ໃນວັນທີ 18 ສິງຫາຜ່ານມານີ້, ສູນຝືກອົບຮົມ ສູນກາງແນວລາວສ້າງຊາດ ໄດ້ຈັດກອງປະຊຸມ ຜ່ານ ແລະ ຮັບຮອງ ເນື້ອໃນເອກະສານຝືກອົບຮົມວຽກງານແນວລາວສ້າງຊາດ ວິຊາ: ວຽກງານຈັດຕັ້ງ-ພະນັກງານ ແລະ ວຽກງານກວດກາ ໂດຍການເປັນປະທານຂອງທ່ານ ນາງ ຄຳຈັນ ພົມແສງສະຫວັນ ຄະນະປະຈຳ, ຮອງປະທານສູນກາງແນວລາວສ້າງຊາດ, ຜູ້ຊີ້ນຳວຽກງານ ກວດກາ ແລະ ວຽກງານສູນຝືກອົບຮົມ, ເປັນກຽດເຂົ້າຮ່ວມມີບັນດາທ່ານຫົວໜ້າ-ຮອງຫົວໜ້າກົມ, ສູນຝຶກອົບຮົມ ສນຊ, ມີຜູ້ຕາງໜ້າຈາກສະຖາບັນການເມືອງການປົກຄອງແຫ່ງຊາດ, ຄະນະໂຄສະນາອົບຮົມສູນກາງພັກ, ຄະນະຈັດຕັ້ງສູນກາງພັກ, ກະຊວງພາຍໃນ, ກວດກາສູນກາງພັກ ລວມທັງວິຊາການທີ່ກ່ຽວຂ້ອງເຂົ້າຮ່ວມ ຢູ່ທີ່ເມືອງ ແກ້ວອຸດົມ, ແຂວງວຽງຈັນ.

ຈຸດປະສົງ ໃນການຈັດກອງປະຊຸມໃນຄັ້ງນີ້, ເພື່ອປືກສາຫາລື, ຄົ້ນຄວ້າ ຮຽບຮຽງ ບັນດາເອກະສານຕ່າງໆ ໃຫ້ເປັນລະບົບຢ່າງຖືກຕ້ອງຕາມຫຼັກວິຊາການ ໃນການສ້າງປື້ມຄູ່ມືຝືກອົບຮົມ, ເພື່ອຄົ້ນຄວ້າ ແລະ ສ້າງສາລະບານ, ກຳນົດເນື້ອໃນລົງໃສ່ແຕ່ລະຫົວຂໍ້ໃຫ້ມີຄວາມເໝາະສົມ ເພື່ອສະດວກຕໍ່ຜູ້ນຳໃຊ້ຄູ່ມືຝືກອົບຮົມ ແລະ ເພື່ອຄວາມເປັນເອກະພາບກັນ ຂອງວຽກງານຈັດຕັ້ງ-ພະນັກງານ ແລະ ວຽກງານກວດກາຂອງ ສນຊ ທີ່ຈະໄດ້ນຳມາເຜີຍແຜ່ໃຫ້ພາກສ່ວນທີ່ເຮັດວຽກໃນຂົງເຂດດັ່ງກ່າວ. ໃນກອງປະຊຸມ ທ່ານ ສຸຣິປັນຍາ ຣາຊສົມບັດ ຮັກສາການ ຫົວໜ້າສູນຝືກອົບຮົມ ສນຊ ໄດ້ລາຍງານຜົນສຳເລັດການສ້າງຫຼັກສູດ ແລະ ປື້ມຄູ່ມືຝືກອົບຮົມວຽກງານແນວລາວສ້າງຊາດນັບແຕ່ທ້າຍປີ 2017ເປັນຕົ້ນມາ ແລະ ການຮ່າງ, ຮຽບຮຽງ, ສ້າງເອກະສານ ວຽກງານ ຈັດຕັ້ງ-ພະນັກງານ ແລະ ວຽກງານກວດກາ.

ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ໄດ້ມີຄຳເຫັນຕໍ່ກອງປະຊຸມດັ່ງກ່າວ ເຊີ່ງທ່ານໄດ້ຍົກໃຫ້ເຫັນຕະຫຼອດໄລຍະ 60 ປີທີ່ຜ່ານມາແນວລາວສ້າງຊາດເຮົາຍັງບໍ່ມີຫຼັກສູດຝຶກອົບຮົມທີ່ເປັນລະບົບ ຕໍ່ເນື່ອງ ແລະ ນັບແຕ່ໄດ້ແຕ່ຕັ້ງຄະນະຮັບຜິດຊອບສ້າງຫຼັກສູດ ແລະ ປື້ມຄູ່ມືຝຶກອົບຮົມ ໄດ້ສ້າງເອກະສານຝຶກອົບຮົມໄລຍະສັ້ນສຳເລັດ 2 ຊຸດຄື ສຳລັບຝຶກອົບຮົມໃຫ້ກຳມະການສູນກາງແນວລາວສ້າງຊາດ ແລະ ພະນັກງານທີ່ເຮັດວຽກງານແນວລາວສ້າງຊາດ. ສ້າງສຳເລັດປື້ມຄູ່ມືຝຶກອົບຮົມ 45 ວັນ ແລະ ປະຈຸບັນໄດ້ສ້າງສຳເລັດ ປື້ມຄູ່ມືຝືກອົບຮົມ ວິຊາ: ວຽກງານຊົນເຜົ່າ ແລະ ວຽກງານສາສະໜາ ໄດ້ໂດຍພື້ນຖານ 80% ແລ້ວ. ໃນຕອນທ້າຍທ່ານໄດ້ຮຽກຮ້ອງໃຫ້ທຸກພາກສ່ວນຈົ່ງພ້ອມກັນເຊີດຊູຄວາມຮັບຜິດຊອບສູງ, ເປັນເຈົ້າການເສີມຂະຫຍາຍສະຕິປັນຍາ, ບົດຮຽນ, ປະສົບການທີ່ມີ ເຂົ້າໃນການຄົ້ນຄວ້າ ປຶກສາຫາລື ປະກອບຄຳຄິດຄຳເຫັນ ເຮັດໃຫ້ຫຼັກສູດ ຝຶກອົບຮົມ ວິຊາ: ວຽກງານ ຈັດຕັ້ງ-ພະນັກງານ ແລະ ວຽກງານກວດກາຂອງແນວລາວສ້າງຊາດມີເນື້ອໃນຄົບຖ້ວນເຮັດໃຫ້ວຽກງານດັ່ງກ່າວ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.