ສູນກາງແນວລາວສ້າງຊາດ

Lao Front For National Development

ກອງປະຊຸມວິສາມັນ ຄົບຄະນະບໍລິຫານງານສະຫະພັນກຳມະບານ ແຂວງຊຽງຂວາງ ຄັ້ງທີ I ສະໄໝ ທີ VII.

ໃນວັນທີ 22 ກຸມພາ 2021 ຜ່ານມານີ້ ຢູ່ຫ້ອງປະຊຸມຫ້ອງວ່າການແຂວງຊຽງຂວາງ ໄດ້ເປີດກອງປະຊຸມວິສາມັນຄົບຄະນະບໍລິຫານງານສະຫະພັນກຳມະບານ ແຂວງຊຽງຂວາງ ຄັ້ງທີ I ສະໄໝທີ VII ຂື່ນຢ່າງເປັນທາງການ, ໂດຍການເປັນປະທານຂອງ ສະຫາຍ ພູວອນ ສີຄຳອອນ ກຳມະການພັກແຂວງ ປະທານຄະນະບໍລິຫານງານສະຫະພັນກຳມະບານແຂວງ, ເປັນກຽດເຂົ້າຮ່ວມຂອງສະຫາຍ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນແຂວງ, ມີບັນດາຫົວໜ້າ-ຮອງຫົວໜ້າພະແນກ ການອ່ອມຂ້າງແຂວງ, ປະທານ-ຮອງປະທານຄະນະບໍລິຫານງານສະຫະພັນກຳມະບານເມືອງ, ແຂກຖືກເຊີນຕະຫຼອດຮອດພະນັກງານສະມາຊິກກຳມະບານແຂວງເຂົ້າຮວ່ມ.

ກອງປະຊຸມໃນຄັ້ງນີ້ ຈະໄດ້ຮັບຟັງບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານກຳມະບານຮອບດ້ານຂອງແຂວງ ປີ 2020  ແລະ ທິດທາງແຜນການ ປີ 2021 ເຊີ່ງໄດ້ຍົກໃຫ້ເຫັນຜົນງານດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານກຳມະບານໃນໄລຍະຜ່ານມາ, ເຊີ່ງຜູ້ເຂົ້າຮວ່ມກອງປະຊຸມໄດ້ພອ້ມກັນເປັນເຈົ້າການຄົ້ນຄວ້າປະກອບຄຳຄິດຄຳເຫັນ ໃສ່ບັນຫາທີ່ຍັງຄົງຄ້າງ ໂດຍສະເພາະແມ່ນ ດ້ານວຽກງານໂຄສະນາສຶກສາອົບຮົມການເມືອງ-ແນວຄິດ, ດ້ານວຽກງານປັບປຸງແລະຂະຫຍາຍ,  ການຈັດຕັ້ງກຳມະບານ, ວຽກງານບໍລິຫານ ,ບໍລິການກອງທຶນ, ວຽກງານປົກປອ້ງສິດຜົນປະໂຫຍດ ຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ແລະ ວຽກງານຂະບວນການແຂ່ງຂັນ 5 ເປັນເຈົ້າ ແລະ ທິດທາງວິທີການປັບປຸງແກ້ໄຂດ້ານແບບແຜນວິທີນຳພາ ແລະ ແບບແຜນວິທີເຮັດວຽກຂອງກຳມະບານແຕ່ຂັ້ນ ເພື່ອເຮັດໃຫ້ວຽກກຳມະບານໃນທົ່ວແຂວງ ມີການຂະຫຍາຍຕົວພັດທະນາດີຂື້ນໃນຕໍ່ໜ້າ. ພ້ອມນັ້ນ, ກອງປະຊຸມຍັງໄດ້ຜ່ານຂໍ້ຕົກລົງຂອງຄະນະປະຈຳພັກແຂວງ ແລະຂໍ້ຕົກລົງຂອງປະທານສະຫະພັນກຳມະບານລາວ ວ່າດ້ວຍການຮັບຮອງຄະນະບໍລິຫານງານສະຫະພັນແຂວງຊຽງຂວາງ ສະໄຫມທີ່ VII ຕື່ມອີກ.

info@lfnd.org.la | 021 213754 | (856-21) 453191