ສູນກາງແນວລາວສ້າງຊາດ

Lao Front For National Development

ກອງປະຊຸມສຳມະນາວິທະຍາສາດ ໃນຫົວຂໍ້: ທັດສະນະຊີ້ນຳຂອງປະທານ ຄຳໄຕ ສີພັນດອນ ພາຍຫລັງພັກຜ່ອນບຳນານ

     ເນື່ອງໃນໂອກາດສະເຫລີມສະຫລອງວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ ສະຖາບັນການເມືອງ-ການປົກຄອງ ແຫ່ງຊາດ ໄດ້ຈັດກອງປະຊຸມສຳມະນາວິທະຍາສາດ ໃນຫົວຂໍ້: “ທັດສະນະຊີ້ນຳ ຂອງປະທານ ຄຳໄຕ ສີພັນດອນ ພາຍຫລັງພັກຜ່ອນບຳນານ” ຂຶ້ນໃນວັນທີ 2 ກຸມພາ 2024 ທີ່ສະໂມສອນ ຂອງສະຖາບັນການເມືອງ-ການປົກຄອງ ແຫ່ງຊາດ, ໂດຍການເປັນປະທານຂອງທ່ານ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາ-ອົບຮົມສູນກາງພັກ, ປະທານສະພາທິດສະດີສູນກາງພັກ, ເປັນກຽດເຂົ້າຮ່ວມມີທ່ານ ດຣ ນາງ ອິິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ; ທ່ານ ອາດສະພັງທອງ ສີພັນດອນ ກໍາມະການສູນກາງພັກ ເຈົ້າຄອງນະຄອນຫຼວງວຽງຈັນ, ທ່ານ ຮສ. ພູວົງ ອຸ່ນຄໍາແສນ ຫົວໜ້າສະຖາບັນການເມືອງ-ການປົກຄອງ ແຫ່ງຊາດ ຮອງປະທານສະພາທິດສະດີສູນກາງພັກ ມີຄະນະພັກ-ຄະນະນຳບັນດາກະຊວງ-ອົງການ ພ້ອມດ້ວຍ ຄູ-ອາຈານ, ນັກສຶກສາ ສະຖາບັນການເມືອງ-ການປົກຄອງແຫ່ງຊາດ ເຂົ້າຮ່ວມ.
     ໃນພິທີໄດ້ຮັບຟັງການຜ່ານບົດວິທະຍາສາດ 7 ຫົວຂໍ້ສໍາຄັນ ກ່ຽວກັບປະທານ ຄຳໄຕ ສີພັນດອນ ຕໍ່ໃນຂົງເຂດວຽກວຽກຕ່າງໆ ເຊັ່ນ: ທັດສະນະຊີ້ນໍາຂອງປະທານ ຄໍາໄຕ ສີພັນດອນ ກ່ຽວກັບວຽກພັກ-ພະນັກງານ, ຂົງເຂດວຽກງານເສດຖະກິດ, ຂົງເຂດການປົກຄອງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານວັດທະນະທຳ-ສັງຄົມ; ຂົງເຂດວຽກງານກໍ່ສ້າງຮາກຖານເມືອງ-ພັດທະນາຊົນນະບົດ ແລະ ບົດຄໍາເຫັນຕາງໜ້າຄອບຄົວສີພັນດອນ ພ້ອມດຽວກັນນັ້ນ, ບັນດາຜູ້ແທນທີ່ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດຄໍາເຫັນຕໍ່ 7 ຫົວຂໍ້ດັ່ງກ່າວຢ່າງກົງໄປກົງມາ.
     ໃນໂອກາດທີ່ມີຄວາມໝາຍສຳຄັນນີ້, ທ່ານປະທານກອງປະຊຸມ ໄດ້ເນັ້ນຕໍ່ກອງປະຊຸມຕື່ມວ່າ: ໃຫ້ນັກວິທະຍາສາດ ແລະ ພາກສ່ວນທີ່ກ່ຽວຂ້ອງ ຈົ່ງສືບຕໍ່ນຳເອົາເນື່ອໃນຈິດໃຈຂອງກອງປະຊຸມຄັ້ງນີ້ ໄປຄົ້ນຄວ້າປັບປຸງ ເພື່ອໃຫ້ເນື້ອໃນມີຄວາມເລິກເຊິ່ງ, ສຸມໃສ່ຮຽບຮຽງເນື້ອໃນຂອງບົດວິທະຍາສາດ ແລະຮຽບຮຽງນິພົນເລືອກເຟັ້ນໃຫ້ສຳເລັດ ແລະ ຈັດພິມ ເຜີຍແຜ່ໃຫ້ສັງຄົມໄດ້ສຶກສາຄົ້ນຄວ້າໃຫ້ກວ້າງຂວາງ.
ຂ່າວ+ພາບ: ເຢ
ບກ: ອິນທະຫວາ
   
info@lfnd.org.la | 021 213754 | (856-21) 453191