮ່ວມຊີວິດພັກເປັກປົກກະຕິ, ມີການຕຳນິຕິຊົມເຊິ່ງກັນ ແລະ ກັນ ເຮັດໃຫ້ໜ່ວຍພັກໄດ້ຮັບການຢັ້ງຢືນເປັນໜ່ວຍພັກແຂງ-ຮູ້ນຳພາຮອບດ້ານ ປີ 2017 ແລະ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປີ 2018; ໄດ້ຖືສຳຄັນຕໍ່ການປັບປຸງການຈັດຕັ້ງຕາມພາລະບົດບາດ, ສິດ ແລະ ໜ້າທີ່ ຜ່ານມາໄດ້ຄົ້ນຄວ້ານຳສະເໜີຄະນະພັກ ສນຊ ແຕ່ງຕັ້ງພະນັກງານບັນຈຸເຂົ້າແຕ່ລະຕາມແໜ່ງ ຕາມຄວາມເໝາະສົມ ເຮັດໃຫ້ກົງຈັກພາຍໃນກົມມີຄວາມໜັກແໜ້ນ ແລະ ເຄື່ອນໄຫວຢ່າງມີປະສິດທິຜົນ; ໄດ້ຊີ້ນຳ-ນຳພາວຽກຂະຫຍາຍພັກຢ່າງຖືກຕ້ອງຕາມລະບຽບຂອງພັກ, ເອົາໃຈໃສ່ກໍ່ສ້າງມະຫາຊົນຜູ້ກ້າວໜ້າ ຮຽນສະໜັບສະໜູນ, ຮຽນກົດລະບຽບ, ຂະຫຍາຍເຂົ້າເປັນສະມາຊິກພັກສຳຮອງ ແລະ ສົມບູນ. ພ້ອມກັນນັ້ນ, ໄດ້ມີການປ້ອນບັດເລືອກຕັ້ງ ຄະນະໜ່ວຍພັກຊຸດໃໝ່ ແລະ ກອງປະຊຸມໄດ້ເຫັນດີເປັນເອກະພາບຕົກລົງເອົາຄະນະໜ່ວຍພັກ 3 ສະຫາຍ ໂດຍແມ່ນ ສະຫາຍ ຄຳຢາດ ລາດສະດາວົງ ເປັນເລຂາໜ່ວຍພັກ, ສະຫາຍ ເມັດຄຳ ແກ້ວບຸດດີ ເປັນຮອງເລຂາໜ່ວຍພັກ ພ້ອມທັງເປັນປະທານກວດກາ ແລະ ສະຫາຍ ສົມສັກ ພົມປັນຍາ ເປັນຄະນະໜ່ວຍພັກ ກົມຈັດຕັ້ງ ແລະ ພະນັກງານ ສູນກາງແນວລາວສ້າງຊາດ.
ສະຫາຍ ເລຂາຄະນະພກ ສນຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ການເຄື່ອນໄຫວຂອງຄະນະໜ່ວຍພັກໃນໄລຍະຜ່ານມາ ແລະ ສະຫາຍໄດ້ເນັ້ນຕື່ມວ່າ: ໃຫ້ສືບຕໍ່ຄົ້ນຄວ້າ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຂອງໜ່າຍພັກຕົນໃຫ້ປະກົດຜົນເປັນຈິງ, ການກໍ່ສ້າງພັກຕ້ອງອີງໃສ່ກົດລະບຽບຂອງພັກຢ່າງເຂັ້ມງວມ ເພື່ອຮັບປະກັນທາງດ້ານຄຸນນະພາບ; ການເລືອກເຟັ້ນ, ສັບຊ້ອນ ແລະ ນຳໃຊ້ພະນັກງານ ຕ້ອງສອດຄ່ອງກັບຄວາມຮຽກຮ້ອງຕ້ອງການຂອງແຕ່ລະວຽກງານ; ການກໍ່ສ້າງ ແລະ ບຳລຸງພະນັກງານ ຕ້ອງປະຕິບັດຕາມແຜນກຳນົດ ໃນການກໍ່ສ້າງຢ່າງຄັກແນ່; ໃຫ້ສະມາຊິກພັກຈົ່ງເອົາໃຈໃສ່ຍົກລະດັບຄວາມຕື່ນຕົວຕໍ່ການປະຕິບັດໜ້າທີ່ວຽກງານດ້ວຍຄວາມຫ້າວຫັນ, ສະເໝີຕົ້ນ, ສະເໝີປາຍ, ມີຄວາມປອດໃສ, ມີຄວາມຮັບຜິດຊອບສູງ, ມີຄວາມອົບທົນພະຍາຍາມຜ່ານຜ່າອຸປະສັກຕ່າງ ແລະ ປະຕິບັດກົດລະບຽບຂອງພັກຢ່າງເຂັ້ມງວດ; ປັບປຸງແບບແຜນວິທີການເຄື່ອນໄຫວໃຫ້ສອດຄ່ອງກັບສະພາບຕົວຈິງ, ແທດເໝາະກັບແຕ່ລະເປົ້າໝາຍ, ຕິດພັນກັບຮາກຖານ ແລະ ເຂົ້າເຖີງມະຫາຊົນຕົວຈິງ; ເອົາໃຈໃສ່ຊຸກຍູ້ສະມາຊິກພັກ-ພະນັກງານລັດຖະກອນ ເພື່ອນຳໃຊ້ຄວາມຮູ້ຄວາມສາມາດ, ກ້າຄິດ, ກ້າເຮັດ, ກ້າສະແດງອອກ, ກ້າຮັບຜິດຊອບ ແລະ ຕື່ນຕົວເຂົ້າຮ່ວມເຮັດວຽກເປັນໝູ່ຄະນະ; ເຊື່ອມຊຶມມະຕິຄຳສັ່ງຂອງພັກ, ແນວທາງນະໂຍບາຍຂອງພັກ ໃນແຕ່ລະໄລຍະ, ສ້າງເງື່ອນໄຂເຄື່ອນໄຫວຂະບວນການຕ່າງໆ ເພື່ອທົດສອບມະຫາຊົນໃຫ້ເປັນແບບຢ່າງທີ່ດີ ແລະ ມີຄວາມຕື່ນຕົວປະກອບສ່ວນໃນການປົກປັກຮັກສາ ແລະ ສ້າງສາພັດທະນາປະເທດຊາດ.

2019-11-18

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