ສູນກາງແນວລາວສ້າງຊາດ

Lao Front For National Development

ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ພະນັກງານນຳພາຄຸ້ມຄອງຂອງແນວລາວສ້າງຊາດ ແຂວງຈຳປາສັກ

ໃນວັນທີ 8 ເມສາ 2021 ນີ້, ຢູ່ທີ່ຫ້ອງປະຊຸມ 406 ຫ້ອງວ່າການປົກຄອງ ແຂວງຈໍາປາສັກ ແນວລາວສ້າງຊາດແຂວງ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ພະນັກງານນຳພາຄຸ້ມຄອງ ເຊັ່ນ: ປະທານ, ຮອງປະທານແນວລາວສ້າງຊາດ 09 ເມືອງ 1 ນະຄອນ ພ້ອມດ້ວຍພະນັກງານແນວລາວສ້າງຊາດແຂວງ, ໂດຍການເປັນປະທານຂອງ ທ່ານ ພວງເພັດ ສອນທະລາດ ຮອງປະທານແນວລາວສ້າງຊາດແຂວງ.

ທ່ານ ພວງເພັດ ສອນທະລາດ ໄດ້ກ່າວວ່າ: ກອງປະຊຸມຝຶກອົບຮົມໃນຄັ້ງນີ້ ເພື່ອເຮັດໃຫ້ວຽກງານແນວລາວສ້າງຊາດ ມີການພົວພັນປະສານສົມທົບກັນລະຫວ່າງແນວລາວສ້າງຊາດແຂວງ, ເມືອງ ໃຫ້ມີການເຄື່ອນໄຫວວຽກງານຂອງແນວລາວສ້າງຊາດໃຫ້ດີຂື້ນ, ມີຄວາມເປັນເອກະພາບ, ທັງເປັນການສ້າງຄວາມເຂັ້ມແຂງ, ພ້ອມກັນປັບປຸງວຽກງານແນວລາວສ້າງຊາດໃຫ້ມີປະສິດທິຜົນ, ຈາກນັ້ນ, ຫົວໜ້າຂະແໜງແນວລາວສ້າງຊາດແຂວງ ໄດ້ຂື້ນບັນຍາຍເອກະສານກ່ຽວກັບຂະແໜງຕົນໃຫ້ບັນດາເມືອງໄດ້ຮັບຮູ້ເຂົ້າໃຈຕື່ມ, ພ້ອມທັງໄດ້ມີການແລກປ່ຽນຖອດຖອນບົດຮຽນ ແລະ ປະສົບການນຳກັນ.

ໃນກອງປະຊຸມ, ທ່ານ ນາງ ວາດສະໜາ ສີລິມາ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມ ຈົ່ງພ້ອມກັນສືບຕໍ່ເອົາໃຈໃສ່ ຍົກສູງບົດບາດໃນໜ້າວຽກຂອງຕົນ ເຮັດໜ້າທີ່ໃຫ້ຖືກຕ້ອງສອດຄ່ອງກັບລະບຽບກົດໝາຍ ແລະ ຈົ່ງນໍາເອົາເນື້ອໃນຈິດໃຈຂອງກອງປະຊຸມຝຶກອົບຮົມຄັ້ງນີ້ ໄປຈັດຕັ້ງປະຕິບັດໃຫ້ໄດ້ຮັບໝາກຜົນສໍາເລັດອັນໃໝ່ດີຂື້ນກ່ວາເກົ່າ.

 

info@lfnd.org.la | 021 213754 | (856-21) 453191