ກົມຊັ້ນຄົນ-ການຈັດຕັ້ງສັງຄົມ ສູນກາງແນວລາວສ້າງຊາດ ໄດ້ຈັດກອງປະຊຸມສະຫຼຸບວຽກງານຂອງກົມ ແລະ ວຽກງານຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ປະຈຳປີ 2022 ຂຶ້ນທີ່ຫ້ອງປະຊຸມຊັ້ນ 4 ຂອງສູນກາງແນວລາວສ້າງຊາດ ໃນວັນທີ 21 ກຸມພາ 2023 ນີ້; ໂດຍການເປັນປະທານຂອງທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ, ມີຮອງປະທານສູນກາງແນວລາວສ້າງຊາດ ຜູ້ບໍ່ປະຈຳການ, ຄະນະກຳມະການສູນກາງແນວລາວສ້າງຊາດ, ຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ພ້ອມດ້ວຍບັນດາທ່ານຕາງໜ້າຈາກບັນດາກົມ, ຫ້ອງການ, ສູນຝຶກອົບຮົມ ອ້ອມຂ້າງສູນກາງແນວລາວສ້າງຊາດ ເຂົ້າຮ່ວມ.

ຈຸດປະສົງຕົ້ນຕໍຂອງກອງປະຊຸມໃນຄັ້ງນີ້ ແມ່ນເພື່ອທົບທວນຄືນຜົນງານການຈັດຕັ້ງປະຕິບັດວຽກງານຊັ້ນຄົນ-ການຈັດຕັ້ງສັງຄົມ ໃນໄລຍະ 1 ປີທີ່ຜ່ານມາ(ປີ 2022) ແລະ ທິດທາງແຜນການປີ 2023, ເຊິ່ງໃນນີ້ໂດຍປະຕິບັດຕາມກັນຫັນປ່ຽນໃໝ່ ຂອງຄະນະພັກ, ຄະນະປະຈຳ ສູນກາງແນວລາວສ້າງຊາດ ວາງອອກ ແລະ ກຳມະການ ສູນກາງແນວລາວສ້າງຊາດ ຜູ້ໜຶ່ງຕ້ອງໄດ້ສ້າງຄວາມງາມຄຸນດີໃຫ້ໄດ້ 1 ກິດຈະກຳ ເມື່ອເຫັນໄດ້ຄວາມສຳຄັນດັ່ງກ່າວນີ້, ຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ໄດ້ເອົາໃຈໃສ່ຕິດຕາມ, ຊຸກຍູ້ປຸກລະດົມບັນດາຊັ້ນຄົນ-ການຈັດຕັ້ງສັງຄົມ ຕ່າງໆ ເພື່ອເຂົ້າຮ່ວມຂະບວນການຕ່າງໆຂອງພັກ, ຂອງຊາດ ແລະ ການເຄື່ອນໄຫວຕ່າງໆຂອງການຈັດຕັ້ງສັງຄົມ ໃຫ້ຖືກຕ້ອງຕາມລະບຽບກົດໝາຍ, ເສີມຂະຫຍາຍຄວາມສາມັກຄີເປັນປຶກແຜ່ນ ລະຫວ່າງການຈັດຕັ້ງສັງຄົມ ສູ່ປະຊາຊົນລາວບັນດາເຜົ່າ, ປະກອບສ່ວນຊ່ວຍເຫຼືອແກ້ໄຂຄວາມທຸກຍາກຂອງປະຊາຊົນ. ໃນນີ້ ທ່ານ ນາງ ແສງເດືອນ ຫຼ້າຈັນທະບູນ ຮອງປະທານຜູ້ບໍ່ປະຈຳການສູນກາງແນວລາວສ້າງຊາດ, ຫົວໜ້າຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ຍົກໃຫ້ຮູ້ວ່າ: ໂດຍອີງໃສ່ທ່າແຮງຂອງຄະນະທີ່ປຶກສາ ແມ່ນໄດ້ສ້າງແຜນໂຄງການກໍ່ສ້າງຫໍພັກ ໃຫ້ນັກຮຽນຜູ້ທີ່ຢູ່ເຂດຫ່າງໄກສອກຫຼີກມາເຂົ້າຮຽນ ຢູ່ໂຮງຮຽນມັດທະຍົມຕອນຕົ້ນ ບ້ານເມືອງຊຶມ ເມືອງແອດ ແຂວງຫົວພັນ. ສຳເລັດແຜນການສ້າງວັດຢູ່ເມືອງໜອງແຮດ ແຂວງຊຽງຂວາງ ແລະ ໄດ້ນຳເອົາອຸປະກອນ, ທຶນຮອນຈຳນວນໜຶ່ງໄປມອບຊ່ວຍເຫຼືອປະຊາຊົນຢູ່ທີ່ຢູ່ເຂດຫ່າງໄກສອກຫຼີກ.

ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຕ່າງໆ ທີ່ກົມ ແລະ ຄະນະທີ່ປຶກສາ ຍາດມາໄດ້ໃນຕະຫຼອດໄລຍະຜ່ານມາ ແລະ  ທ່ານໄດ້ຮຽກຮ້ອງໃຫ້ສຶບຕໍ່ກວດກາຄືນບັນດາໜ້າວຽກຕ່າງໆ ທີ່ໄດ້ຈັດຕັ້ງປະຕິບັດຜ່ານມາ ເພື່ອສຶບຕໍ່ສຸມໃສ່ເຄື່ອນໄຫວໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້, ແບ່ງຄວາມຮັບຜິດຊອບໃຫ້ແຕ່ລະທ່ານເພື່ອເປັນບ່ອນອີງ ແລະ ສະດວກຕໍ່ການເຄື່ອນໄຫວວຽກງານຕ່າງໆ, ໃຫ້ສຶບຕໍ່ສຶກສາຄົ້ນຄວ້າວຽກງານຊັ້ນຄົນ-ການຈັດຕັ້ງສັງຄົມ ເພື່ອສາມາດກຳແໜ້ນ ແລະ ເຂົ້າໃຈຈະແຈ້ງຕໍ່ວຽກງານດັ່ງກ່າວ.