ສູນກາງແນວລາວສ້າງຊາດ

Lao Front For National Development

ກອງປະຊຸມຈັດຕັ້ງເຜີຍແຜ່ນິຕິກໍາຕ່າງໆ ຂອງສູນກາງສະຫະພັນແມ່ຍິງລາວ

ໃນຫວ່າງບໍ່ດົນມານີ້, ທີ່ສູນກາງແນວລາວສ້າງຊາດ ໄດ້ເປີດກອງປະຊຸມຈັດຕັ້ງເຜີຍແຜ່ນິຕິກໍາຕ່າງໆ ຂອງສູນກາງສະຫະພັນແມ່ຍິງລາວ ເນື່ອງໃນໂອກາດວັນສ້າງຕັ້ງອົງການຈັດສະຫະພັນແມ່ຍິງລາວ ຄົບຮອບ 63 ປີ (20/7/1955-20/7/2018) ໂດຍການເປັນປະທານຂອງທ່ານ ນ. ສີພະຈັນ ນັນທະວົງສາ ຄະນະປະຈໍາ ສນຊ, ຫົວໜ້າກົມກວດກາ, ປະທານສະຫະພັນແມ່ຍິງ ສນຊ ມີບັນດາຄະນະປະທານສະຫະພັນແມ່ຍິງຕະຫຼອດຮອດສະມາຊິກແມ່ຍິງ ສນຊ ເຂົ້າຮ່ວມ.

ໃນໂອກາດນີ້, ທ່ານ ນ. ສີພະຈັນ ນັນທະວົງສາ ໄດ້ເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງສະຫະພັນແມ່ຍິງລາວ ຄັ້ງທີ 3 ສະໄໝ VII; ບົດສັງຫຍໍ້ການເຄື່ອນໄຫວຂອງສະຫະພັນແມ່ຍິງລາວ. ການຈັດຕັ້ງປະຕິບັດເນື້ອໃນແຜນການປະ ເມີນຂໍ້ແຂ່ງຂັນ 3 ດີບັນດາໜ່ວຍແມ່ຍິງ.

ໃນໂອກາດນີ້ ທ່ານ ນ. ແພງພັນ ບຸບຜາພອນ ຮອງປະທານສະຫະພັນແມ່ຍິງ ຍັງໄດ້ຜ່ານ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາສະຫະພັນແມ່ຍິງກະຊວງອົງການ ຜ່ານແຜນການລົງປະເມີນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ຂອງບັນດາໜ່ວຍແມ່ຍິງ, ບົດສະຫຼຸບ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍ ປີ 2018 ພ້ອມກັນນີ້, ຍັງໄດ້ປະກອບຄໍາຄິດຄໍາເຫັນຢ່າງກົງໄປກົງມາຂອງເອື້ອຍນ້ອງແມ່ຍິງຕື່ມ.

ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງທ່ານ ປະທານສະຫະພັນແມ່ຍິງ ສນຊ ຊິ່ງທ່ານໄດ້ເນັ້ນຫຼາຍບັນຫາທີ່ສໍາຄັນເປັນຕົ້ນແບບແຜນວິທີເຮັດວຽກຂອງເອື້ອຍນ້ອງແມ່ຍິງໃຫ້ເອົາໃຈກວດກາຄືນວຽກທີ່ໄດ້ຮັບການມອບໝາຍເປັນຕົ້ນວຽກງານວິຊາສະເພາະຂອງແຕ່ລະຄົນທີ່ເປັນສະມາຊິກແມ່ຍຍິງ, ການປະຕິບັດຫຼັກການລວມສູນປະຊາທິປະໄຕ, ກ້າຕັດສິນວຽກງານ ແລະ ກ້າປະກອບຄໍາຄິດຄໍາເຫັນ, ໃຫ້ມີການສະຫຼຸບປະຈໍາເດືອນ, ປະຈໍາ 3 ເດືອນ ແລະ ປະຈໍາ 6 ເດືອນ, ເອົາໃຈໃສ່ດໍາເນີນຊີວິດການເມືອງ ແລະ ເສຍເງິນສະຕິ; ການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສູນກາງສະຫະພັນແມ່ຍິງວາງອອກໃຫ້ປະກົດຜົນເປັນຈິງ.

info@lfnd.org.la | 021 213754 | (856-21) 453191