ແນະນຳ ສນຊ (LFND)

ພິທີພົບປະສອງຝ່າຍ

ພິທີພົບປະສອງຝ່າຍລະຫວ່າງສູນກາງແນວລາວສ້າງຊາດ (ສນຊ) ແຫ່ງສປປລາວແລະສະພາທີ່ປຶກສາການເມືອງທົ່ວປະເທດຈີນໄດ້ຈັດຂຶ້ນເມື່ອວັນທີ 18 ພະຈິກ 2019 ນີ້, ທີ່ສຳນັກງານສນຊ, ຝ່າຍລາວນຳໂດຍສະຫາຍໄຊສົມພອນພົມວິຫານກຳມະການກົມການເມືອງສູນກາງພັກປະທານສູນກາງແນວລາວສ້າງຊາດ, ຝ່າຍຈີນນຳໂດຍສະຫາຍ ຫວາງ ຢາງ ຄະນະປະຈຳກົມການເມືອງສູນກາງພັກກອມມູນິດຈີນປະທານສະພາທີ່ປຶກສາການເມືອງທົ່ວປະເທດຈີນ.

ການພົບປະຄັ້ງນີ້, ສອງ ຝ່າຍໄດ້ລາຍງານສະພາບການທີ່ພົ້ນເດັ່ນພາຍໃນປະເທດໃຫ້ກັນຊາບ, ສປປ ລາວ ມີສະຖຽນລະພາບທາງດ້ານການເມືອງໜັກແໜ້ນ "ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມສະຫງົບປອດໄພໂດຍພື້ນຖານ, ປະຊາຊົນບັນດາເຜົ່າມີຄວາມສາມັກຄີປອງດອງ, ອັດຕາການເຕີບໂຕທາງດ້ານເສດຖະກິດໝົດປີ 2019 ຈະຂະຫຍາຍຕົວຢູ່ໃນລະດັບ 6,4%, ສະເລ່ຍຕໍ່ຫົວຄົນປະມານ 2.683 ໂດລາ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເທື່ອລະກ້າວໂດຍຢຶດໝັ້ນຕໍ່ແນວທາງປ່ຽນແປງໃໝ່ໄດ້ຖືເອົາການພັດທະນາເສດຖະກິດສັງຄົມເປັນພາລະກິດຕົ້ນຕໍເພື່ອແກ້ໄຂຄວາມທຸກຍາກຂອງປະຊາຊົນ, ນໍາພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາ, ຫຼຸດຜ່ອນຄວາມແຕກໂຕນດ້ານການພັດທະນາກັບບັນດາປະເທດເພື່ອນບ້ານໃກ້ຄຽງຊຶ່ງບັນຫາບຸລິມະສິດແມ່ນສຸມໃສ່ແກ້ໄຂຄວາມທຸກຍາກຂອງປະຊາຊົນ, ເອົາໃຈ ໃສ່ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດແລະຢຶດໝັ້ນໃນການປະຕິບັດແນວທາງການຕ່າງປະເທດເອກະລາດ, ສັນຕິພາບ, ມິດຕະພາບ ແລະ ຮ່ວມມືພັດທະນາກັບນາໆປະເທດ.
ສໍາລັບອົງການແນວລາວສ້າງຊາດໄດ້ມີຜົນສຳເລັດໃນການຈັດຕັ້ງປະຕິບັດໜ້າທີ່ການເມືອງທີ່ພັກມອບໝາຍຕາມພາລະບົດບາດ, ໜ້າທີ່ຂອງຕົນ, ເປັນຕົ້ນການຄົ້ນຄ້ວາປັບປຸງຮ່າງມະຕິຂອງກົມການເມືອງສູນກາງພັກວ່າດ້ວຍວຽກງານແນວໂຮມແລະວຽກງານມະຫາຊົນໃນໄລຍະໃໝ່, ຮ່າງຄຳແນະນໍາການຈັດຕັ້ງປະຕິບັດຮີດຄອງປະເພນີເຜົ່າລາວມົ້ງ, ວຽກງານຜູ້ຊົງຄຸນວຸດທິ, ເຕົ້າ ໂຮມຄວາມສາມັກຄີບັນດາເຜົ່າຢູ່ພາຍໃນແລະຄົນເຊື້ອຊາດລາວຢູ່ຕ່າງປະເທດ, ການສະເຫຼີມສະຫຼອງວັນຊາວພຸດໂລກແລະວັນວິສາຂະບູຊານາໆຊາດ, ສໍາເລັດການດໍາເນີນກອງປະຊຸມຄະນະປະຈໍາສູນກາງແນວລາວສ້າງຊາດເປີດກວ້າງຄັ້ງທີ 4 ສະໄໝທີX, ໃນປີ 2020 ສູນກາງແນວລາວສ້າງຊາດຈະໄດ້ຈັດກອງປະຊຸມຄົບຄະນະກຳມະການສູນກາງແນວລາວສ້າງຊາດຄັ້ງທີ 5 ແລະ ພິທີສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 70 ປີ ໃນວັນທີ 13 ເດືອນສິງຫາ.
