ສູນກາງແນວລາວສ້າງຊາດ

Lao Front For National Development

ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ພະນັກງານແນວລາວສ້າງຊາດ

ໃນອາທິດຜ່ານມານີ້, ທີ່ສູນກາງແນວລາວສ້າງຊາດ (ສນຊ) ໄດ້ເປີດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ພະນັກງານ ທີ່ເຮັດວຽກງານຊັ້ນຄົນ-ການຈັດຕັ້ງສັງຄົມ ແລະ ເຜີຍແຜ່ນິຕິກໍາຕ່າງໆ ໃຫ້ພະນັກງານ ແນວລາວສ້າງຊາດ ນະຄອນຫຼວງ, ແຂວງ, ເມືອງ ແລະ ບັນດາສະມາຄົມ-ມູນນິທິ ທົ່ວນະຄອນຫຼວງວຽງຈັນ. ໂດຍການເປັນປະທານຂອງທ່ານ ຮສ. ດຣ. ສົມອົກ ກິ່ງສະດາ ຮອງປະທານ ສນຊ (ຜູ້ຊີ້ນໍາວຽກງານຊັ້ນຄົນ-ອົງການຈັດຕັ້ງສັງຄົມ) ມີບັນດາທ່ານຫົວໜ້າ-ຮອງຫົວໜ້າກົມ, ມີພະ ນັກງານແນວລາວສ້າງຊາດມາຈາກ 3 ແຂວງຄື: ຫຼວງພະບາງ, ໄຊຍະບູລີ, ວຽງຈັນ ແລະ ນະຄອນຫຼວງວຽງຈັນ, ມີບັນດາສະມາ ຄົມ-ມູນນິທິ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງການຝຶກອົບຮົມຄັ້ງນີ້, ເປັນການຍົກສູງບົດບາດຄວາມສໍາຄັນຂອງວຽກງານຊັ້ນຄົນ-ອົງການຈັດຕັ້ງສັງຄົມ; ເພື່ອເປັນບ່ອນອີງ ໃນການປະກອບຂໍ້ມູນກ່ຽວກັບວຽກງານຊັ້ນຄົນໃຫ້ແກ່ພັກ-ລັດ ແລະ ພາກສ່ວນຕ່າງໆ ໃນການກໍານົດແນວທາງ, ແຜນນະໂຍບາຍ, ການວາງແຜນພັດທະນາຕ່າງໆໃຫ້ເໝາະສົມ; ເພື່ອຜັນຂະຫຍາຍແນວທາງນະໂຍບາຍຂອງພັກ-ລັດເຂົ້າສູ່ວຽກງານຕົວຈິງໃຫ້ສອດຄ່ອງກັບສະພາວະຄວາມເປັນຈິງ. ກອງປະຊຸມຄັ້ງນີ້, ປະກອບມີ 7 ເອກະສານສໍາຄັນຄື: ຄວາມຮູ້ພື້ນຖານກ່ຽວກັບວຽກງານຊັ້ນຄົນ-ອົງການຈັດຕັ້ງສັງຄົມ; ວຽກງານສາສະໜາ; ວຽກງານຊົນເຜົ່າ; ການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກ; ຄໍາແນະນໍາຂອງສູນກາງແນວລາວສ້າງຊາດ ແລະ ກະ ຊວງພາຍໃນກ່ຽວກັບການແບ່ງຄວາມຮັບຜິດຊອບວຽກງານການຈັດຕັ້ງສັງຄົມ ຊົນເຜົ່າ ແລະ ສາສະໜາ; ດໍາລັດ 149/ນຍ ວ່າດ້ວຍມູນນິທິ ແລະ ດໍາລັດ 238/ລບ ວ່າດ້ວຍສະມາຄົມ. ພ້ອມກັນນີ້, ຜູ້ແທນກອງປະຊຸມຍັງໄດ້ປະກອບຄໍາຄິດຄໍາເຫັນຢ່າງກົງໄປກົງມາກ່ຽວກັບວຽກງານດັ່ງກ່າວ.

ໃນໂອກາດນີ້, ທ່ານ ຮສ. ດຣ. ສົມອົກ ກິ່ງສະດາ ໄດ້ໃຫ້ກຽດກ່າວເປີດກອງປະຊຸມ ກ່ອນອື່ນໝົດ ທ່ານ ໄດ້ສະແດງຄວາມຍ້ອງຍໍຊົມເຊີຍຄະນະຮັບຜິດຊອບຫ້າງຫາກະກຽມການຝຶກອົບຮົມຄັ້ງນີ້ ພ້ອມທັງໄດ້ສະແດງຄວາມຂອບໃຈຕໍ່ສໍາມະນາກອນທີ່ໄດ້ເດີນທາງມາຈາກແຂວງ, ນະຄອນຫຼວງ ແລະ ບັນດາເມືອງຂອງ 3 ແຂວງ ແລະ ນະຄອນຫຼວງ ຊິ່ງການຝຶກອົບຮົມໄດ້ດໍາເນີນເປັນເວລາ 3 ວັນ ກອງປະຊຸມ ແມ່ນມີຄວາມໝາຍຄວາມສໍາຄັນຢ່າງຍິ່ງເປັນວຽກງານໜຶ່ງທີ່ສັງຄົມມີຄວາມສົນ ໃຈກ່ຽວກັບການກໍານົດຊັ້ນຄົນ ແລະ ຊົນຊັ້ນ ໃນສັງຄົມລາວ ຈາກນັ້ນສໍາມະນາກອນມີ ການແລກປ່ຽນຄໍາຄິດຄໍາເຫັນ ແລະ ຖອດຖອນບົດຮຽນກ່ຽວກັບວຽກງານ ຊັ້ນຄົນ-ການຈັດຕັ້ງສັງຄົມ ເພື່ອໃຫ້ເຂົ້າໃຈຢ່າງຈະແຈ້ງ ແລະ ກໍາແໜ້ນເນື້ອໃນເອກະ ສານທີ່ຈະໄດ້ນໍາໄປຈັດຕັ້ງປະຕິບັດໄດ້ຢ່າງຖືກຕ້ອງສອດຄ່ອງຕາມແນວທາງນະໂຍບາຍຂອງພັກ-ລັດຖະບານ; ເຂົ້າໃນການປຸກລະດົມຂົນຂວາຍ, ສຶກສາອົບຮົມ ແລະ ເຕົ້າໂຮມຄວາມສາມັກຄີປອງດອງທົ່ວປວງຊົນລາວ ແລະ ທ້າຍນີ້ຫວັງວ່າ ບັນດາທ່ານຈົ່ງນໍາເອົາຄວາມຮູ້ທີ່ໄດ້ອົບຮົມນີ້ນໍາໄປໜູນໃຊ້ເຂົ້າໃນວຽກງານຕົວຈິງໃຫ້ໄດ້ຮັບຜົນປະໂຫຍດອັນສູງສົ່ງ.

info@lfnd.org.la | 021 213754 | (856-21) 453191