ສູນກາງແນວລາວສ້າງຊາດ

Lao Front For National Development

ກອງປະຊຸມປຶກສາຫາລືກ່ຽວກັບຄວາມເປັນໄປໄດ້ໃນການສ້າງຕັ້ງສະຫະພັນຊາວກະສິກອນລາວ

ໃນວັນທີ 20 ກຸມພາ 2024 ທີ່ສູນກາງແນວລາວສ້າງຊາດ ໄດ້ຈັດກອງປະຊຸມປຶກສາຫາລືເນື້ອໃນບົດລາຍງານຕໍ່ກົມການເມືອງສູນກາງພັກ ກ່ຽວກັບຄວາມເປັນໄປໄດ້ໃນການສ້າງສະຫະພັນຊາວກະສິກອນລາວ ຂຶ້ນ ໂດຍການເປັນປະທານ ຂອງທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາທ່ານຮອງປະທານ, ຫົວໜ້າ-ຮອງຫົວໜ້າກົມ, ຫ້ອງການ,  ສູນຄົ້ນຄວ້າ-ຝຶກອົບຮົມ, ຄະນະທີ່ປຶກສາສູນກາງແນວລາວສ້າງຊາດ ພ້ອມດ້ວຍຄະນະຮັບຜິດຊອບ ແລະ ແຂກຖືກເຊີນ ເຂົ້າຮ່ວມ.

ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ລາຍງານຄວາມເປັນໄປໄດ້ໃນການສ້າງຕັ້ງສະຫະພັນຊາວກະສິກອນລາວ ເຊິ່ງໄດ້ຍົກໃຫ້ເຫັນເຖີງຖັນແຖວຊາວກະສິກອນໃດໜຶ່ງໃນໂຄງສ້າງສັງຄົມ ຂອງ ສປປ ລາວ, ຮູບແບບພື້ນຖານຂອງການເຄື່ອນໄຫວການຜະລິດ ຂອງຊາວກະສິກອນລາວ, ໝາກຜົນໃນການຈັດຕັ້ງປະຕິບັດແຜນນະໂຍບາຍພັດທະນາຊົນນະບົດ, ຂະຫຍາຍກະສິກຳ ແລະ ການແກ້ໄຂຄວາມຫຍຸ້ງຍາກໃນການຍົກສູງຊີວິດການເປັນຢູ່ ຂອງຊາວກະສິກອນ; ການຍົກລະດັບຊີວິດການເປັນຢູ່, ການແກ້ໄຂຄວາມທຸກຍາກຂອງປະຊາຊົນ ແລະ ສະພາບຊີວິດການເປັນຢູ່ ຂອງຊາວກະສິກອນລາວ ເງື່ອນໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນປັດຈຸບັນ. ພ້ອມກັນນັ້ນ, ຍັງໄດ້ຍົກໃຫ້ເຫັນເຫດຜົນ ແລະ ຄວາມຈຳເປັນ, ຄາດຄະເນຜົນໄດ້ຮັບ, ຂໍ້ສະດວກ, ຂໍ້ຫຍຸ້ງຍາກ ໃນການສ້າງຕັ້ງຊາວກະສິກອນລາວ ແລະ ຜູ້ເຂົ້າຮ່ວມກໍ່ໄດ້ປະກອບຄຳຄິດຄຳເຫັນຢ່າງກົງໄປກົງມາຕໍ່ຮ່າງບົດລາຍງານດັ່ງກ່າວ.

ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານທີ່ໄດ້ປະກອບຄຳເຫັນຕໍ່ບັນດາເນື້ອໃນຂອງເອກະສານດັ່ງກ່າວ ແລະ ທ່ານໄດ້ມີຄຳເຫັນຊີ້ນຳວ່າໃຫ້ຄະນະຮັບຜິດຊອບຈຶ່ງນຳເອົາບັນດາຄຳເຫັນຂອງຜູ້ເຂົ້າຮ່ວມ ໄປປັບປຸງແກ້ໄຂບົດລາຍງານ ໃຫ້ເທດເໝາະກັບຄວາມຕ້ອງການ ແລະ ເພື່ອຜົນປະໂຫຍດ ຂອງປະຊາຊົນ, ຂອງຊາວກະສິກອນ  ແລະ ປັບປຸງໃຫ້ມີເນື້ອໃນສົມບູນ ເພື່ອລາຍງານຕໍ່ໃຫ້ຂັ້ນເທີງຕາມຂັ້ນຕອນ.

ຂ່າວ+ພາບ: ເຢ

ບກ: ກົງແກ້ວ

 

info@lfnd.org.la | 021 213754 | (856-21) 453191