ກ່ຽວກັບການພົວພັນຮ່ວມມືສອງຝ່າຍເຫັນວ່າການພົວພັນລາວ-ຈີນແມ່ນຢູ່ໃນໄລຍະທີ່ດີທີ່ສຸດໃນປະຫວັດສາດ, ການພົວພັນຮ່ວມມືລະຫວ່າງສອງຝ່າຍໄລຍະຜ່ານມາກໍຄືປັດຈຸບັນສືບຕໍ່ໄດ້ຮັບການເສີມຂະຫຍາຍທັງທາງກວ້າງແລະທາງເລິກ, ການນໍາຂັ້ນສູງທັງສອງພັກ, ສອງລັດໄດ້ມີການພົບປະແລກປ່ຽນການຢ້ຽມຢາມເປັນປະຈໍາ, ພິເສດໃນທ້າຍເດືອນເມສາ2019 ສະຫາຍເລຂາ ທິການໃຫຍ່ປະທານປະເທດຂອງລາວແລະຈີນໄດ້ລົງນາມ "ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາສັງຄົມນິຍົມລາວ-ຈີນ" ອັນເປັນການຍົກລະດັບສາຍພົວພັນຂອງສອງປະເທດຂຶ້ນສູ່ລະດັບສູງອັນໃໝ່, ໄດ້ຜັດປ່ຽນກັນຈັດກອງປະຊຸມສຳມະນາທິດສະດີສອງພັກລາວ-ຈີນ, ຈີນ-ລາວເປັນປົກກະຕິ, ໄດ້ຮ່ວມມືກັນກໍ່ສ້າງພະນັກງານຫຼັກແຫຼ່ງຈາກກະຊວງ, ຂະແໜງການສູນກາງແລະທ້ອງຖິ່ນຂອງລາວ, ການຈັດຕັ້ງປະຕິບັດໂຄງການສ້າງເສັ້ນທາງລົດໄຟລາວ-ຈີນຢູ່ສປປລາວຊຶ່ງແມ່ນໂຄງການທີ່ໃຫຍ່ແລະສໍາຄັນທີ່ສຸດຊຶ່ງໄດ້ຮັບການເຫັນດີຂອງສອງຝ່າຍທີ່ໄດ້ຕົກລົງນໍາກັນແລະມີຜົນຄືບໜ້າເປັນທີ່ໜ້າພໍໃຈ; ສປ ຈີນ ເປັນປະເທດທີ່ລົງທຶນອັນດັບໜຶ່ງຢູ່ລາວຊຶ່ງປັດຈຸບັນມີທັງໝົດ 785 ໂຄງການມູນຄ່າ12ຕື້ກວ່າໂດລາ, ມູນຄ່າການຄ້າສອງຝ່າຍໄດ້ເພີ່ມຂຶ້ນຢ່າງຕໍ່ເນື່ອງ, ສະເພາະ 9 ເດືອນ 2019 ບັນລຸໄດ້2,86 ຕື້ໂດລາເພີ່ມຂຶ້ນ18%; ປີນີ້, ເປັນປີທ່ອງທ່ຽວລາວ-ຈີນຊຶ່ງສອງຝ່າຍໄດ້ອອກແຮງຊຸກຍູ້ການຮ່ວມມືດ້ານການທ່ອງທ່ຽວທັງລະດັບສູນກາງກໍຄືທ້ອງຖິ່ນຊຶ່ງມາຮອດເດືອນກັນຍາຜ່ານມານີ້ມີນັກທ່ອງທ່ຽວມາທ່ຽວລາວ756.952 ເທື່ອຄົນເພີ່ມຂຶ້ນ26%. ນອກຈາກນັ້ນ, ຜ່ານມາສປຈີນໄດ້ໃຫ້ການຊ່ວຍເຫຼືອໃນໂຄງການທີ່ສໍາເລັດໄປແລ້ວ (ຫໍວັດທະນະທໍາແຫ່ງຊາດ, ຫໍປະຊຸມແຫ່ງຊາດ, ອາຄານຫ້ອງວ່າການສູນກາງພັກ, ສະຖາບັນຂົງຈື້, ສູນຝຶກອົບຮົມສູນກາງແນວລາວສ້າງຊາດແລະໂຄງການອື່ນໆທີ່ພວມຈັດຕັ້ງປະຕິບັດຫຼາຍໂຄງການ).
