ສູນກາງແນວລາວສ້າງຊາດ

Lao Front For National Development

ກອງປະຊຸມຄົບຄະນະບໍລິຫານງານຊາວໜຸ່ມ ສູນກາງແນວລາວສ້າງຊາດ ຄັ້ງທີ 2 ສະໄໝທີ VII

ຄະນະບໍລິຫານງານຊາວໜຸ່ມ ສູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມຄັ້ງທີ 2 ສະໄໝທີ VII ຂຶ້ນ ພາຍໃຕ້ການ ເປັນປະທານຂອງ ທ່ານ ແກ້ວຈະເລີນ ເຊ່ຍຢີ້ງຢ່າງ ຄະນະພັກ, ຄະນະປະຈຳ, ຫົວໜ້າກົມໂຄສະນາ-ອົບຮົມ, ຄະນະບໍລິຫານງານສູນ ກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ສນຊ;

ເປັນກຽດເຂົ້າຮ່ວມຂອງ ທ່ານ ຄຳໃບ ດຳລັດ ກຳມະການສູນກາງພັກ, ຮອງເລຂາຄະນະພັກ, ຮອງປະທານ, ຜູ້ຊີ້ນຳວຽກງານ ອົງການຈັດຕັ້ງມະຫາຊົນ ສູນກາງແນວລາວສ້າງຊາດ, ມີຜູ້ຕາງໜ້າຄະນະໜ່ວຍພັກ, ຕາງໜ້າບັນດາອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມ ສນຊ ເຂົ້າຮ່ວມ ທັງໝົດ 53 ສະຫາຍ ຍິງ 24 ສະຫາຍ ທີ່ຫ້ອງປະຊຸມໃຫຍ່ (ຊັ້ນ2) ສນຊ, ໃນວັນທີ 25 ສິງຫາ 2017 ນີ້.

ໃນວາລະກອງປະຊຸມ, ທ່ານ ແກ້ວຈະເລີນ ເຊ່ຍຢິ້ງຢ່າງ ກໍ່ໄດ້ກ່າວເປີດກອງປະຊຸມພ້ອມທັງລາຍງານແຜນການເຄື່ອນໄຫວໃນ ໄລຍະຜ່ານມາໂດຍສັງເຂບ ຂອງຄະນະບໍລິຫານຊາວໜຸ່ມ ສນຊ ແລະ ທິດທາງແຜນການໃນຕໍ່ໜ້າ (2018) ເຊິ່ງທ່ານຍົກໃຫ້ຮູ້ ວ່າ: ກົງຈັກການຈັດຕັ້ງຂອງຄະນະບໍລິຫານງານຊາວໜຸ່ມ ສນຊ ໄດ້ແບ່ງອອກເປັນ 9 ໜ່ວຍຊາວໜຸ່ມ, 3 ໜ່ວຍງານ, ມີສະມາ ຊິກທັງໝົດ 88 ສະຫາຍ, ຍິງ 44 ສະຫາຍ; ຄະນະຊາວໜຸ່ມໄດ້ເຂົ້າຮ່ວມກອງປະຊຸມສາມະນາ, ການເຄື່ອນໄຫວລົງຮາກຖານ, ພິ ເສດແມ່ນໄດ້ຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງແນວລາວສ້າງຊາດ, ສ້າງຂະບວນການແຂ່ງຂັນກິລາປະ ເພດຕ່າງໆ ແລະ ໄດ້ປຸກລະດົມຂະບວນການບໍລິຈາກເລືອດຊ່ວມເຫຼືອສັງຄົມ ໃນວັນສາມັກຄີປອງດອງທົ່ວປວງຊົນ ເພື່ອສະເຫຼີມ ສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 67 ປີ, ໄດ້ຊຸມໃສ່ການປຸກລະດົມພະນັກງານ-ສະມາຊິກຊາວໜຸ່ມ ເຂົ້າຮ່ວມ ການເຊື່ອມຊຶມມະຕິຄຳສັ່ງ, ຄຳສັ່ງແນະນຳ, ສຶກສາອົບຮົມຄຸນສົມບັດສິນທຳປະຕິວັດ, ນຳພາການເມືອງ-ແນວຄິດ, ເຕົ້າໂຮມ ຄວາມສາມັກຄີຂອງສະມາຊິກຊາວໜຸ່ມ, ຍົກສູງສະຕິຕໍ່ການຈັດຕັ້ງ, ນ້ຳໃຈເສຍສະຫຼະ ແລະ ເຊື່ອໝັ້ນຕໍ່ການນຳພາຂອງພັກ ຢ່າງໜັກແໜ້ນ; ໄດ້ເຂົ້າຮ່ວມການຝຶກອົບຮົມວຽກງານຊົນເຜົ່າ, ສາສະໜາ, ຊັ້ນຄົນ-ອົງການຈັດຕັ້ງສັງຄົມ, ວຽກງານຈັດ ຕັ້ງ-ພະນັກງານ, ວຽກງານກວດກາ, ວຽກງານສື່ມວນຊົນ ແລະ ອື່ນໆ. ພ້ອມດຽວກັນນັ້ນໃນກອງປະຊຸມຄັ້ງນີ້, ໄດ້ຜ່ານແຜນ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຄະນະບໍລິຫານງານຊາວໜຸ່ມ ສນຊ ແລະ ຕາງໜ້າບັນດາໜ່ວຍຊາວໜຸ່ມ ທັງ 9 ໜ່ວຍ ໄດ້ຂຶ້ນຈັບມືແຂ່ງຂັນ ເພື່ອພ້ອມກັນຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ໃຫ້ປະກົດຜົນເປັນຈິງ.

