ສູນກາງແນວລາວສ້າງຊາດ

Lao Front For National Development

ກອງປະຊຸມຄົບຄະນະກຳມະການແນວລາວສ້າງຊາດ ແຂວງຈຳປາສັກ

ວັນທີ 04 ມິຖຸນາ 2021 ແນວລາວສ້າງຊາດແຂວງຈຳປາສັກ ໄດ້ຈັດກອງປະຊຸມສາມັນຄົບຄະນະກຳມະການ ແນວລາວສ້າງຊາດ ແຂວງຈຳປາສັກ ຄັ້ງທີ 1 ສະໄໝທີ VII ຂື້ນທີຫ້ອງປະຊຸມ  ຫ້ອງວ່າການປົກຄອງແຂວງ ພາຍໃຕ້ການເປັນປະທານຂອງທ່ານ ນາງ ວາດສະໜາ ສີລິມາ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ມີກຳມະການແນວລາວສ້າງຊາດອ້ອມຂ້າງແຂວງ ເຂົ້າຮ່ວມທັງໝົດ 36 ທ່ານ.

ກອງປະຊຸມ, ໄດ້ເປັນເອກະພາບຢ່າງສົມບູນໃນການພິຈາລະນາ ແລະ ຮັບຮອງເອົາວຽກງານຈຸດສຸມຂອງຄະນະກຳມະການແນວລາວສ້າງຊາດແຂວງ ສະໄໝທີ VII ປີ 2021 – 2025 ແລະ ໄດ້ຮັບຟັງຂໍ້ກຳນົດວ່າດ້ວຍແບບແຜນວິທີເຮັດວຽກຂອງຄະນະກຳມະການແນວລາວສ້າງຊາດແຂວງ. ພ້ອມກັນນັ້ນ ໄດ້ຮັບຟັງ ການປະກອບຄຳເຫັນຂອງເຈົ້າຄະນະອົງການພຸດທະສາສະໜາສຳພັນລາວແຂວງ ກ່ຽວກັບການເຄືອນໄຫວຂອງອົງການພຸດທະສາສະໜາໃນການໂຄສະນາເຜີຍແຜ່ການຕ້ານ ແລະ ປ້ອງກັນການແພ່ລະບາດຂອງເຊື້ອພະຍາດໂຄວິດ 19 ໃຫ້ສາສະນິກະຊົນ, ຮັບຟັງການປະກອບຄຳເຫັນຈາກຮອງພະແນກສາທາລະນະສຸກແຂວງ ໃນການຕ້ານ, ສະກັດກັ້ນ ແລະ ຄວບຄຸມການແກ້ໄຂການລະບາດຂອງເຊື້ອພະຍາດໂຄວິດ 19 ແລະ ໄດ້ຮັບຟັງການປະກອບຄຳຄິດຄຳເຫັນ ຢ່າງກົງໄປກົງມາຕໍ່ບົດສະຫຼຸບ ແລະ ທິດທາງແຜນການດຳເນີນງານປະຈຳປີ 2021.

ໂອກາດນີ້, ທ່ານປະທານແນວລາວສ້າງຊາດແຂວງ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ເຊິ່ງທ່ານໄດ້ເນັ້ນບາງບັນຫາທີ່ສຳຄັນເປັນຕົ້ນແມ່ນໃຫ້ເປັນຄັນທຸງເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ໃຫ້ມີຄວາມສາມັກຄີ ເປັນປຶກແຜນແໜ້ນໜາ, ຈັດຕັ້ງປະຕິບັດມະຕິກອງປະຊຸມໃຫຍ່ຂັ້ນຕ່າງໆຂອງພັກ, ຂອງແນວລາວສ້າງຊາດໃຫ້ມີຜົນສຳເລັດ, ຫັນລົງກໍ່ສ້າງຮາກຖານການເມືອງ, ສຶບຕໍ່ເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໃຫ້ກວ້າງຂວາງ ເພື່ອເຮັດໃຫ້ປະຊາຊົນບັນດາເຜົ່າມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ, ຕ້ານປະກົດການຍໍ້ທໍ້ທີ່ຈະເກີດຂື້ນໃນສັງຄົມໃຫ້ຫຼຸດນ້ອຍຖອຍລົງ ແລະ ໃຫ້ຄະນະກຳມະການແນວລາວສ້າງຊາດ, ອົງການຈັດຕັ້ງພາຄີ ແລະ ຄະນະທີ່ປຶກສາຈົ່ງພ້ອມກັນເພີ່ມທະວີປະສານສົມທົບກັນ ເພື່ອພ້ອມກັນຈັດຕັ້ງປະຕິບັດໜ້າທີ່ວຽກງານໃນການເຄື່ອນໄຫວທີ່ກອງປະຊຸມຄັ້ງນີ້ວາງອອກໃຫ້ໄດ້ຮັບຜົນສຳເລັດ.

info@lfnd.org.la | 021 213754 | (856-21) 453191