ສູນກາງແນວລາວສ້າງຊາດ

Lao Front For National Development

ກອງປະຊຸມຄົບຄະນະກຳມະການແນວລາວສ້າງຊາດ ນະຄອນ ໄກສອນ ພົມວິຫານ ຄັ້ງທີ 3 ສະໄໝທີ VI.

​       ໃນ​ຕອນ​ເຊົ້າ​ຂອງວັນ​ທີ 28 ກັນ​ຍາ 2020 ທີ່​ສະ​ໂມ​ສອນ​ຫ້ອງວ່າ​ການ​ນະ​ຄອນ ໄກ​ສອນ​ພົມ​ວິ​ຫານ ແຂວງສະຫວັນນະເຂດ, ໄດ້ຈັດກອງ​ປະ​ຊຸມ​ຄົບ​ຄະ​ນະ​ກຳ​ມະ​ການແນວລາວສ້າງຊາດ ນະຄອນໄກ​ສອນພົມ​ວິ​ຫານ  ຄັ້ງ​ທີ 3 ສະ​ ໄໝ​ທີ VI ຂຶ້ນ , ໂດຍ​ການ​ເປັນ​ປະ​ທານ​ຂອງ​ທ່ານ ສົມ​ເພັດ ອິນ​ທະ​ທິ​ລາດ ຄະນະປະຈຳ​ພັກ​ແຂວງ, ປະ​ທານ​ແນວ​ລາວ​ສ້າງ​ຊາດ​ແຂວງ, ທ່ານ ດ​ຣ ແສງ​ທອງ ວັງ​ແກ້ວ​ມະ​ນີ ເລ​ຂາ​ພັກ​ນະ​ຄອນ ເຈົ້າ​ນະ​ຄອນ​ ໄກ​ສອນ​ ພົມ​ວິ​ຫານ, ທ່ານ ສີ​ທາ ສົງ​ວິ​ໄລ ຄະ​ນະ​ປະ​ຈຳ​ພັກ​ນະ​ຄອນ ​ປະ​ທານ​ແນວ​ລາວ​ສ້າງ​ຊາດ ​ນະ​ຄອນ ​ໄກ​ສອນ ​ພົມ​ວິ​ຫານ, ມີຄະນະກໍາມະການແນວລາວສ້າງຊາດນະຄອນ , ຫົວໜ້າຫ້ອງການອ້ອມນະຄອນ ແລະ ​ບັນ​ດາ​ທ່ານ​ແຂກທີ່ຖືກເຊີນ ເຂົ້າຮ່ວມ.

ໃນພິທີ ທ່ານ ​ປະ​ທານ​ແນວ​ລາວ​ສ້າງ​ຊາດ ​ນະ​ຄອນ​ ໄກ​ສອນ​ ພົມ​ວິ​ຫານ ໄດ້ເປັນກຽດກ່າວເປີດກອງປະຊຸມຢ່າງເປັນທາງການ ພ້ອມທັງຜ່ານບົດສະຫຼຸບ ກ່ຽວກັບຜົນງານການເຄື່ອນໄຫວວຽກງານ ໃນໄລຍະ 05 ປີຜ່ານມາ ແລະ ທິດທາງແຜນການໃນຕໍ່ໜ້າ. ກອງປະຊຸມໄດ້ເປັນເອກະພາບ ຮັບຮອງຄະນະກໍາມະການແນວລາວສ້າງຊາດຊຸດໃໝ່ຈໍານວນ 35 ທ່ານ, ພຣະສົງ 03 ອົງ, ຍິງ 02 ທ່ານ.ຮັບຮອງ ທ່ານ ສີທາ ສົງວິໄລ ຄະນະປະຈຳພັກນະຄອນ ເປັນປະທານແນວລາວສ້າງຊາດເມືອງ, ທ່ານ ນາງ ຫຼອມຄຳ ຄູນສີວິໄລ ແລະ ທ່ານ ພູທອນ ໂສນະຄອນ ເປັນຮອງປະທານ ທັງເປັນຄະນະປະຈຳແນວລາວສ້າງຊາດເມືອງ.

ໃນຕອນທ້າຍ ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມ ຂອງ ທ່ານ ສົມເພັດ ອິນທະທິລາດ ກຳມະການປະຈຳພັກແຂວງ ປະທານແນວລາວສ້າງຊາດແຂວງ. ພ້ອມກັນນັ້ນ, ກໍໄດ້ມອບ​ໃບຍ້ອງຍໍ ຂອງສູນກາງແນວລາວສ້າງຊາດ ແລະ ມອບຫຼຽນກາລະນຶກແນວລາວສ້າງຊາດ 70 ປີ  ໃຫ້ຜູ້ທີ່ມີຜົນງານດີເດັ່ນໃນການປະກອບສ່ວນເຄືອນໄຫວວຽກງານແນວລາວສ້າງຊາດ ຕະຫຼອດໄລຍະຜ່ານມາ.

info@lfnd.org.la | 021 213754 | (856-21) 453191