ສູນກາງແນວລາວສ້າງຊາດ

Lao Front For National Development

ກອງປະຊຸມປຶກສາຫາລື ຮອບທີ 2 ກ່ຽວກັບບາງຮີດຄອງປະເພນີຂອງຊົນເຜົ່າມົ້ງ

ເພື່ອອະນຸລັກ ແລະ ເສີມຂະຫຍາຍວັດທະນະທຳ ໂດຍສະເພາະແມ່ນບາງຮີດຄອງປະເພນີອັນດີງາມ ຂອງຊົນເຜົ່າມົ້ງ ຢູ່ ສປປ ລາວ ທີ່ເຄີຍຈັດຕັ້ງປະຕິບັດກັນມາແຕ່ດຶກດຳບັນ ໃຫ້ຍືນຍົງຄົງຕົວຢູ່ກັບຊົນເຜົ່າມົ້ງ ແລະ ຊາດລາວເຮົາ.

ເພື່ອສ້າງຄວາມເປັນເອກະພາບ ໃນການຈັດຕັ້ງປະຕິບັດບາງຮີດຄອງປະເພນີຂອງຊົນເຜົ່າມົ້ງ ໃນຂອບເຂດທົ່ວປະເທດ, ເພື່ອຫຼຸດຜ່ອນ ແລະ ກ້າວໄປເຖິງການຫັນປ່ຽນພຶດຕິກຳທີ່ບໍ່ເຄົາລົບຮີດຄອງປະເພນີອັນດີງາມຂອງຊົນເຜົ່າ, ເພື່ອບຸກທະລຸບາງຮີດຄອງປະເພນີທີ່ເຫັນວ່າມີຄວາມຫຍຸ້ງຍາກ, ສັບສົນ, ແລະ ສິ້ນເປືອງ ໃຫ້ສອດຄ່ອງກັບການພັດທະນາເສດຖະກິດ-ສັງຄົມ ໃນສະພາບແວດລ້ອມໃໝ່ຢູ່ປະເທດເຮົາ. ສູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມປຶກສາຫາລືຮ່າງຄຳແນະນຳ ຄັ້ງທີ 2 ກ່ຽວກັບບາງຮີດຄອງປະເພນີຂອງຊົນເຜົ່າມົ້ງ ຂຶ້ນໃນວັນທີ 9 ຕຸລາ 2018 ນີ້, ທີ່ ສນຊ, ໂດຍການເປັນປະທານຂອງທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ, ມີບັນດາຮອງປະທານ ສນຊ, ບັນດາທ່ານຕາງໜ້າກະຊວງ-ອົງການທີ່ກ່ຽວຂ້ອງ ແລະ ຄະນະຮັບຜິດຊອບເຂົ້າຮ່ວມ.

ໂອກາດນີ້, ທ່ານ ໄມ ຄຳວົງ ຫົວໜ້າກົມຊົນເຜົ່າ ສນຊ ໄດ້ຕາງໜ້າຄະນະຮັບຜິດຊອບກອງປະຊຸມຜ່ານຮ່າງຄຳແນະນຳ ຂອງຄະນະປະຈຳສູນກາງແນວລາວສ້າງຊາດ ກ່ຽວກັບການປະຕິບັດບາງຮີດຄອງປະເພນີອັນດີງາມຂອງຊົນເຜົ່າມົ້ງ ເຊິ່ງໄດ້ຍົກໃຫ້ເຫັນ 4 ເນື້ອໃນທີ່ສຳຄັນຄື: ງານບຸນກິນຈຽງ, ການສ້າງຄອບຄົວ, ການເຊື່ອຖືຕ່າງໆ ແລະ ການຊາປະນະກິດສົບ. ພ້ອມກັນນີ້, ຄະນະຮັບຜິດຊອບກໍໄດ້ມີຄໍາເຫັນເຈາະຈິ້ນ ແລະ ບັນດາທ່ານຜູ້ແທນທີ່ເຂົ້າຮ່ວມໄດ້ມີການປະກອບຄຳຄິດຄຳເຫັນ ແລກ ປ່ຽນບົດຮຽນກ່ຽວກັບຮ່າງຄຳແນະນຳດັ່ງກ່າວ ເພື່ອເຫັນໄດ້ເນື້ອໃນໃນການປັບປຸງ ຈາກອັນກ່າວມາເປັນອັນໃໝ່ ທີ່ມີລັກສະ ນະກ້າວ ແລະ ປະຢັດກວ່າເກົ່າ.

info@lfnd.org.la | 021 213754 | (856-21) 453191