ສະເພາະການພົວພັນຮ່ວມມືລະຫວ່າງສູນກາງແນວລາວສ້າງຊາດແລະສະພາທີ່ປຶກສາການເມືອງທົ່ວປະເທດຈີນຜ່ານມາໄດ້ມີການພົວພັນຮ່ວມມື, ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງແລະຂັ້ນວິຊາການຢ່າງເປັນປົກກະຕິຊຶ່ງຂ້າພະເຈົ້າເອງກໍໄດ້ນໍາພາຄະນະຜູ້ແທນສູນກາງແນວລາວສ້າງຊາດເດີນທາງໄປຢ້ຽມຢາມສປຈີນຢ່າງເປັນທາງການແລະກໍໄດ້ພົບປະກັບສະຫາຍທີ່ນະຄອນຫຼວງປັກກິ່ງ, ວັນທີ 19 ມີນາຜ່ານມາແລະໄດ້ຮ່ວມເປັນສັກຂີພິຍານໃນພິທີເຊັນບົດບັນທຶກຮ່ວມມືນຳກັນໄລຍະປີ2019-2024. ໃນເດືອນພຶດສະພາ2018 ສະຫາຍ ຫວາງ ເຈີງ ເຫວີຍ ຮອງປະທານສະພາທີ່ປຶກສາການເມືອງແຫ່ງປະເທດຈີນແລະທ້າຍເດືອນກຸມພາ2019 ສະຫາຍ ກາວ ຢູນຫຼົງ (GAO YUNLONG) ຮອງປະທານສະພາທີ່ປຶກສາການເມືອງແຫ່ງປະເທດຈີນປະທານມູນນິທິຈີນເພື່ອສັນຕິພາບແລະການພັດທະນາພ້ອມຄະນະໄດ້ມາຢ້ຽມຢາມແລະເຮັດວຽກກັບສູນກາງແນວລາວສ້າງຊາດສຳລັບທິດທາງການພົວພັນຮ່ວມມືໃນຕໍ່ໜ້ານອກຈາກຈະປະຕິບັດຕາມບົດບັນທຶກທີ່ໄດ້ເຊັນຮ່ວມກັນແລ້ວ, ຍັງຈະໄດ້ຈັດກອງປະຊຸມແລກປ່ຽນບົດຮຽນຂອງບັນດາແຂວງທີ່ມີຊາຍແດນຕິດຈອດກັນໃນຂົງເຂດວຽກງານແນວໂຮມຊຶ່ງສອງປີໃດຈັດເທື່ອໜຶ່ງ. ນອກຈາກນັ້ນ, ກໍຍັງໄດ້ຄົ້ນຄວ້າຄວາມເປັນໄປໄດ້ໃນການຈັດກອງປະຊຸມພົບປະແລກປ່ຽນບົດຮຽນວຽກງານແນວໂຮມຂອງ3 ປະເທດລາວ, ຈີນ ແລະ ຫວຽດນາມ ເປັນຕົ້ນຢູ່ແຂວງຕ່າງໆຂອງ3 ປະເທດ ທີ່ມີຊາຍແດນຕິດຈອດກັນ.
ໂອກາດດັ່ງກ່າວສະຫາຍໄຊສົມພອນພົມວິຫານຕາງໜ້າໃຫ້ພັກ-ລັດ, ສູນກາງແນວລາວສ້າງຊາດແລະປະຊາຊົນລາວບັນດາເຜົ່າອວຍພອນໃຫ້ປະຊາຊົນຈີນອ້າຍນ້ອງພາຍໃຕ້ການນໍາພາອັນຖືກຕ້ອງຂອງພັກກອມມູນິດຈີນຈົ່ງສືບຕໍ່ຍາດໄດ້ຜົນສໍາເລັດອັນໃໝ່, ໃຫຍ່ຫຼວງກວ່າເກົ່າໃນພາລະກິດແຫ່ງການປະຕິຮູບເປີດປະຕູສູ່ໂລກພາຍນອກ, ການສ້າງສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່, ສືບຕໍ່ສູ້ຊົນບັນລຸເປົ້າໝາຍ "100 ປີ ສອງເຫດການສໍາຄັນ", ບັນລຸຄວາມໄຝ່ຝັນຂອງຈີນໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊາດຈີນ. ຂໍສະແດງຄວາມຮູ້ບຸນຄຸນຢ່າງເລິກເຊິ່ງແລະຄວາມຂອບໃຈຢ່າງຈິງໃຈມາຍັງພັກ-ລັດແລະປະຊາຊົນຈີນອ້າຍນ້ອງທີ່ໄດ້ໃຫ້ການສະໜັບສະໜູນຊ່ວຍເຫຼືອອັນລ້ໍາຄ່າ, ທັນການແລະມີປະສິດທິຜົນແກ່ພາລະກິດຕໍ່ສູ້ປົດປ່ອຍຊາດໃນເມື່ອກ່ອນກໍຄືໃນພາລະກິດປົກປັກຮັກສາ, ສ້າງສາພັດທະນາປະເທດຊາດແລະການຊ່ວຍເຫຼືອຕໍ່ອົງການແນວລາວສ້າງຊາດຂອງລາວໃນປັດຈຸບັນ.

2019-11-19

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