ໂອກາດດັ່ງກ່າວ, ທ່ານ ຄຳໃບ ດຳລັດ ເປັນກຽດໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວທີ່ ຊາວໜຸ່ມ ສນຊ ຍາດມາໄດ້ໃນໄລຍະຜ່ານມາ ແລະ ທ່ານຍັງໄດ້ເນັ້ນບາງບັນຫາທີ່ສຳຄັນໃຫ້ສະມາຊິກຊາວໜຸ່ມ ສນຊ ເອົາໃຈໃສ່ ເປັນຕົ້ນ: ກ່ຽວກັບທີ່ຕັ້ງ ແລະ ພາລະບົດບາດຂອງຊາວໜຸ່ມໃຫ້ກາຍເປັນຊາວໜຸ່ມ 4 ບຸກ, ວຽກງານຊາວໜຸ່ມເປັນວຽກງານ ໜຶ່ງທີ່ສຳຄັນເປັນແຂນຂວາຂອງພັກ, ເປັນກຳລັງແຮງຂອງພັກ, ຂອງຊາດ; ເຕົ້າໂຮມຄວາມສາມັກຄີໃຫ້ແໜ້ນແຟ້ນທັງພາຍ ໃນ ສນຊ ແລະ ທົ່ວສັງຄົມ, ສຶກສາອົບຮົມການເມືອງ-ແນວຄິດ, ຊຸກຍູ້, ຊວນເຊື່ອ, ແນະນຳ ໃຫ້ຊາວໜຸ່ມທຸກສະຫາຍເຂົ້າຮ່ວມ ການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ, ປັບປຸງການຈັດຕັ້ງແຕ່ລະຂັ້ນໃຫ້ເຂັ້ມແຂງ ເພື່ອເປັນພະນັກງານສືບ ທອດພາລະກິດຂອງຊາດ, ຍົກສູງສະຕິຄວາມເປັນເຈົ້າການຕໍ່ການຈັດຕັ້ງ ແລະ ເຂົ້າຮ່ວມຂະບວກນການຕ່າງໆ; ມີສະຕິລະວັງ ຕົວຕໍ່ກຸ່ມຄົນທີບໍ່ຫວັງດີສວຍໃຊ້ວຽກງານສາສະໜາ, ຊົນເຜົ່າ ແລະ ປະກົດການຫຍໍ້ທໍ້ຕ່າງໆ ເພື່ອແບ່ງແຍກຄວາມສາມັກຄີ ພາຍໃນ.

ກອງປະຊຸມ ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດອັນຈົບງາມ ຕາມຈຸດປະສົງທີ່ວາງໄວ້.

info@lfnd.org.la | 021 213754 | (856-21) 453191