ສູນກາງແນວລາວສ້າງຊາດ

Lao Front For National Development

ກອງປະຊຸມສາມັນຄົບຄະນະກຳມະການ ແນວລາວສ້າງຊາດເມືອງວຽງພູຄາ ຄັ້ງທີ II ສະໄໝທີ VII

ແນວລາວສ້າງຊາດເມືອງວຽງພູຄາ ໄດ້ຈັດກອງປະຊຸມສາມັນຄົບຄະນະກຳມະການແນວລາວສ້າງຊາດເມືອງ ຄັ້ງທີ II ສະໄໝທີ VII ຂຶ້ນຢ່າງເປັນທາງການ ໃນວັນທີ 23 ມີຖຸນາ 2021 ຢູ່ສະໂມສອນເມືອງວຽງພູຄາ ແຂວງຫຼວງນ້ຳທາ, ພາຍໃຕ້ການເປັນປະທານຂອງ ທ່ານ ນາງ ຈັນຄຳ ຮອງເລຂາພັກເມືອງ, ປະທານແນວລາວສ້າງຊາດເມືອງ, ໃຫ້ກຽດເຂົ້າຮ່ວມມີ ທ່ານ ຕຽນສະໝອນ ພອນປະເສີດ ກຳມະການພັກແຂວງ ເລຂາພັກເມືອງ ເຈົ້າເມືອງໆວຽງພູຄາ ແລະ ທ່ານ ສົມຈ໋າຍ ແຝງຫຼ້າ ຮອງປະທານແນວລາວສ້າງຊາດແຂວງ, ມີບັນດາທ່ານການນຳເມືອງ, ອາດີດການນຳເມືອງ, ຫົວໜ້າ, ຮອງຫົວໜ້າຫ້ອງການ, ກຳມະການແນວແຂວງ, ເມືອງ, ເລຂາພັກບ້ານ, ຜູ້ຊົງຄຸນວຸດທິ, ແຂກຖືກເຊີນ ແລະ ພະນັກງານ ພາຍໃນແນວລາວສ້າງຊາດເມືອງ ເຂົ້າຮ່ວມຢ່າງພ້ອມພຽງ.

ທ່ານ ປະທານແນວລາວສ້າງຊາດເມືອງວຽງພູຄາ  ໄດ້ກ່າວເປີດ ກອງປະຊຸມສາມັນຄົບຄະນະກຳມະການແນວລາວສ້າງຊາດເມືອງ ຄັ້ງທີ II ສະໄໝທີ VII. ພ້ອມກັນນັ້ນ, ໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດວຽກງານແນວລາວສ້າງຊາດຂັ້ນເມືອງໃນໄລຍະ 1 ປີຜ່ານມາ ເຊິ່ງໄດ້ຍົກໃຫ້ເຫັນວ່າ ແນວລາວສ້າງຊາດເມືອງ  ໄດ້ເອົາໃຈໃສ່ຈັດຕັ້ງເຊື່ອມຊຶມ, ເຜີຍແຜ່ບັນດາເອກະສານນິຕິກຳຕ່າງໆຂອງຂັ້ນເທິງ ໂດຍສະເພາະແມ່ນສຶກສາອົບຮົມການເມືອງ-ແນວຄິດ, ປຸກລະດົມ, ເຕົ້າໂຮມຄວາມສາມັກຄີປະຊາຊົນບັນດາເຜົ່າ ໃຫ້ປອງດອງກັນ, ເຂົ້າຮ່ວມບັນດາໂຄງການທີ່ແນວລາວສ້າງຊາດມີສ່ວນຮັບຜິດຊອບຢ່າງຕັ້ງໜ້າ, ຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງທົ່ວເມືອງ ເຮັດໃຫ້ສາມາດປະເມີນໄດ້ 2,834 ຄອບຄົວ, 30 ບ້ານ, ເຂົ້າຮ່ວມການແກ້ໄຂບັນຫາປະກົດການຫຍໍ້ທໍ້ຕ່າງໆຢູ່ຂັ້ນເມືອງ, ຂັ້ນບ້ານ, ປຸກລະດົມຊຸມຊົນສ້າງສາພັດທະນາຄອບຄົວໃຫ້ດີຂຶ້ນ ແລະ ສ້າງເສດຖະກິດຄອບຄົວໃຫ້ເຂັ້ມແຂງ.

ກອງປະຊຸມ ທ່ານຫົວໜ້າຫ້ອງການພາຍໃນເມືອງວຽງພູຄາ ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍການອະນຸມັດໃຫ້ອົງການແນວລາວສ້າງຊາດ ຈັດພິທີປະດັບຫຼຽນໄຊ, ຫຼຽນກາແຮງງານ ແລະ ໃບຍ້ອງຍໍລັດຖະບານ ໃຫ້ແກ່ຜູ້ທີ່ມີຜົນງານ, ຄຸນງາມຄວາມດີ ທີ່ປະກອບສ່ວນເຂົ້າໃນວຽກງານແນວລາວສ້າງຊາດ ຕະຫຼອດໄລຍະ 10 ປີ ຜ່ານມາ.

ທ່ານ ຕຽນສະໝອນ ພອນປະເສີດ ແລະ ທ່ານ ສົມຈ໋າຍ ແຝງຫຼ້າ ໄດ້ສະແດງຄວາມຍ້ອງຍໍຊົມເຊີຍຕໍ່ແນວລາວສ້າງຊາດເມືອງວຽງພູຄາ ທີ່ເອົາໃຈໃສ່ຈັດຕັ້ງປະຕິບັດເຄື່ອນໄຫວວຽກງານແນວລາວສ້າງຊາດ ຕະຫຼອດໄລຍະຜ່ານມາ ແລະ ໄດ້ມີບາງຄຳເຫັນໂອ້ລົມຕື່ມວ່າ ໃຫ້ຄະນະກຳມະການແນວລາວສ້າງຊາດເມືອງ ຈົ່ງສືບຕໍ່ສຶກສາອົບຮົມ, ປຸກລະດົມ, ເຕົ້າໂຮມຄວາມສາມັກຄີປະຊາຊົນບັນດາເຜົ່າ ເປັນປຶກແຜ່ນແໜ້ນໜາ, ໃຫ້ນຳເອົາມະຕິກອງປະຊຸມຄັ້ງນີ້ ໄປຄົ້ນຄວ້າ ແລະ ຜັນຂະຫຍາຍເປັນແຜນງານ, ໂຄງການ ແລະ ຈິດຈະກຳລະອຽດ ເພື່ອເຮັດໃຫ້ການເຄື່ອນໄຫວວຽກງານດັ່ງກ່າວມີປະສິດທິພາບ ແລະ ມີປະສິດທິຜົນຂຶ້ນກ່ວາເກົ່າ.

info@lfnd.org.la | 021 213754 | (856-21) 453191